Chicken Bones : చికెన్ తిన్నాక ఎముకలను పారేస్తున్నారా.? వాటితో ఎన్నో ప్రయోజనాలు.!

Chicken Bones : తెల్ల మాంసం (వైట్ మీట్)గా పిలిచే చికెన్, ప్రపంచవ్యాప్తంగా అత్యంత ప్రజాదరణ పొందిన ఆహారాలలో ఒకటి. ఇది కేవలం రుచికరమైనది మాత్రమే కాదు, శరీరానికి కావలసిన లీన్ ప్రోటీన్‌ను అందిస్తూ కండరాల నిర్మాణానికి ఎంతో సహాయపడుతుంది. అయితే, చాలా ఇళ్లలో చికెన్ వండుకుని తిన్న తర్వాత ఎముకలను పనికిరాని వ్యర్థాలుగా భావించి చెత్తబుట్టలో వేయడమో లేదా కుక్కలకు పడేయడమో చేస్తుంటారు. కానీ, ఆ చికెన్ ఎముకలు ఎంతమాత్రం వ్యర్థం కావు. వాటిని పారేయడానికి బదులుగా, వంటగదిలో పోషక ఆహారంగా , తోటలోని మొక్కలకు అద్భుతమైన పోషకంగా ఎలా ఉపయోగించుకోవచ్చో ఈ కథనంలో తెలుసుకుందాం.

వంటగదిలో పోషకమైన ‘బోన్ బ్రాత్’ తయారీ

మిగిలిపోయిన చికెన్ ఎముకలను పారేయకుండా వాటితో అమూల్యమైన, పోషకాల గని అయిన ‘బోన్ బ్రాత్’ (ఎముకల సారం/సూప్) తయారు చేసుకోవచ్చు. ఇందుకోసం చికెన్ ఎముకలను క్యారెట్లు, ఉల్లిపాయలు, వెల్లుల్లి, సెలెరీ వంటి కూరగాయలతో కలిపి లైట్‌గా వేయించాలి. ఆ తర్వాత ఒక లోతైన పాత్రలో తగినన్ని నీరు పోసి, అందులో మిరియాల పొడి, కొద్దిగా వెనిగర్, ఉప్పు వేసి దాదాపు 6 నుండి 8 గంటల పాటు చిన్న మంట మీద మరిగించి వడకట్టాలి. ఇలా తయారైన సారాన్ని ఫ్రిజ్‌లో ఉంచుకుని, అవసరమైనప్పుడు సూప్‌లలో వాడుకోవచ్చు.

ప్రముఖ ఆరోగ్య పత్రిక ‘హెల్త్‌లైన్’ (Healthline) నివేదిక ప్రకారం.. ఈ బోన్ బ్రాత్ శరీరానికి పుష్కలంగా కొల్లాజెన్ , అమైనో ఆమ్లాలను అందిస్తుంది. అంతేకాకుండా, దీనిలోని జెలటిన్ జీర్ణవ్యవస్థను ఆరోగ్యంగా ఉంచడానికి, కీళ్ల నొప్పులను తగ్గించడానికి అద్భుతంగా సహాయపడుతుంది.

మొక్కల పెరుగుదలకు అద్భుతమైన సేంద్రియ ఎరువు

కోడి ఎముకలు మొక్కల ఎదుగుదలకు ఎంతగానో తోడ్పడతాయి. ప్రముఖ అంతర్జాతీయ పరిశోధనా వేదిక ‘Researchgate.net’ , వ్యవసాయ నిపుణుల మార్గదర్శకమైన ‘ది స్ప్రూస్ గార్డెనింగ్ గైడ్’ ప్రకారం.. కోడి ఎముకలలో లభించే నత్రజని (నైట్రోజన్), కాల్షియం, ఫాస్ఫరస్ వంటి ఖనిజాలు మొక్కలకు అద్భుతమైన, నెమ్మదిగా విడుదలయ్యే సేంద్రియ ఎరువుగా పనిచేస్తాయి. ఇవి మొక్కల వేర్లను బలోపేతం చేసి, ఆకుల సంఖ్యను, మొత్తం బయోమాస్‌ను గణనీయంగా పెంచుతాయి. ముఖ్యంగా దీనిలోని ఫాస్ఫరస్ మొక్కల కాండాలను దృఢపరిచి, ఎక్కువ పువ్వులు పూయడానికి దోహదపడుతుంది.

ఎరువు తయారీ విధానం:

చికెన్ ఎముకలను 15-20 నిమిషాల పాటు నీటిలో బాగా ఉడకబెట్టి శుభ్రం చేయాలి. ఆ తర్వాత వాటిని ఎండలో లేదా ఓవెన్‌లో బాగా ఆరబెట్టాలి. ఎముకలు పూర్తిగా ఎండిన తర్వాత, వాటిని మిక్సీలో వేసి మెత్తని పొడిగా (బోన్ మీల్) చేసుకోవాలి. మొక్కలు నాటేటప్పుడు లేదా కుండీలలోని మట్టిలో వారానికి ఒక టీస్పూన్ చొప్పున ఈ పొడిని కలిపితే మొక్కలు ఏపుగా పెరుగుతాయి.

పెంపుడు జంతువులకు కాల్షియం సప్లిమెంట్ (కానీ జాగ్రత్త!)

కోడి ఎముకలలో ఉండే కాల్షియం , ఫాస్ఫరస్ కుక్కలు, పిల్లుల వంటి పెంపుడు జంతువుల దంతాలను, ఎముకలను బలపరచడానికి ఉపయోగపడతాయి. అయితే, వండిన చికెన్ ఎముకలను వాటికి నేరుగా వేయడం అత్యంత ప్రమాదకరం. ఎందుకంటే ఎముకలు లోపల బోలుగా ఉండటం వల్ల నమిలేటప్పుడు అవి పదునైన ముక్కలుగా విరిగిపోతాయి. ఆ పదునైన భాగాలు పెంపుడు జంతువుల అన్నవాహిక, కడుపు లేదా ప్రేగులలో గుచ్చుకుని గాయాలు కావడం, అంతర్గత రక్తస్రావం జరగడం వంటి తీవ్రమైన ప్రాణాపాయ పరిస్థితులకు దారితీస్తాయి.

కాబట్టి, వీటికి సురక్షితమైన ప్రత్యామ్నాయం ఏంటంటే.. ఎముకలను బాగా ఉడకబెట్టి, ఎండబెట్టి, మెత్తగా నూరిన పొడిని మాత్రమే వాటి సాధారణ ఆహారంలో కొద్ది మోతాదులో కాల్షియం సప్లిమెంట్‌గా కలిపి తినిపించాలి.