JD Vance:ఫ్రాన్స్‌లో జరుగుతున్న హింసాత్మక అల్లర్లు, నిరసనలపై అమెరికా ఉపాధ్యక్షుడు జేడీ వాన్స్ స్పందించారు. వెస్ట్రన్ దేశాల వలసలు, వైవిధ్య విధానాలపై తీవ్ర విమర్శలు చేశారు. వైవిధ్యం, కరుణ పేరుతో ఇతర ప్రాంతాల నుంచి ప్రజల్ని తమ దేశాల్లోకి తీసుకువచ్చిన పాశ్చాత్య దేశాల ఉదారవాదులు.. వారు సమాజంతో కలిసిపోతున్నారా అనే విషయాన్ని పట్టించుకోలేదని ఆరోపించారు.
సోషల్ మీడియాలో వేదిక ఎక్స్‌లో చేసిన పోస్టులో ఆయన ఫ్రాన్స్ పరిణామాలను ప్రస్తావించారు. ఈ పరిస్థితులు వస్తాయని ముందే హెచ్చరించినప్పటికీ, ఉదారవాదులు ఆ సూచనల్ని పట్టించుకోలేదని వ్యాఖ్యానించారు. ‘‘ఫ్రాన్స్‌లో మరిన్ని చారిత్రాత్మక కట్టడాలు తగలబడకముందే ఈ ఉన్మాదాన్ని ఆపాలని ప్రార్థిస్తున్నాను’’ అని తన పోస్ట్‌లో పేర్కొన్నారు. ఫ్రాన్స్ అందమైన దేశమని, అక్కడి చారిత్రక వారసత్వాన్ని కాపాడుకోవాల్సిన అవసరం ఉందని అన్నారు.
ఫ్రాన్స్ అల్లర్లను ఉటంకిస్తూ, దేశంలోని డెమోక్రాట్లపై కూడా జేడీ వాన్స్ ఆరోపణలు చేశారు. అమెరికన్లు ఫ్రాన్స్‌లో జరుగుతున్న పరిణామాలను గమనించాలని కోరారు. అమెరికా కాంగ్రెస్‌లోని డెమోక్రాట్లు కూడా తమ దేశానికి ఇలాంటి భవిష్యత్తునే కోరుకుంటున్నారని ఆరోపించారు.
ఫ్రాన్స్‌లో విద్యార్థి సమస్యలుగా మొదలైన నిరసనలు ఆ తర్వాత ధరల పెరుగుదల, ఆర్థిక అసమానతలు, ప్రభుత్వ వ్యయాలపై నిరసనగా మారాయి. కొద్ది రోజుల్లో ఫ్రాన్స్ అంతటా హింసాత్మక అల్లర్లు ప్రారంభమయ్యాయి. అల్లరి మూకలు వాహనాలను కాల్చడం, దుకాణాల్లో దొంగతనాలకు పాల్పడటం నిత్యకృత్యంగా మారింది. వారసత్వ భవనాలకు నిప్పు పెడుతున్నారు. పోలీసులను టార్గెట్ చేస్తూ దాడులకు పాల్పడుతున్నారు. ఈ అల్లర్ల వెనక వామపక్ష సంస్థలు, పార్టీలు ఉన్నాయని ప్రభుత్వం ఆరోపిస్తోంది.