అగ్ర రాజ్యం అమెరికాను మంచు తుఫాన్ గడగడలాడిస్తోంది. అనేక రాష్ట్రాల్లో మంచు తుఫాన్ దుప్పటి కప్పేసింది. ఇక న్యూయార్క్ నగరమైతే స్తంభించిపోయింది. విద్యుత్ సరఫరా నిలిచిపోయింది. దీంతో లక్షలాది కుటుంబాల్లో అంధకారం అలుముకుంది. ఈ నేపథ్యంలో అత్యవసర పరిస్థితి విధించారు.
ఇక మంచు తుఫాన్ కారణంగా దాదాపు 10 వేల విమాన సర్వీసులు రద్దయ్యాయి. దీంతో అత్యవసర ప్రయాణాలు నిలిచిపోవడంతో ప్రయాణికులు తీవ్ర ఇబ్బందులు పడుతున్నారు. తూర్పు, దక్షిణ రాష్ట్రాల్లో భారీ మంచు కారణంగా 10,000 కంటే ఎక్కువ విమానాలు రద్దు అయ్యాయి. టేనస్సీ, మిస్సిస్సిప్పి, టెక్సాస్, లూసియానా, కెంటుకీ, జార్జియా, వర్జీనియా, అలబామా వంటి ఇతర రాష్ట్రాల్లో కూడా ప్రజలు తీవ్ర ఇక్కట్లు ఎదుర్కొంటున్నారు. నిత్యవసర వస్తువులు దొరకక ఇబ్బంది పడుతున్నారు.
తుఫానులను చారిత్రాత్మకమైనవిగా అధ్యక్షుడు ట్రంప్ వర్ణించారు. దక్షిణ కరోలినా, వర్జీనియా, టేనస్సీ, జార్జియా, నార్త్ కరోలినా, మేరీల్యాండ్, అర్కాన్సాస్, కెంటుకీ, లూసియానా, మిసిసిపీ, ఇండియానా, వెస్ట్ వర్జీనియాలలో సమాఖ్య అత్యవసర విపత్తు ప్రకటనలను ఆమోదించారు. తుఫాన్ రాష్ట్రాలను పర్యవేక్షిస్తూనే ఉంటామన్నారు. ప్రజలు సురక్షితంగా ఉండాలని ట్రంప్ ట్రూత్ సోషల్ మీడియాలో పేర్కొన్నారు.