Gongura Mutton: మటన్ ప్రియులకు గోంగూర కాంబినేషన్ అంటేనే ఒక ఎమోషన్. పుల్లపుల్లగా, ఘాటుగా ఉండే ఈ కర్రీని అన్నంలో కలుపుకుని తింటుంటే వచ్చే తృప్తే వేరు. మటన్ స్మెల్ అనేది అస్సలు లేకుండా, ముక్క మెత్తగా దూదిలా ఉడికేలా చేసే ఈ స్పెషల్ ‘గోంగూర మటన్’ను ఎలా తయారు చేసుకోవాలో ఈ స్టోరీలో తెలుసుకుందాం.
READ ALSO: Umbilical Cord: బొడ్డు తాడు పారేస్తున్నారా? ప్రాణాంతక వ్యాధులను నయం చేసే ‘మెడికల్ మిరాకిల్’ ఇదే!
కావలసిన పదార్థాలు:
మటన్: అర కేజీ (చిన్న ముక్కలు)
గోంగూర: 4 చిన్న కట్టలు (సుమారు 150 గ్రాములు)
మారినేషన్ కోసం: పసుపు (1/2 స్పూన్), ఉప్పు (1 స్పూన్), నిమ్మరసం (1 స్పూన్), నూనె (1 స్పూన్).
మసాలా పొడి కోసం: ధనియాలు (1 టేబుల్ స్పూన్), జీలకర్ర (1 స్పూన్), మిరియాలు (1 స్పూన్), గసగసాలు (1 స్పూన్), ఎండు కొబ్బరి ముక్కలు, దాల్చిన చెక్క, లవంగాలు, యాలకులు, జాపత్రి, అనాస పువ్వు.
ఇతరాలు: ఉల్లిపాయలు, పచ్చిమిర్చి, టమాటాలు, అల్లం వెల్లుల్లి పేస్ట్, కారం, నూనె, కరివేపాకు, కొత్తిమీర.
తయారీ విధానం:
ముందుగా మటన్ను శుభ్రంగా కడిగి ఒక బౌల్లోకి తీసుకోండి. అందులో పసుపు, ఉప్పు, నిమ్మరసం, కొద్దిగా నూనె వేసి బాగా కలిపి అరగంట నుంచి గంట సేపు పక్కన పెట్టండి. ఇలా చేయడం వల్ల మటన్ స్మెల్ రాకుండా, ముక్క మెత్తగా ఉడుకుతుంది. తర్వాత మిక్సీ జార్లో పైన చెప్పిన మసాలా దినుసులన్నీ (ధనియాలు, జీలకర్ర, గసగసాలు, గరం మసాలా దినుసులు, ఎండు కొబ్బరి) వేసి మెత్తని పొడిలా గ్రైండ్ చేసి పక్కన పెట్టుకోండి. ఈ తాజా మసాలానే కూరకు అసలైన రుచిని ఇస్తుంది. దీనిని పక్కన పెట్టుకున్న తర్వాత ఒక పాన్లో కొద్దిగా నూనె వేసి శుభ్రం చేసిన గోంగూర ఆకులు, పచ్చిమిర్చి, టమాటా ముక్కలు, కొంచెం ఉప్పు, పసుపు వేసి మెత్తగా మగ్గనివ్వండి. ఇవి చల్లారిన తర్వాత మిక్సీలో వేసి మరీ మెత్తగా కాకుండా కొంచెం బరకగా గ్రైండ్ చేసుకోండి.
కుక్కర్లో నూనె వేసి హోల్ స్పైసెస్ (చెక్క, మొగ్గ, బిర్యానీ ఆకు) వేసి వేయించండి. తర్వాత ఉల్లిపాయ ముక్కలు, కరివేపాకు వేసి ఎర్రగా వేయించి, అల్లం వెల్లుల్లి పేస్ట్ వేసి పచ్చివాసన పోయే వరకు వేయించండి. ఇప్పుడు మారినేట్ చేసిన మటన్ను వేసి 10-15 నిమిషాలు మగ్గనివ్వండి. తర్వాత కారం, తగినన్ని నీళ్లు పోసి కుక్కర్ మూత పెట్టి 5-6 విజిల్స్ వచ్చే వరకు ఉడికించండి. మటన్ మెత్తగా ఉడికిన తర్వాత, ముందుగా సిద్ధం చేసుకున్న మసాలా పొడిని వేసి కలపండి. రెండు నిమిషాల తర్వాత గోంగూర పేస్ట్ను కూడా వేసి బాగా కలిపి, నూనె పైకి తేలే వరకు (సుమారు 5 నిమిషాలు) ఉడికించండి. చివరగా కొత్తిమీర చల్లుకుంటే వేడివేడి గోంగూర మటన్ సిద్ధం.
ముఖ్యమైన చిట్కాలు:
* మటన్ను నిమ్మరసం, ఉప్పుతో మారినేట్ చేయడం వల్ల ముక్క సాఫ్ట్గా మారుతుంది.
* గోంగూరను మరీ మెత్తగా పేస్ట్లా చేయకుండా కొంచెం బరకగా ఉంచితే తినేటప్పుడు రుచి బాగుంటుంది.
* ఈ కర్రీ అన్నం, బిర్యానీ, బగారా రైస్ లేదా చపాతీల్లోకి అద్భుతమైన కాంబినేషన్.
ఈసారి మీరు కూడా ఇంట్లో ఈ పద్ధతిలో ట్రై చేయండి, అందరూ ఫిదా అవ్వాల్సిందే.
READ ALSO: Ear Care Tips: మీ చెవుల ఆరోగ్యం మీ చేతుల్లోనే.. ఈ 4 తప్పులు అస్సలు చేయకండి.!