Donald Trump: అమెరికా అధ్యక్షుడి రహస్య ప్రయాణం.. అసలు కారణం ఇదే!

Donald Trump: ఇజ్రాయెల్, ఇరాన్‌ మధ్య యుద్ధంతో ప్రారంభమైన ఉద్రిక్తతలు.. చివరకు ఇరాన్ వర్సెస్‌ అమెరికాగా మారిపోయాయి.. ఇప్పటికీ ఉద్రిక్తతలు కొనసాగుతూనే ఉన్నాయి.. అయితే, అమెరికా అధ్యక్షుడు డొనాల్డ్ ట్రంప్ గత నెలలో టర్కీ నుంచి బ్రిటన్‌కు ప్రయాణించే సమయంలో రహస్యంగా విమానం మార్చినట్లు వెల్లడించారు. సీక్రెట్ సర్వీస్, అమెరికా సైన్యం ఇచ్చిన భద్రతా సూచనల మేరకు తాను మరో విమానంలో ప్రయాణించాల్సి వచ్చిందని ట్రంప్ తెలిపారు. ఇరాన్ నుంచి తీవ్రమైన ముప్పు ఉందన్న ఆందోళనల నేపథ్యంలో ఈ నిర్ణయం తీసుకున్నట్లు అమెరికా మీడియా కథనాలు పేర్కొన్నాయి.

టర్కీలోని అంకారాలో కెమెరాల సమక్షంలో ట్రంప్ ఎయిర్ ఫోర్స్ వన్‌లో ఎక్కినప్పటికీ.. కొద్దిసేపటికే ఆయనను మరో చిన్న సైనిక విమానం C-32Aలోకి మార్చినట్లు సమాచారం. ఈ మార్పు జర్నలిస్టులకు తెలియకుండా అత్యంత రహస్యంగా చేపట్టారు. ఎయిర్ ఫోర్స్ వన్‌లో ఉన్న విలేకరులను కిటికీలు మూసి ఉంచాలని సీక్రెట్ సర్వీస్ సూచించినట్లు నివేదికలు వెల్లడించాయి. అధ్యక్షుడిపై లేదా ఆయన ప్రయాణిస్తున్న విమానంపై దాడి జరిగే అవకాశం ఉందన్న నిఘా సమాచారం కారణంగానే అదనపు భద్రతా చర్యలు చేపట్టినట్లు అమెరికా మీడియా తెలిపింది. ఈ విషయంపై ట్రంప్ మాట్లాడుతూ తనకు తరచూ బెదిరింపులు వస్తుంటాయని, భద్రతా సిబ్బంది ఇచ్చే సూచనలను తాను పాటిస్తానని చెప్పారు.

ఇరాన్‌ను తాను ఎందుకు నమ్మడం లేదనే విషయాన్ని కూడా ట్రంప్ ప్రస్తావించారు. ఇరాన్ పదేపదే అబద్ధాలు చెబుతోందని ఆరోపించిన ఆయన.. ఆ దేశాన్ని నమ్మే విషయంలో తాను చివరి వ్యక్తినని వ్యాఖ్యానించారు. తనకు ఉన్నత స్థాయి బెదిరింపులు వస్తుంటాయని, అయినప్పటికీ భద్రతా చర్యలను తేలికగా తీసుకోనని స్పష్టం చేశారు. ఈ ఘటనతో ట్రంప్ భద్రతకు సంబంధించిన చర్యలు మరోసారి చర్చనీయాంశంగా మారాయి. ఇరాన్‌తో అమెరికా మధ్య ఉద్రిక్తతలు కొనసాగుతున్న నేపథ్యంలో అధ్యక్షుడి ప్రయాణాల్లో భద్రతా వ్యవస్థలు ఎంత అప్రమత్తంగా వ్యవహరిస్తున్నాయో ఈ పరిణామం స్పష్టం చేస్తోంది.