Mustard Oil Ban in US: భారత్‌లో హెల్దీ.. అమెరికాలో నిషేధం.. ఆవ నూనెపై నిజాలు ఇవే..!
- Follow Us :
-
-
Add as a preferred
source on google
Mustard Oil Ban in US: ఆవ నూనె భారతీయ వంటల్లో శతాబ్దాలుగా కీలక పాత్ర పోషిస్తోంది. ఘాటైన సువాసన, ప్రత్యేకమైన రుచి, ఆరోగ్య ప్రయోజనాల కారణంగా కూరలు, ఊరగాయలు, సంప్రదాయ వంటకాల తయారీలో విస్తృతంగా ఉపయోగిస్తారు. అయితే, అమెరికాలో మాత్రం ఆవ నూనెను వంట కోసం విక్రయించేందుకు అనుమతి లేదు. అక్కడ మార్కెట్‌లో లభించే ఆవ నూనె సీసాలపై “For External Use Only” అనే హెచ్చరిక ఉంటుంది. దీనికి ప్రధాన కారణం ఎరుసిక్ యాసిడ్ (Erucic Acid) అనే పదార్థమే.
FDA నిబంధనలు.. ఎరుసిక్ యాసిడ్‌పై ఆందోళన
అమెరికా ఫుడ్ అండ్ డ్రగ్ అడ్మినిస్ట్రేషన్ (FDA) ప్రకారం, సంప్రదాయ ఆవ నూనెలో ఎరుసిక్ యాసిడ్ అధికంగా ఉంటుంది. 1970లలో జంతువులపై నిర్వహించిన పరిశోధనల్లో అధిక మోతాదులో ఈ ఆమ్లం తీసుకోవడం వల్ల గుండె కండరాల్లో కొవ్వు పేరుకునే ప్రమాదం ఉన్నట్లు గుర్తించారు. ఈ కారణంగానే అమెరికాతో పాటు కొన్ని పాశ్చాత్య దేశాలు ఆవ నూనెను వంట నూనెగా అనుమతించలేదు.
అమెరికాలో గుండెజబ్బులు మాత్రం తగ్గలేదు
ఆవ నూనె నిషేధంలో ఉన్నప్పటికీ అమెరికాలో గుండె సంబంధిత వ్యాధులు అధికంగానే ఉన్నాయి. అమెరికన్ హార్ట్ అసోసియేషన్ (AHA) గణాంకాల ప్రకారం ప్రతి సంవత్సరం లక్షలాది మంది గుండె జబ్బులతో మరణిస్తున్నారు. నిపుణుల అభిప్రాయం ప్రకారం దీనికి ప్రధాన కారణాలు ప్రాసెస్డ్ ఫుడ్, ట్రాన్స్ ఫ్యాట్స్, అధిక చక్కెరలు, ఊబకాయం, శారీరక శ్రమ లేకపోవడం మరియు ధూమపానం వంటి జీవనశైలి అలవాట్లే.
ఆవ నూనె వల్ల కలిగే ఆరోగ్య ప్రయోజనాలు
ఆవ నూనెలో మోనో అన్‌శాచురేటెడ్ (MUFA), పాలీ అన్‌శాచురేటెడ్ (PUFA) కొవ్వు ఆమ్లాలు సమతుల్యంగా ఉంటాయి. ఇవి మంచి కొలెస్ట్రాల్ (HDL) పెంచి, చెడు కొలెస్ట్రాల్ (LDL) తగ్గించడంలో సహాయపడతాయని పలు అధ్యయనాలు సూచిస్తున్నాయి. అంతేకాకుండా యాంటీ ఆక్సిడెంట్లు, యాంటీ ఇన్ఫ్లమేటరీ, యాంటీ బ్యాక్టీరియల్ గుణాలు కూడా ఇందులో ఉన్నాయి. కోల్డ్-ప్రెస్డ్ ఆవ నూనెను పరిమిత మోతాదులో తీసుకోవడం ఆరోగ్యానికి మేలు చేస్తుందని నిపుణులు చెబుతున్నారు.
నిపుణుల్లో భిన్నాభిప్రాయాలు
ఆవ నూనెపై అమెరికా నిషేధం ఇప్పటికీ కొనసాగుతున్నప్పటికీ, ఈ నిర్ణయంపై శాస్త్రవేత్తలు, పోషకాహార నిపుణుల మధ్య భిన్నాభిప్రాయాలు ఉన్నాయి. పాత జంతు అధ్యయనాలను మానవులకు పూర్తిగా వర్తింపజేయలేమని కొందరు పేర్కొంటున్నారు. ఆసక్తికరంగా, అమెరికాలో విస్తృతంగా ఉపయోగించే కెనోలా నూనెను కూడా ఆవ నూనెలోని ఎరుసిక్ యాసిడ్ పరిమాణాన్ని తగ్గించి అభివృద్ధి చేశారు.
పరిమితంగా వాడితేనే మేలు
భారతదేశంలో ఆవ నూనెను శతాబ్దాలుగా వంటల్లో ఉపయోగిస్తున్నారు. పరిమిత మోతాదులో, ముఖ్యంగా కోల్డ్-ప్రెస్డ్ ఆవ నూనెను వినియోగించడం గుండె ఆరోగ్యానికి ప్రయోజనకరమని అనేక నిపుణులు సూచిస్తున్నారు. ఏ నూనె అయినా మితంగా తీసుకోవడం, సమతుల్య ఆహారం, ఆరోగ్యకరమైన జీవనశైలిని పాటించడం ఎంతో ముఖ్యమని వైద్యులు సూచిస్తున్నారు.