Trump-Jinping: సెప్టెంబర్ 24న వైట్‌హౌస్‌లో ట్రంప్‌తో జిన్‌పింగ్ భేటీ.. కీలక అజెండా ఇదేనా?

చైనా అధ్యక్షుడు జిన్‌పింగ్ వచ్చే వారం అమెరికాలో పర్యటించనున్నారు. సెప్టెంబర్ 24న వైట్‌హౌస్‌లో అమెరికా అధ్యక్షుడు ట్రంప్‌తో జిన్‌పింగ్ సమావేశం కానున్నారు. జిన్‌పింగ్ పర్యటన అంతర్జాతీయంగా అత్యంత ప్రాధాన్యత సంతరించుకుంది. గత మే నెలలో ట్రంప్ చైనాలో పర్యటించారు. అప్పుడే జిన్‌పింగ్‌ను అమెరికాకు ట్రంప్ ఆహ్వానించారు. ట్రంప్ ఆహ్వానం మేరకు వచ్చే వారం జిన్‌పింగ్ అమెరికాలో పర్యటిస్తున్నారు.

అజెండా ఇదే..

పర్యటనలో భాగంగా సెప్టెంబర్ 24న వైట్‌హౌస్‌లో కీలక భేటీ జరగనుంది. ఈ సమావేశంలో వాణిజ్యం, చైనా కార్ల దిగుమతులు, బోయింగ్ విమానాలు, తైవాన్, ఆర్టిఫిషియల్ ఇంటెలిజెన్స్ (AI), ఉక్రెయిన్ యుద్ధం, గాజా పరిస్థితులు, ఇరాన్ యుద్ధం సహా కీలక అంతర్జాతీయ అంశాలు చర్చకు వచ్చే అవకాశం ఉంది.

జిన్‌పింగ్‌తో జరిగే భేటీలో దాదాపు అన్ని అంశాలపై చర్చిస్తానని ట్రంప్ ఇప్పటికే వెల్లడించారు. అమెరికా-చైనా మధ్య సుంకాలు, సాంకేతిక ఆంక్షలు కొనసాగుతున్న నేపథ్యంలో ఈ భేటీ అత్యంత కీలకంగా మారింది. తైవాన్, ఇరాన్, రష్యా-చైనా సంబంధాలు వంటి అంశాలు కూడా ఇరు దేశాల మధ్య విభేదాలకు కారణమవుతున్నాయి. దాదాపు పదేళ్ల తర్వాత జిన్‌పింగ్ వైట్‌హౌస్‌కు రావడం ఇదే తొలిసారి కావచ్చని తెలుస్తోంది. మేలో ట్రంప్ చైనాలో పర్యటించినప్పుడు ఇద్దరు నేతలు చివరిసారిగా ప్రత్యక్షంగా సమావేశమయ్యారు.

చైనా కార్లపై భారీ సుంకాలు.. ట్రంప్ సమర్థన

ఇక చైనా నుంచి దిగుమతి అయ్యే కార్లపై అమెరికా విధిస్తున్న భారీ సుంకాలను ట్రంప్ సమర్థించారు. చైనా వాహనాలు అమెరికా మార్కెట్లోకి భారీగా ప్రవేశించకుండా తానే అడ్డుకున్నానని వ్యాఖ్యానించారు. చైనా కార్లపై ప్రస్తుతం 100 శాతం నుంచి 150 శాతం వరకు సుంకాలు ఉన్నట్లు ట్రంప్ పేర్కొన్నారు. యూరప్‌లో చైనా కార్ల కారణంగా స్థానిక ఆటోమొబైల్ పరిశ్రమ తీవ్రంగా దెబ్బతింటోందని వ్యాఖ్యానించారు. అయితే అమెరికాలోనే చైనా కంపెనీలు కార్లను తయారు చేసి, స్థానికులకు ఉద్యోగాలు కల్పిస్తే మాత్రం తాను అంగీకరించే అవకాశం ఉందని ట్రంప్ గతంలో సంకేతాలు ఇచ్చారు. అదే సమయంలో మెక్సికోలో తయారైన చైనా కార్లను అమెరికాకు ఎగుమతి చేయడాన్ని మాత్రం వ్యతిరేకిస్తున్నారు.

