Ragi Bellam Ariselu: ఉరుకుల పరుగుల జీవితంలో చాలా మంది రుచికంటే ఆరోగ్యానికే ఎక్కువ ప్రాధాన్యత ఇస్తున్నారు. ముఖ్యంగా స్వీట్స్ విషయానికి వస్తే ‘బరువు పెరుగుతామేమో’ లేదా ‘షుగర్ వస్తుందేమో’ అన్న భయం అందరిలోనూ ఉంటుంది. అయితే మన పూర్వీకులు అందించిన చిరుధాన్యాల గొప్పతనాన్ని, సంప్రదాయ అరిసెల రుచిని కలిపి వండితే ఎలా ఉంటుంది? అదే “రాగి బెల్లం అరిసెలు”. రాగుల్లో ఉండే కాల్షియం, బెల్లంలో ఉండే ఐరన్ కలగలిసి రక్తహీనతను తగ్గించడమే కాకుండా ఎముకల పుష్టికి ఎంతగానో తోడ్పడతాయి. ఇవి బియ్యం అరిసెల కంటే ఆరోగ్యకరమైన ప్రత్యామ్నాయంగా నిలుస్తాయి. పండగలు వచ్చినా లేదా ఇంట్లో ఏదైనా స్వీట్ తినాలనిపించినా.. చిటికెలో, ఎంతో రుచిగా ఈ రాగి అరిసెలను ఎలా చేసుకోవాలో ఈ స్టోరీలో వివరంగా తెలుసుకుందాం.
కావలసిన పదార్థాలు:
రాగి పిండి: 2 గ్లాసుల
బెల్లం: 1 గ్లాసు రాగి పిండికి అర గ్లాసు కంటే కొంచెం ఎక్కువ (అచ్చు బెల్లం అయితే శ్రేష్టం)
నీళ్లు: అర గ్లాసు (పాకం కోసం)
నువ్వులు: అరిసెలపై అద్దుకోవడానికి
నూనె: వేయించడానికి సరిపడా
తయారీ విధానం:
ముందుగా రాగి పిండి తీసుకొని, అందులో కొద్దికొద్దిగా నీళ్లు చల్లుతూ తడి పొడిగా కలుపుకుని 2 గంటలు పక్కన పెట్టాలి. తర్వాత ఒక గిన్నెలో బెల్లం, నీళ్లు పోసి కరిగించాలి. బెల్లం కరిగిన తర్వాత వడకట్టి, మళ్లీ పొయ్యి మీద పెట్టి ఉడికించాలి. నీళ్లలో పాకం వేస్తే అది ఉండ కట్టే వరకు (ఉండ పాకం) ఉడికించాలి. పాకం రాగానే స్టవ్ ఆపేసి, రాగి పిండిని కొద్దికొద్దిగా వేస్తూ ఉండలు లేకుండా బాగా కలపాలి. పిండి అంతా పాకంలో బాగా కలిసేలా చూసుకోవాలి.
తర్వాత ఒక ప్లాస్టిక్ కవర్ లేదా అరిటాకుపై కొంచెం నూనె రాసి, చిన్న పిండి ముద్దను తీసుకుని నువ్వుల్లో అద్ది, అరిసెలా ఒత్తుకోవాలి. మరీ పల్చగా కాకుండా కొంచెం మందంగా ఒత్తుకుని, మీడియం వేడి ఉన్న నూనెలో వేయించాలి. అరిసె గోల్డెన్ బ్రౌన్ కలర్లోకి రాగానే తీసి, అరిసెల గరిటెతో గట్టిగా నొక్కి ఎక్స్ట్రా నూనెను తీసేయాలి. ఈ రాగి బెల్లం అరిసెలు కాల్చుకునేటప్పుడు మంటను ఎప్పుడూ మీడియం ఫ్లేమ్లోనే ఉంచాలి, లేదంటే పైన మాడిపోయి లోపల కాలవు. 1 కిలో రాగి పిండికి ముప్పావు కిలో బెల్లం సరిపోతుంది. సింపుల్గా ఇంట్లోనే ఆరోగ్యకరమైన రాగి బెల్లం అరిసెలను ఎలా తయారు చేసుకోవచ్చు తెలుసుకున్నారు కదా.. కుదిరితే మీ ఇంట్లో కూడా ప్రయత్నించి చూడండి.