Trump Praises India’s GDP Growth: భారత ఆర్థిక వ్యవస్థ పనితీరుపై అమెరికా అధ్యక్షుడు డొనాల్డ్ ట్రంప్ ప్రశంసలు కురిపించారు. తక్కువ వడ్డీ రేట్లతో పాటు 7 శాతం జీడీపీ వృద్ధిని సాధించడం భారత్ ఆర్థిక బలానికి నిదర్శనమని పేర్కొన్నారు. ఇదే తరహా విధానాన్ని అమెరికా కూడా అనుసరిస్తే తమ దేశం 14 నుంచి 20 శాతం వరకు జీడీపీ వృద్ధిని సాధించగలదని ఆయన అభిప్రాయపడ్డారు. నవంబర్ 20, 2026 శుక్రవారం వైట్హౌస్లోని జేమ్స్ బ్రాడీ ప్రెస్ బ్రీఫింగ్ రూమ్లో జరిగిన మీడియా సమావేశంలో ట్రంప్ ఈ వ్యాఖ్యలు చేశారు. ఈ సమావేశంలో అమెరికా ఉపాధ్యక్షుడు జేడీ వాన్స్, విదేశాంగ మంత్రి మార్కో రూబియో కూడా పాల్గొన్నారు.
భారత్ తక్కువ వడ్డీ రేట్లను కొనసాగిస్తూనే 7 శాతం ఆర్థిక వృద్ధిని నమోదు చేస్తోందని ట్రంప్ పేర్కొన్నారు. అమెరికా కూడా ఇదే విధానాన్ని అనుసరిస్తే భారీ వృద్ధిని సాధించగలదని అన్నారు. “భారత్ను చూడండి. అక్కడ వడ్డీ రేట్లు తక్కువగా ఉన్నాయి. 7 శాతం జీడీపీ వృద్ధి సాధిస్తున్నారు. మనం కూడా 14, 15 శాతం.. బహుశా 20 శాతం వరకు జీడీపీ వృద్ధిని సాధించగలం” అని ట్రంప్ వ్యాఖ్యానించారు. ప్రపంచంలోనే అత్యల్ప వడ్డీ రేట్లు అమెరికాలో ఉండాలని ఆయన అభిప్రాయపడ్డారు. ఇతర దేశాల ఆర్థిక విజయానికి అమెరికా కీలకంగా నిలుస్తోందని, అలాంటి అమెరికాకు తక్కువ వడ్డీ రేట్లు ఉండాలని పేర్కొన్నారు.
అమెరికా ఫెడరల్ రిజర్వ్ (Fed) అనుసరిస్తున్న వడ్డీ రేట్ల విధానంపై ట్రంప్ తీవ్ర అసంతృప్తి వ్యక్తం చేశారు. ఆర్థిక గణాంకాలు మెరుగ్గా ఉన్నప్పుడు వడ్డీ రేట్లు తగ్గించాల్సింది పోయి పెంచడం సరైన విధానం కాదని విమర్శించారు. అమెరికా ఆర్థిక వ్యవస్థలో పేదరికం చారిత్రక కనిష్ఠ స్థాయికి చేరుకుందని, దేశ చరిత్రలో ఎన్నడూ లేనంత మంది అమెరికన్లు ప్రస్తుతం ఉద్యోగాలు చేస్తున్నారని ట్రంప్ పేర్కొన్నారు. “పేదరికం రేటు చరిత్రలోనే అత్యల్ప స్థాయిలో ఉంది. మన దేశ చరిత్రలో ఎన్నడూ లేనంత మంది అమెరికన్లు ప్రస్తుతం పనిచేస్తున్నారు” అని ఆయన అన్నారు. అయినప్పటికీ ఫెడరల్ రిజర్వ్ వడ్డీ రేట్లను తగ్గించకపోవడం వల్ల దేశం మరింత వేగంగా అభివృద్ధి చెందే అవకాశాలు దెబ్బతింటున్నాయని ఆరోపించారు. ఫెడరల్ రిజర్వ్ రాజకీయ ప్రభావంతో పనిచేస్తోందని విమర్శించారు.
గతంలో ఫెడరల్ రిజర్వ్ ఛైర్మన్గా పనిచేసిన అలన్ గ్రీన్స్పాన్ను ట్రంప్ ప్రస్తావించారు. ఆర్థిక వ్యవస్థ బలంగా ఉన్నప్పుడు వడ్డీ రేట్లు తగ్గించడం సమంజసమని ఆయన అభిప్రాయపడ్డారు. “ఆర్థిక గణాంకాలు బాగున్నప్పుడు మన క్రెడిట్ సామర్థ్యం కూడా మెరుగుపడుతుంది. కానీ మనం అందుకు విరుద్ధంగా చేస్తున్నాం” అని ట్రంప్ వ్యాఖ్యానించారు. బలమైన ఆర్థిక వ్యవస్థ ఉన్నప్పుడు అధిక వడ్డీ రేట్లు కొనసాగించడం దేశ అభివృద్ధికి ఆటంకమని అన్నారు. వడ్డీ రేట్లు తగ్గిస్తే అమెరికా 15 నుంచి 20 శాతం వరకు జీడీపీ వృద్ధిని సాధించడంతో పాటు జాతీయ రుణాన్ని కూడా వేగంగా చెల్లించగలదని పేర్కొన్నారు. వడ్డీ రేట్లలో ప్రతి ఒక్క శాతం మార్పు అమెరికాకు సుమారు 650 బిలియన్ డాలర్ల ప్రభావాన్ని చూపుతుందని ట్రంప్ తెలిపారు.
అమెరికా ఆర్థిక వ్యవస్థను అడ్డుకునేందుకు ప్రయత్నాలు జరుగుతున్నప్పటికీ దేశం అంచనాలకు మించిన ఫలితాలను సాధిస్తోందని ట్రంప్ అన్నారు. తాను అమలు చేస్తున్న దిగుమతి సుంకాల (Tariffs) విధానం వల్ల అమెరికాలో వేలాది కొత్త ఫ్యాక్టరీలు ఏర్పాటు అవుతున్నాయని పేర్కొన్నారు. విదేశాల నుంచి దిగుమతులపై సుంకాలు విధించడం ద్వారా అమెరికాలోనే ఉత్పత్తి రంగాన్ని ప్రోత్సహిస్తున్నామని వివరించారు. తన ఆర్థిక విధానాలపై విమర్శలు వస్తున్నప్పటికీ అమెరికా ఆర్థిక వ్యవస్థ బలంగా ముందుకు సాగుతోందని ట్రంప్ స్పష్టం చేశారు.