బోయింగ్ విమానాల కొనుగోలుపైనా చర్చ

ట్రంప్-జిన్‌పింగ్ భేటీలో బోయింగ్ విమానాల కొనుగోలు అంశం కూడా చర్చకు వచ్చే అవకాశం ఉంది. చైనాతో బోయింగ్ విమానాల కొనుగోలుపై ఒప్పందం కుదిరే అవకాశం ఉందా అని ట్రంప్‌ను ప్రశ్నించగా.. ప్రతి ఒప్పందాన్ని సాధించగలననే ధీమాను వ్యక్తం చేశారు. మేలో ట్రంప్ చైనా పర్యటన సందర్భంగా కుదిరిన ఆర్థిక అవగాహనల్లో భాగంగా అమెరికాలో తయారైన సుమారు 200 బోయింగ్ విమానాలను కొనుగోలు చేసేందుకు చైనా అంగీకరించినట్లు సమాచారం.

తైవాన్ అంశం

సెప్టెంబర్ 24 భేటీలో తైవాన్ అంశం అత్యంత సున్నితమైన అంశంగా మారే అవకాశం ఉంది. సమావేశానికి ముందు అమెరికా తైవాన్‌కు కొత్త ఆయుధ విక్రయాలకు ఆమోదం తెలిపితే భేటీని రద్దు చేసే అవకాశం ఉందని చైనా హెచ్చరించినట్లు వార్తలు వచ్చాయి. అమెరికాతో సంబంధాల్లో తైవాన్ తమకు ‘రెడ్ లైన్’ అని చైనా ఇప్పటికే స్పష్టం చేసింది. మేలో జరిగిన ట్రంప్-జిన్‌పింగ్ భేటీలోనూ ఈ అంశం కీలకంగా చర్చకు వచ్చింది. తైవాన్ అంశమే చైనా-అమెరికా సంబంధాల్లో అత్యంత ముఖ్యమైన సమస్య అని మే 15న జిన్‌పింగ్ ట్రంప్‌తో చెప్పినట్లు సమాచారం. ఈ విషయంలో తప్పిదాలు జరిగితే ఇరు దేశాల మధ్య ఘర్షణకు దారితీసే ప్రమాదం ఉందని కూడా ఆయన హెచ్చరించినట్లు తెలుస్తోంది. తైవాన్‌ను తమ భూభాగంలో భాగంగానే చైనా పరిగణిస్తోంది. అవసరమైతే బలప్రయోగం ద్వారా ద్వీపాన్ని తమ ఆధీనంలోకి తీసుకునే అవకాశాన్ని కూడా పూర్తిగా తోసిపుచ్చలేదు. అయితే సెప్టెంబర్ 24న జరగాల్సిన భేటీ రద్దయ్యే అవకాశాలను ట్రంప్ కొట్టిపారేశారు. జిన్‌పింగ్‌ను వైట్‌హౌస్‌కు రావాలని అమెరికా ఇప్పటికే ఆహ్వానించింది. అయితే పర్యటన తేదీ, ఇతర షరతులపై ఇరు దేశాల మధ్య చర్చలు కొనసాగుతున్నట్లు తెలుస్తోంది.

వాణిజ్యం, టెక్నాలజీపై ప్రధాన చర్చ

ట్రంప్-జిన్‌పింగ్ చర్చల్లో వాణిజ్యం మరోసారి ప్రధాన అంశంగా నిలవనుంది. ఇరు దేశాలు గత చర్చల్లో కుదిరిన సుంకాలు, ద్వైపాక్షిక వాణిజ్యానికి సంబంధించిన అవగాహనలను అమలు చేసే దిశగా పనిచేస్తున్నాయి. అమెరికాతో పరస్పర సుంకాలను తగ్గించే విషయంలో త్వరగా ఒప్పందం కుదరాలని చైనా కోరుకుంటోంది. అమెరికా మార్కెట్లో చైనా పెట్టుబడులు, మార్కెట్ యాక్సెస్, వ్యూహాత్మక సాంకేతికతలపై విధిస్తున్న ఆంక్షలు కూడా చర్చకు వచ్చే అవకాశం ఉంది.

