US: వర్జీనియా వర్శిటీలో కాల్పులు.. పలువురికి గాయాలు

అమెరికాలోని వర్జీనియా స్టేట్ యూనివర్సిటీ సమీపంలో కాల్పుల ఘటన కలకలం రేపింది. యూనివర్సిటీకి చెందిన క్వాడ్ అనెక్సెస్ ప్రాంతంలో పలువురిపై కాల్పులు జరిగాయి. ఈ ఘటనలో గాయపడిన వారిని సమీపంలోని ఆసుపత్రులకు తరలించారు. అయితే గాయాలు ప్రాణాపాయ స్థాయిలో లేవని యూనివర్సిటీ అధికారులు తెలిపారు.

వర్జీనియా స్టేట్ యూనివర్సిటీ క్వాడ్ అనెక్సెస్ సమీపంలోని బోయిస్సో స్ట్రీట్, థర్డ్ అవెన్యూ ప్రాంతంలో ఈ కాల్పులు జరిగినట్లు అధికారులు వెల్లడించారు. సమాచారం అందుకున్న వెంటనే వర్జీనియా స్టేట్ యూనివర్సిటీ పోలీసులు, చెస్టర్‌ఫీల్డ్ కౌంటీ పోలీసులు ఘటనాస్థలికి చేరుకుని సహాయక చర్యలు చేపట్టారు. ముందుజాగ్రత్త చర్యల్లో భాగంగా యూనివర్సిటీ క్యాంపస్‌ను లాక్‌డౌన్ చేశారు.

కాల్పుల్లో గాయపడిన వారిని స్థానిక ఆసుపత్రులకు తరలించినట్లు యూనివర్సిటీ తెలిపింది. అయితే ఎంతమంది గాయపడ్డారనే కచ్చితమైన సంఖ్యను అధికారులు వెంటనే వెల్లడించలేదు. గాయపడిన వారిలో ఎవరి పరిస్థితి కూడా ప్రాణాపాయంగా లేదని పేర్కొన్నారు. ఈ ఘటనలో ఒకరి కంటే ఎక్కువ మంది అనుమానితులు పాల్గొన్నట్లు యూనివర్సిటీ వెల్లడించింది. అయితే ఇప్పటివరకు పోలీసులు ఎవరినీ అరెస్టు చేయలేదు. అనుమానితుల గుర్తింపును కూడా అధికారులు వెల్లడించలేదు.

క్యాంపస్‌లో లాక్‌డౌన్

కాల్పుల ఘటన నేపథ్యంలో పోలీసులు ప్రజలను ఆ ప్రాంతానికి వెళ్లవద్దని సూచించారు. దర్యాప్తు కొనసాగుతున్నందున విద్యార్థులు, యూనివర్సిటీ సిబ్బంది, ఇతర క్యాంపస్ సభ్యులు చట్ట అమలు సంస్థల సూచనలను తప్పనిసరిగా పాటించాలని అధికారులు కోరారు. ‘‘పోలీసులు ఘటనాస్థలిలో ఉన్నారు. ప్రజలు ఆ ప్రాంతానికి దూరంగా ఉండాలి. క్యాంపస్‌లో లాక్‌డౌన్ కొనసాగుతోంది’’ అని వర్జీనియా స్టేట్ యూనివర్సిటీ పోలీసులు సోషల్ మీడియా వేదికగా వెల్లడించారు. కాల్పులకు దారితీసిన కారణాలపై ఇప్పటివరకు స్పష్టత రాలేదు. గాయపడిన వారి సంఖ్యను కూడా అధికారులు ధృవీకరించలేదు. ఘటనపై పోలీసులు దర్యాప్తు కొనసాగిస్తున్నారు. ఈ ఘటనకు సంబంధించి ఏదైనా సమాచారం ఉన్నవారు వర్జీనియా స్టేట్ యూనివర్సిటీ పోలీసులకు సమాచారం అందించాలని అధికారులు కోరారు.

 

pic.twitter.com/B31cnG8FV3

— Virginia State University (@VSU_1882) August 15, 2026