Cleaning Hacks : బాత్రూమ్ బకెట్లు నల్లగా మారాయా.? ఈ ఒక్క చిట్కాతో కొత్తవాటిలా మెరిపించండి.!

Cleaning Hacks : సాధారణంగా ఇల్లంతా శుభ్రంగా ఉంచుకున్నప్పటికీ, చాలా మంది బాత్రూమ్‌ను, అందులో వాడే బకెట్లు, మగ్గులను సరిగ్గా పట్టించుకోరు. మనం నిత్యం స్నానానికి ఉపయోగించే బకెట్, మగ్గులపై కొన్ని రోజులకే తెల్లటి , పసుపు రంగు పొరలు, నీటి మరకలు , జిగట పాచి పేరుకుపోతుంటాయి. ఆరోగ్యపరంగా, పరిశుభ్రత పరంగా వీటిని క్రమం తప్పకుండా క్లీన్ చేసుకోవడం చాలా ముఖ్యం. అయితే ఈ మొండి మరకలను వదిలించడానికి ఖరీదైన, హానికరమైన కెమికల్స్ కొనాల్సిన అవసరం లేదు. మన వంటగదిలో దొరికే బేకింగ్ సోడాతోనే బకెట్లను కొత్తవాటిలా ఎలా మెరిపించవచ్చో ఈ కథనంలో తెలుసుకుందాం.

బకెట్లు, మగ్గులు అంత త్వరగా ఎందుకు మురికిగా మారతాయి?

బాత్రూమ్‌లోని ప్లాస్టిక్ బకెట్లు, మగ్గులపై తెల్లటి, పసుపు రంగు మరకలు ఏర్పడటానికి ప్రధాన కారణం మనం వాడే నీరే. ఉప్పు నీటిలో కాల్షియం, మెగ్నీషియం ఖనిజాలు ఎక్కువగా ఉంటాయి. ఇవి ప్లాస్టిక్ ఉపరితలంపై పేరుకుపోతాయి. దీనికి తోడు నిరంతరం పేరుకుపోయే సబ్బు నురగ, జిడ్డు, బకెట్లలో ఎక్కువసేపు నీటిని నిల్వ ఉంచడం వల్ల ఆ వస్తువులు నల్లగా, జిగటగా మారి దుర్వాసన వస్తుంటాయి.

క్లీనింగ్ ఏజెంట్‌గా బేకింగ్ సోడా విశిష్టత

బేకింగ్ సోడా (సోడియం బైకార్బోనేట్) కేవలం వంటలకే కాకుండా, ఇల్లు శుభ్రం చేయడానికి ఒక అద్భుతమైన, పర్యావరణ అనుకూలమైన పదార్థం. ప్రముఖ అంతర్జాతీయ పరిశోధనా వేదిక ‘రీసెర్చ్‌గేట్.నెట్’ (ResearchGate.net) అధ్యయనాల ప్రకారం.. బేకింగ్ సోడా అత్యంత సురక్షితమైన, సున్నితమైన సహజ క్లీనింగ్ ఏజెంట్‌గా పనిచేస్తుంది. ఇది ఒక తేలికపాటి క్షారంగా (Mild Alkali) పనిచేస్తూ మురికి, జిడ్డును సులభంగా కరిగిస్తుంది. ప్లాస్టిక్ వస్తువుల ఉపరితలానికి ఎలాంటి నష్టం కలిగించకుండా, మొండి మరకలను తొలగించి వాటికి మృదువైన మెరుపును అందిస్తుంది.

బేకింగ్ సోడాతో బకెట్లను శుభ్రం చేసే విధానం

ముందుగా రెండు నుండి మూడు టేబుల్ స్పూన్ల బేకింగ్ సోడా, వేడి నీరు, ఒక నిమ్మకాయ , స్క్రబ్బర్ సిద్ధం చేసుకోవాలి. మరకలు ఉన్న బకెట్‌లో వేడి నీటిని తీసుకుని, అందులో బేకింగ్ సోడా వేసి పూర్తిగా కరిగేలా కలపాలి. ఈ మిశ్రమాన్ని పది నుండి పదిహేను నిమిషాల పాటు అలాగే వదిలేయడం వల్ల మురికి లూజ్ అవుతుంది. ఆ తర్వాత స్క్రబ్బర్ సహాయంతో బకెట్ లోపల, బయట బాగా రుద్దాలి. మరకలు ఎక్కువగా ఉన్నచోట నిమ్మరసం అప్లై చేసి రుద్దితే మరింత సులభంగా శుభ్రమవుతాయి. చివరగా మంచి నీటితో కడిగేస్తే బకెట్ తళతళలాడుతుంది.

మొండి మరకల కోసం: బేకింగ్ సోడా – వెనిగర్ మ్యాజిక్

బకెట్లు లేదా మగ్గులు బాగా పాతబడిపోయి, మురికి ముదురు రంగులోకి మారితే బేకింగ్ సోడా , వెనిగర్ మిశమ్రం బెస్ట్ సొల్యూషన్. ఈ రెండు పదార్థాలు కలిసినప్పుడు జరిగే సహజ రసాయన చర్య వల్ల ఎంతటి మొండి జిగురైనా వదిలిపోతుంది. దీనికోసం ఒక గిన్నెలో కొద్దిగా బేకింగ్ సోడా, ఒక టేబుల్ స్పూన్ వెనిగర్ , వీలైతే కొద్దిగా నిమ్మరసం కలిపి చిక్కటి పేస్ట్‌లా తయారుచేసుకోవాలి. ఈ పేస్ట్‌ను మరకలు ఉన్న భాగాలపై బాగా పూసి అరగంట పాటు ఆరనివ్వాలి. ఆ తర్వాత స్క్రబ్బర్‌తో సున్నితంగా రుద్ది, గోరువెచ్చని నీటితో కడిగేస్తే జిగురు, దుర్వాసన పూర్తిగా మాయమవుతాయి.

ఎక్కువ కాలం శుభ్రంగా ఉంచుకోవడానికి చిట్కాలు

బాత్రూమ్ వస్తువులను ఎక్కువ కాలం పాటు నిగనిగలాడేలా ఉంచుకోవడానికి కొన్ని చిన్న చిన్న జాగ్రత్తలు పాటించడం అవసరం. ఇందుకోసం నెలకు ఒక్కసారైనా బేకింగ్ సోడా లేదా వెనిగర్‌తో బాత్రూమ్ వస్తువులను క్లీన్ చేస్తుండాలి. మీ ప్రాంతంలో ఉప్పు నీటి వాడకం ఎక్కువగా ఉంటే మాత్రం, వారానికి ఒకసారి తేలికగా కడగడం అలవాటు చేసుకోవడం మంచిది. అలాగే బకెట్లను నేరుగా తడి నేలపై ఉంచకుండా, ఏదైనా స్టాండ్‌పై బోర్లించడం వల్ల మురికి చేరదు. దీనితో పాటు వారానికి ఒకసారి బకెట్లను ఎండలో ఉంచడం వల్ల అందులోని బ్యాక్టీరియా నశించి, దుర్వాసనలు రాకుండా నివారించవచ్చు.