Ragi Biscuits : హెల్తీ రాగి బిస్కెట్లు ఎయిర్ ఫ్రైయర్లో 10 నిమిషాల్లో ఇలా చేసుకోండి.!
- రాగి, గోధుమ పిండితో హెల్తీ రెసిపీ
- బెల్లంతో సహజ తీపి రుచి
- ఎయిర్ ఫ్రైయర్లో 10 నిమిషాల్లో తయారీ
- 20 రోజుల పాటు తాజాగా నిల్వ
- Follow Us :
-
-
Add as a preferred
source on google
Ragi Biscuits : రాగులు (తృణధాన్యాలు) ఆరోగ్యానికి ఎంతో మేలు చేస్తాయనే విషయం మనందరికీ తెలిసిందే. వీటిలో క్యాల్షియం, ఐరన్, ఫైబర్ పుష్కలంగా ఉంటాయి. పిల్లల నుండి పెద్దల వరకు అందరికీ మేలు చేసే రాగి పిండితో, మైదా, చక్కెర అస్సలు వాడకుండా, ఎయిర్ ఫ్రైయర్లో కేవలం 10 నిమిషాల్లో ఎంతో క్రిస్పీగా, టేస్టీగా ఉండే హెల్తీ రాగి బిస్కెట్లను ఎలా తయారు చేసుకోవాలో ఇప్పుడు చూద్దాం.
కావలసిన పదార్థాలు:
- రాగి పిండి – 1 కప్పు
- గోధుమ పిండి – 1/2 కప్పు
- ఆర్గానిక్ బెల్లం పొడి – 1/2 కప్పు
- నెయ్యి లేదా బటర్ – 1/2 కప్పు
- పాలు – 2 నుండి 3 టేబుల్ స్పూన్లు (పిండి కలపడానికి సరిపడా)
- యాలకుల పొడి – 1/2 టీస్పూన్
- బేకింగ్ పౌడర్ – 1/2 టీస్పూన్
- ఉప్పు – చిటికెడు
తయారీ విధానం:
స్టెప్ 1: డ్రై మిశ్రమాన్ని సిద్ధం చేసుకోవడం
ముందుగా ఒక గిన్నె తీసుకుని అందులో రాగి పిండి, గోధుమ పిండి, బేకింగ్ పౌడర్ , చిటికెడు ఉప్పు వేసి బాగా కలుపుకోవాలి. (కావాలనుకుంటే ఈ మిశ్రమాన్ని ఒకసారి జల్లెడ పట్టుకోవచ్చు).
స్టెప్ 2: వెన్న, బెల్లం కలపడం
మరొక గిన్నెలో గది ఉష్ణోగ్రత వద్ద ఉన్న నెయ్యి (లేదా వెన్న) , బెల్లం పొడి వేసి బ్లెండర్ లేదా స్పూన్తో బాగా కలపాలి. ఈ మిశ్రమం కాస్త రంగు మారి, క్రీమ్లా (Fluffy) అయ్యేంత వరకు బాగా బీట్ చేయాలి. ఆ తర్వాత ఇందులో యాలకుల పొడి కలపాలి.
స్టెప్ 3: పిండి ముద్దను తయారు చేయడం
ఇప్పుడు సిద్ధం చేసుకున్న రాగి పిండి మిశ్రమాన్ని, ఈ వెన్న-బెల్లం క్రీమ్లో కొద్దికొద్దిగా వేస్తూ కలపాలి. బిస్కెట్ల పిండి మరీ గట్టిగా ఉంటే, ఒకటి లేదా రెండు చెంచాల పాలు పోసుకుంటూ చపాతీ పిండి కంటే కాస్త మెత్తగా, మృదువైన ముద్దలా కలుపుకోవాలి. పిండిని మరీ గట్టిగా ప్రెస్ చేయకుండా సాఫ్ట్గా కలపడం ముఖ్యం.
స్టెప్ 4: బిస్కెట్ల ఆకృతిని ఇవ్వడం
కలిపిన పిండి ముద్ద నుండి చిన్న చిన్న నిమ్మకాయ సైజు బాల్స్ తీసుకుని, అరచేతిలో పెట్టి మెల్లగా నొక్కి బిస్కెట్ల ఆకారంలో (రౌండ్గా) చేసుకోవాలి. మీకు నచ్చితే వీటిపై గాట్లు పెట్టవచ్చు లేదా పైన కాస్త బాదం, పిస్తా పలుకులను అలంకరించుకోవచ్చు.
స్టెప్ 5: ఎయిర్ ఫ్రైయర్లో బేక్ చేయడం
- ముందుగా ఎయిర్ ఫ్రైయర్ను 160°C వద్ద 3 నుండి 4 నిమిషాల పాటు ప్రిహీట్ (Preheat) చేసుకోవాలి.
- ఆ తర్వాత ఎయిర్ ఫ్రైయర్ బాస్కెట్లో బేకింగ్ పేపర్ (పార్చ్మెంట్ పేపర్) పరిచి, మనం సిద్ధం చేసుకున్న రాగి బిస్కెట్లను ఒకదానికొకటి అంటుకోకుండా కొద్దిగా గ్యాప్ ఇస్తూ సర్దాలి.
- ఇప్పుడు 160°C ఉష్ణోగ్రత వద్ద 10 నుండి 12 నిమిషాల పాటు బేక్ చేయాలి. (మధ్యలో 8 నిమిషాల తర్వాత ఒకసారి చెక్ చేసుకోవచ్చు).
టైమ్ పూర్తి కాగానే బిస్కెట్లను బయటకు తీయాలి. మొదట ఇవి కాస్త మెత్తగా అనిపించినా, పూర్తిగా చల్లారిన తర్వాత ఎంతో క్రిస్పీగా మారుతాయి. అంతే.. ఎంతో రుచికరమైన, ఆరోగ్యకరమైన హోమ్మేడ్ రాగి బిస్కెట్లు సిద్ధం! ఇవి చల్లారిన తర్వాత గాలి చొరబడని డబ్బా (Air tight container)లో నిల్వ చేసుకుంటే 15 నుండి 20 రోజుల పాటు తాజగా ఉంటాయి. సాయంత్రం పూట చాయ్తో పాటు పిల్లలకు ఇవ్వడానికి ఇది ఒక బెస్ట్ హెల్తీ స్నాక్ ఆప్షన్..