Home Remedies : ఎండకాలం ముగిసి వర్షాకాలం వస్తోందంటే చాలు.. వేడి నుంచి ఉపశమనం లభించినప్పటికీ, కొత్త ఆరోగ్య సమస్యలు కూడా మొదలవుతాయి. ముఖ్యంగా వర్షాల వల్ల అక్కడక్కడా నీరు నిలిచిపోవడం వల్ల దోమలు విపరీతంగా పెరిగిపోతాయి. దీనివల్ల డెంగ్యూ, మలేరియా, చికెన్గున్యా వంటి ప్రమాదకరమైన వ్యాధులు వ్యాపించే అవకాశం ఎక్కువగా ఉంటుంది. మార్కెట్లో దొరికే రసాయనాలతో కూడిన దోమల నివారణ మందులు (కాయిల్స్, లిక్విడ్స్) శ్వాసకోస సమస్యలకు దారితీస్తాయి. కాబట్టి, మన ఇంట్లో దొరికే సహజసిద్ధమైన వస్తువులతోనే ఎలాంటి సైడ్ ఎఫెక్ట్స్ లేకుండా దోమల బెడదకు ఎలా చెక్ పెట్టవచ్చో ఇప్పుడు చూద్దాం.
వేప నూనె – కొబ్బరి నూనె మిశ్రమం
ఆయుర్వేదంలో వేపకు కీటకాలను తరిమికొట్టే అద్భుతమైన గుణం ఉందని నిరూపించబడింది. దోమలను నివారించడంలో వేప నూనె పవర్ఫుల్గా పనిచేస్తుంది. సమాన పరిమాణంలో వేప నూనె , కొబ్బరి నూనెను కలిపి ఒక మిశ్రమంగా తయారుచేసుకోండి. ఈ నూనెను మీ చేతులకు, కాళ్లకు రాసుకోవడం వల్ల దోమలు మీ దరిచేరవు. అలాగే ఈ మిశ్రమంతో ఇంట్లో దీపం వెలిగిస్తే, ఆ పొగకు ఇంట్లో ఉన్న దోమలన్నీ క్షణాల్లో పారిపోతాయి.
కర్పూరం , ఎండిన తులసి పొగ
దోమలను తరిమికొట్టడానికి కర్పూరం ఒక చక్కని హోమ్ రెమెడీ. మీ ఇంటి తలుపులు, కిటికీలు అన్నీ మూసివేసి ఒక చిన్న పాత్రలో రెండు మూడు కర్పూర బిళ్లలను వెలిగించి గదిలో ఉంచండి. ఒక 15-20 నిమిషాల తర్వాత చూస్తే దోమలన్నీ మాయమవుతాయి. దీనిని మరింత ప్రభావవంతంగా మార్చడానికి, కర్పూరంతో పాటు కొన్ని ఎండిన తులసి ఆకులను లేదా వేపాకులను కలిపి కాల్చడం వల్ల వచ్చే సువాసన గల పొగ సహజ క్రిమిసంహారిణిగా పనిచేసి ఇల్లాంటి దోమలను నివారిస్తుంది.
నిమ్మకాయ – లవంగాల అద్భుత చిట్కా
ఇది చాలా సులువైన , గదికి మంచి సువాసనను ఇచ్చే పద్ధతి. ఒక నిమ్మకాయను తీసుకుని దానిని నిలువుగా రెండు ముక్కలుగా కట్ చేయండి. ఆ రెండు ముక్కల లోపలి భాగంలో 10 నుండి 15 లవంగాలను గుచ్చండి. ఈ ముక్కలను మీ పడకగదిలో లేదా దోమలు ఎక్కువగా వచ్చే కిటికీల దగ్గర ఉంచాలి. నిమ్మకాయలోని సిట్రస్ గుణం , లవంగాల ఘాటైన వాసన దోమలకు అస్సలు పడదు, అందువల్ల అవి ఆ ప్రాంతంలోకి రావడానికి కూడా భయపడతాయి.
లావెండర్ , సిట్రోనెల్లా ఆయిల్స్
మార్కెట్లో లభించే లావెండర్ ఆయిల్, సిట్రోనెల్లా ఆయిల్ లేదా యూకలిప్టస్ (నీలగిరి) ఆయిల్స్ దోమల నివారణలో చక్కగా ఉపయోగపడతాయి. కొద్దిగా నీటిలో ఈ ఎసెన్షియల్ ఆయిల్స్ వేసి బాగా కలిపి, ఒక స్ప్రే బాటిల్లో పోసుకోండి. ఈ మిశ్రమాన్ని గదిలో ఉండే కర్టెన్లు, సోఫాల వెనుక , చీకటి మూలల్లో స్ప్రే చేయడం వల్ల ఇల్లంతా మంచి సువాసన రావడంతో పాటు దోమలు కూడా పూర్తిగా నియంత్రణలోకి వస్తాయి.
ఇంటి పరిసరాల పరిశుభ్రత చాలా ముఖ్యం..
చిట్కాలు పాటించడంతో పాటు దోమలు మన ఇంట్లో చేరకుండా ఉండాలంటే కొన్ని ముందస్తు జాగ్రత్తలు కూడా అవసరం. వర్షాకాలంలో ఇంటి చుట్టుపక్కల ఉండే పాత టెర్రస్ కుండీలు, టైర్లు, ప్లాస్టిక్ డబ్బాలలో వర్షపు నీరు నిల్వ ఉండకుండా చూసుకోవాలి. సాయంత్రం 5 గంటలు దాటిన తర్వాత ఇంటి కిటికీలు, తలుపులు మూసి ఉంచడం మంచిది. వీలైతే దోమలను ఆకర్షించే ముదురు రంగు దుస్తులు కాకుండా, వర్షాకాలంలో లేత రంగు దుస్తులను ధరించడం వల్ల కూడా దోమల కాటు నుండి తప్పించుకోవచ్చు.