Chilli Garlic Egg Salad Recipe: ఆరోగ్యకరమైన అల్పాహారం రోజంతా శరీరానికి శక్తిని అందించడంలో కీలక పాత్ర పోషిస్తుంది. ప్రతిరోజూ ఒకే రకమైన బ్రేక్ఫాస్ట్ తిని విసుగొచ్చిందా? అయితే రుచితో పాటు పోషకాలు కూడా అందించే చిల్లీ గార్లిక్ ఎగ్ సలాడ్ మీకు మంచి ఎంపిక. గుడ్లు, తాజా కూరగాయలు, పెరుగు, వెల్లుల్లి, ఎండు మిరపకాయలతో తయారయ్యే ఈ సలాడ్ ప్రోటీన్తో పాటు శరీరానికి అవసరమైన పోషకాలను అందిస్తుంది.
కావలసిన పదార్థాలు
చిల్లీ గార్లిక్ పేస్ట్ కోసం:
* వెల్లుల్లి రెబ్బలు – 8 నుంచి 10
* ఎండు మిరపకాయలు – 3 నుంచి 4
* ఉప్పు – తగినంత
* నిమ్మరసం – 1 టేబుల్ స్పూన్
* నీరు – 1 నుంచి 2 టేబుల్ స్పూన్లు
సలాడ్ కోసం:
* ఉడికించిన గుడ్లు – 4 లేదా 5
* నూనె – 1 నుంచి 2 టీస్పూన్లు
* పాలకూర లేదా లెట్యూస్ ఆకులు – 1 కప్పు
* తురిమిన క్యారెట్ – అర కప్పు
* సన్నగా తరిగిన టమాటా – 1
* సన్నగా తరిగిన ఉల్లిపాయ – 1
డ్రెస్సింగ్ కోసం:
* పెరుగు – 2 టేబుల్ స్పూన్లు
* గ్రీక్ యోగర్ట్ – 2 టేబుల్ స్పూన్లు
* చాట్ మసాలా – అర టీస్పూన్
* ఒరేగానో – అర టీస్పూన్
* ఉప్పు – చిటికెడు
తయారీ విధానం
ముందుగా వెల్లుల్లి, ఎండు మిరపకాయలు, ఉప్పు, నిమ్మరసం, కొద్దిగా నీరు వేసి మెత్తగా గ్రైండ్ చేసి చిల్లీ గార్లిక్ పేస్ట్ సిద్ధం చేసుకోవాలి. ఉడికించిన గుడ్లను రెండు ముక్కలుగా కోసి, కొద్దిగా నూనెలో లేత బంగారు రంగు వచ్చే వరకు వేయించాలి. ఒక పెద్ద గిన్నెలో పాలకూర, క్యారెట్, టమాటా, ఉల్లిపాయ వేసి బాగా కలపాలి. మరో గిన్నెలో పెరుగు, గ్రీక్ యోగర్ట్, చాట్ మసాలా, ఒరేగానో, ఉప్పు వేసి డ్రెస్సింగ్ సిద్ధం చేయాలి. ఈ డ్రెస్సింగ్ను కూరగాయలపై పోసి బాగా కలిపి, పైగా వేయించిన గుడ్లను అమర్చాలి. చివరగా చిల్లీ గార్లిక్ పేస్ట్ వేసి మెల్లగా కలిపి వెంటనే సర్వ్ చేయాలి.
ఈ సలాడ్ ఎందుకు ప్రత్యేకం?
గుడ్లలో ఉండే అధిక ప్రోటీన్, కూరగాయల్లోని ఫైబర్, పెరుగులోని ప్రోబయోటిక్స్ కలిసి శరీరానికి మంచి పోషణ అందిస్తాయి. బరువు నియంత్రించుకోవాలనుకునే వారికి, ఫిట్నెస్పై దృష్టి పెట్టేవారికి, రుచికరమైన ఆరోగ్యకరమైన అల్పాహారం కోరుకునే వారికి ఈ చిల్లీ గార్లిక్ ఎగ్ సలాడ్ మంచి ఎంపికగా చెప్పవచ్చు.