ఏఐపై అమెరికా-చైనా పోటీ

ఆర్టిఫిషియల్ ఇంటెలిజెన్స్ కూడా ట్రంప్-జిన్‌పింగ్ చర్చల్లో కీలకంగా మారనుంది. విస్తృత ఆర్థిక చర్చల్లో భాగంగా ఏఐపై ప్రత్యేక సంభాషణను ఏర్పాటు చేసే అంశంపై అమెరికా, చైనా చర్చిస్తున్నట్లు సమాచారం. అధునాతన చిప్స్, ఏఐ మౌలిక వసతులకు చైనా ప్రాప్యతను పరిమితం చేసేందుకు అమెరికా ప్రయత్నిస్తోంది. మరోవైపు చైనా కంపెనీలు అత్యాధునిక ఏఐ రంగంలో అమెరికా సంస్థలకు పోటీగా ఎదుగుతున్నాయి. ఏఐలో అమెరికా ఆధిపత్యం కొనసాగడం అత్యంత ముఖ్యమని ట్రంప్ పేర్కొన్నారు. ఏఐ రంగంలో ఎవరు ఆధిపత్యం సాధిస్తే భవిష్యత్ పోటీలో వారిదే పైచేయి అవుతుందనే అభిప్రాయాన్ని ఆయన వ్యక్తం చేశారు.

ఉక్రెయిన్, గాజా, ఇరాన్ యుద్ధం కూడా..

అమెరికా, చైనా, వాటి భాగస్వామ్య దేశాలకు సంబంధించిన అంతర్జాతీయ ఘర్షణలు కూడా ఈ భేటీలో చర్చకు వచ్చే అవకాశం ఉంది. ఉక్రెయిన్ యుద్ధం మేలో జరిగిన ట్రంప్-జిన్‌పింగ్ చర్చల్లోనూ ప్రస్తావనకు వచ్చింది. గాజా, పశ్చిమాసియాలో నెలకొన్న పరిస్థితులు కూడా ఇరు దేశాల మధ్య చర్చకు రావచ్చు. ముఖ్యంగా ఇరాన్ యుద్ధం ట్రంప్-జిన్‌పింగ్ భేటీకి కీలక నేపథ్యంగా మారింది. ఇరాన్‌తో చైనా దౌత్య, ఆర్థిక సంబంధాలను కొనసాగిస్తోంది. మరోవైపు అమెరికా నేరుగా ఇరాన్ ఘర్షణలో భాగస్వామిగా ఉంది. ఈ నేపథ్యంలో ఇరాన్ విషయంలో చైనా దౌత్యపరమైన పాత్ర పోషించే అవకాశంపైనా ట్రంప్, జిన్‌పింగ్ చర్చించే అవకాశం ఉంది.

ఇరాన్‌కు చైనా నిఘా సమాచారం ఇచ్చిందా?

జోర్డాన్‌లోని అమెరికా, మిత్రదేశాల సైనిక స్థావరాలకు సంబంధించిన ఉపగ్రహ చిత్రాలను చైనాకు చెందిన సంస్థలు ఇరాన్‌కు అందించి ఉండవచ్చన్న ఆరోపణలపై కూడా ట్రంప్‌ను ప్రశ్నించారు. అయితే ఈ అంశంపై జిన్‌పింగ్‌ను నేరుగా ప్రశ్నిస్తారా లేదా అన్నదానిపై ట్రంప్ స్పష్టమైన సమాధానం ఇవ్వలేదు. చైనా నిఘా కార్యకలాపాలపై స్పందిస్తూ.. అమెరికా కూడా ఇతర దేశాల్లో ఇలాంటి నిఘా కార్యకలాపాలు నిర్వహిస్తుందని పోల్చుతూ వ్యాఖ్యలు చేశారు. దీంతో సెప్టెంబర్ 24న జరగనున్న ట్రంప్-జిన్‌పింగ్ భేటీ కేవలం వాణిజ్య చర్చలకే పరిమితం కాకుండా.. తైవాన్, ఏఐ, టెక్నాలజీ, ఉక్రెయిన్, ఇరాన్ వంటి అత్యంత సున్నితమైన అంశాలపై కీలక చర్చలకు వేదికగా మారే అవకాశం కనిపిస్తోంది.