Remove Oil Stains: బట్టలపై నూనె మరకలు పొరపాటున పడుతుండడం సాధారణమే. వంట చేసేటప్పుడు కూర లేదా తాలింపు నూనె బట్టలపై పడటం, లేదా ఇతర జిడ్డు పదార్థాలు బట్టలకు అంటుకోవడం అప్పుడప్పుడు జరుగుతుంటుంది. అయితే నూనె మరకలను సాధారణంగా ఉతికినంత మాత్రాన పూర్తిగా పోవడం కొన్నిసార్లు కష్టంగా ఉంటుంది. ముఖ్యంగా మరక పడిన వెంటనే శుభ్రం చేయకుండా కొంతసేపు అలాగే వదిలేస్తే మరింత ఇబ్బందిగా మారుతుంది.
నిజానికి నూనె, నీరు రెండూ అంత సులువుగా కలవవు. అందుకే నూనె మరక పడిన బట్టను వెంటనే నీళ్ల కింద పెట్టి రుద్దడం వల్ల పెద్దగా ప్రయోజనం ఉండదు. అంతేకాదు మరక బట్టలోని ఇతర భాగాలకు కూడా వ్యాపిస్తుంది.
ముందుగా పౌడర్ వేయాలి..
నూనె మరక పడిన వెంటనే ఆ ప్రాంతంపై కార్న్స్టార్చ్ లేదా బేకింగ్ సోడా వేయడం కాస్త ఉపయోగకరంగా ఉంటుంది. ఇవి బట్టపై ఉన్న నూనెను కొంతమేర పీల్చుకోవడానికి సహాయపడతాయి. ముందుగా శుభ్రమైన తెల్లటి వస్త్రం లేదా పేపర్ టవల్తో మరకపై మెల్లగా ఒత్తుతూ నూనెను తొలగించాలి. ఆ సమయంలో బట్టను అటూ ఇటూ రుద్దకూడదు. అలా చేస్తే నూనె బట్ట దారాల్లోకి మరింతగా వెళ్లే అవకాశం ఉంటుంది.
ఆ తర్వాత మరక ఉన్న ప్రాంతాన్ని కార్న్స్టార్చ్ లేదా బేకింగ్ సోడాతో పూర్తిగా కప్పి కనీసం 15 నిమిషాల పాటు అలాగే ఉంచాలి. మరక ఎక్కువగా ఉంటే లేదా బట్ట మందంగా ఉంటే సుమారు 30 నిమిషాల వరకు ఉంచవచ్చు. తర్వాత పౌడర్ను గట్టిగా రుద్దకుండా మెల్లగా దులిపేయాలి. అవసరమైతే మెత్తటి బ్రష్ లేదా చెంచా వెనుక భాగంతో సున్నితంగా తొలగించవచ్చు. పౌడర్ రంగు మారడం లేదా అక్కడక్కడా అతుక్కుపోవడం కనిపిస్తే అది నూనెను పీల్చుకున్నట్లు అర్థం.
మరకను తొలగించడానికి సులభమైన పద్ధతి..
పౌడర్ను తొలగించిన తర్వాత మరక ఉన్న ప్రాంతంలో కొద్దిగా డిష్ సోప్ వేయాలి. ఈ సమయంలో డిష్ సోప్ను ముందుగా నీటిలో కలిపి పలుచగా చేయాల్సిన అవసరం లేదు. వేలితో లేదా మెత్తటి టూత్బ్రష్తో డిష్ సోప్ను బట్టపై సున్నితంగా రుద్దాలి. చిన్న చిన్న వృత్తాకార కదలికలతో సుమారు 60 నుంచి 90 సెకన్ల పాటు రుద్దితే సరిపోతుంది.
డిష్ సోప్ లోని శుభ్రపరిచే పదార్థాలు నూనెతో కలిసేందుకు సహాయపడతాయి. దీంతో నూనెను తర్వాత నీటితో సులభంగా తొలగించవచ్చు. డిష్ సోప్ రాసిన తర్వాత బట్టలోని మరక ఉన్న భాగాన్ని చల్లటి నీటితో శుభ్రంగా కడగాలి. ఆ తర్వాత బట్టను వెలుతురులో పరిశీలించి మరక పూర్తిగా పోయిందో లేదో చూడాలి. ఇంకా కొద్దిగా మరక కనిపిస్తే డిష్ సోప్ను మరోసారి రాసి ఇదే విధానాన్ని పునరావృతం చేయవచ్చు.
ఎలా ఉతకాలి.?
మరక చాలావరకు తొలగిపోయిన తర్వాత బట్టను చల్లటి నీటిలో ఎంజైమ్లతో కూడిన లాండ్రీ డిటర్జెంట్ ఉపయోగించి ఉతకవచ్చు. వాషింగ్ మెషీన్లో ఉతికిన వెంటనే డ్రైయర్లో వేయడం మాత్రం చేయకూడదు. ముందుగా మరక ఉన్న ప్రాంతాన్ని మరోసారి జాగ్రత్తగా పరిశీలించాలి. మరకకు సంబంధించిన చిన్న గుర్తు కూడా మిగిలి ఉంటే బట్టను ఆరబెట్టే ముందు మరోసారి అదే ప్రాంతాన్ని శుభ్రం చేయాలి. డ్రైయర్ లోని వేడి కారణంగా మిగిలిపోయిన నూనె మరక బట్ట రేశాల్లో మరింతగా స్థిరపడే అవకాశం ఉంటుంది. ఒకసారి అలా జరిగితే దాన్ని తొలగించడం మరింత కష్టమవుతుంది.
నూనె మరకలకు వేడి నీరు.?
నూనె మరకలపై వేడి నీటిని ఉపయోగించకపోవడం మంచిది. వేడి కారణంగా నూనె బట్ట దారాలకు మరింత బలంగా అంటుకునే అవకాశం ఉంటుంది. అలాగే నూనె మరక పూర్తిగా తొలగిపోయిందని నిర్ధారించుకునే వరకు బట్టను డ్రైయర్లో వేయకూడదు. ఇంకా కాటన్, పాలిస్టర్ వంటి సాధారణ బట్టలపై కార్న్స్టార్చ్, బేకింగ్ సోడా, డిష్ సోప్ ఉపయోగించే ఈ పద్ధతిని సాధారణంగా ప్రయత్నించవచ్చు. డెనిమ్ వంటి మందమైన బట్టలు కూడా ఈ విధానాన్ని తట్టుకోగలవు. అయితే సిల్క్, జార్జెట్, క్యాష్మీర్ వంటి సున్నితమైన బట్టల విషయంలో ఇంట్లోనే ప్రయోగాలు చేయడం మంచిది కాదు. నీరు లేదా డిష్ సోప్ను తప్పుగా ఉపయోగిస్తే బట్ట ఆకృతి, రంగు లేదా ఫినిష్ దెబ్బతినే అవకాశం ఉంటుంది. బట్టపై ‘డ్రై క్లీన్ ఓన్లీ’ అని సూచన ఉంటే ప్రొఫెషనల్ డ్రై క్లీనింగ్ సేవలను ఆశ్రయించడం ఉత్తమం.