అమెరికా అధ్యక్షుడు డొనాల్డ్ ట్రంప్ పాల్గొన్న ఓ రాజకీయ సభలో అనూహ్య ఘటన చోటుచేసుకుంది. లైంగిక నేరాలకు పాల్పడిన జెఫ్రీ ఎప్‌స్టీన్‌కు సంబంధించిన ఫైళ్లను విడుదల చేయాలంటూ టీషర్ట్ ధరించి నిరసన తెలిపిన ఓ వ్యక్తిపై ట్రంప్ మద్దతుదారులు దాడి చేశారు. అతడిని కొట్టడంతో పాటు బలవంతంగా సభ నుంచి బయటకు తీసుకెళ్లారు. ఈ ఘటనపై ట్రంప్ ఖండన వ్యక్తం చేయకపోగా.. నిరసనకారుడిని ‘లావుగా ఉన్న వ్యక్తి’ అంటూ ఎగతాళి చేశారు.
‘ది సండే గార్డియన్’ అక్టోబర్ 13న ప్రచురించిన కథనం ప్రకారం.. ట్రంప్ సభకు వచ్చిన ఓ వ్యక్తి ‘Release the Epstein Files’ (ఎప్‌స్టీన్ ఫైల్స్‌ను విడుదల చేయాలి) అని రాసి ఉన్న టీషర్ట్ ధరించాడు. ఈ క్రమంలో అక్కడున్న కొందరితో అతడికి వాగ్వాదం జరిగింది. ఆ తర్వాత ట్రంప్ మద్దతుదారులుగా భావిస్తున్న కొందరు అతడిపై దాడి చేసి, పిడిగుద్దులు గుద్దారు. భద్రతా సిబ్బంది జోక్యం చేసుకుని అతడిని సభ నుంచి బయటకు తీసుకెళ్లినట్లు తెలిపింది. అయితే దాడిలో అతడికి ఎంతవరకు గాయాలయ్యాయి? ఈ ఘటనకు సంబంధించి ఎవరినైనా అరెస్టు చేశారా? అనే వివరాలు స్పష్టంగా తెలియరాలేదు.
నిరసనకారుడిని బయటకు తీసుకెళ్తున్న సమయంలో ట్రంప్ వేదికపై నుంచి అతడిపై వ్యాఖ్యలు చేసినట్లు నివేదిక పేర్కొంది. రాజకీయ ప్రత్యర్థులు పంపిన వ్యక్తిగా అభివర్ణిస్తూ.. ‘‘వామపక్షవాదులు డబ్బులు ఇచ్చి వీళ్లను పంపిస్తున్నారు. మన దేశాన్ని నాశనం చేయాలని చూస్తున్నారు. వీళ్లు నీచులు’’ అని ట్రంప్ వ్యాఖ్యానించారు. అంతటితో ఆగకుండా నిరసనకారుడి శరీరాకృతిపై కూడా ట్రంప్ వ్యాఖ్యలు చేశారు. ‘‘అతను ఇంటికి వెళ్లి తన తల్లితో ఉండాలి. బరువు తగ్గాలి.. అతను లావుగా ఉన్నాడు’’ అంటూ ఎగతాళి చేశారు.
