Trump: ముదురుతోన్న అమెరికా-కెనడా వాణిజ్య యుద్ధం.. కార్నీపై ట్రంప్ ఆగ్రహం

అమెరికా-కెనడా మధ్య వాణిజ్య యుద్ధం మరింత ముదురుతోంది. ఈ నేపథ్యంలో అమెరికా అధ్యక్షుడు డొనాల్డ్ ట్రంప్.. కెనడా ప్రధాని మార్క్ కార్నీపై తీవ్ర వ్యాఖ్యలు చేశారు. తనను ‘‘శత్రువు’’గా చిత్రీకరించడం కెనడా రాజకీయాలకు చాలా చెడ్డ పరిణామంగా మారుతుందని హెచ్చరించారు.

గురువారం ట్రూత్ సోషల్‌లో ట్రంప్ ఓ పోస్టు చేశారు. ‘‘ప్రధాని కార్నీ వంటి కెనడా రాజకీయ నాయకులు అధ్యక్షుడు డొనాల్డ్ ట్రంప్‌ను ‘శత్రువు’గా చూపించడం మంచిదే. అయితే ఆ దేశ ఆర్థిక వ్యవస్థ కుప్పకూలిన తర్వాత అది కెనడా రాజకీయాలకు చాలా చెడ్డదిగా మారుతుంది. కెనడా రాజకీయ నాయకుడికి ఇప్పటివరకు ఎదురైన వాటన్నింటికంటే ఇది దారుణంగా ఉంటుంది. వేచి చూడండి’’ అంటూ ట్రంప్ పేర్కొన్నారు.

కార్నీ ఘాటు కౌంటర్

మరోవైపు కెనడా ప్రధాని మార్క్ కార్నీ కూడా ట్రంప్ ప్రభుత్వంపై తీవ్రంగా మండిపడ్డారు. అమెరికా-కెనడా మధ్య వాణిజ్య ఉద్రిక్తతలు పెరుగుతున్న నేపథ్యంలో అమెరికా అధికారులు ‘‘సీరియస్‌గా వ్యవహరించడం ప్రారంభించాలి’’ అని సూచించారు.

ట్రంప్ విధించిన భారీ సుంకాలకు ప్రతీకారంగా కెనడా కూడా అమెరికా వస్తువులపై సుంకాలు విధించేందుకు సిద్ధమవుతోంది. ఈ నేపథ్యంలో అమెరికా అధికారులు కెనడాను అవమానించేలా వ్యాఖ్యలు చేయడాన్ని కార్నీ తప్పుబట్టారు. ‘‘అలాంటి వ్యాఖ్యలు వారి పదవికి తగినవి కావు’’ అని ఆయన వ్యాఖ్యానించినట్లు ది గార్డియన్ పేర్కొంది. ‘‘అమెరికన్లు మీమ్స్ చేయడం, ఎగతాళి చేయడం, కఠినంగా కనిపించేందుకు ప్రయత్నించడం ఆపి.. వాణిజ్యంపై చర్చలు జరపడం విషయంలో సీరియస్‌గా వ్యవహరించడం ప్రారంభించినప్పుడు మనం కూడా చర్చలు జరపవచ్చు’’ అని కార్నీ అన్నారు.

లేక్ ఒంటారియో పేరుపైనా వివాదం

ఇదిలా ఉంటే.. గత వారం ట్రంప్ మరో వివాదాస్పద నిర్ణయం తీసుకున్నారు. లేక్ ఒంటారియో పేరును ‘‘లేక్ అమెరికా’’గా మార్చాలని అమెరికా ఫెడరల్ ప్రభుత్వాన్ని ఆదేశిస్తూ ఎగ్జిక్యూటివ్ ఆర్డర్‌పై సంతకం చేశారు. అయితే ఈ నిర్ణయాన్ని కెనడా తీవ్రంగా వ్యతిరేకించింది.

అమెరికా-కెనడా మధ్య వాణిజ్య యుద్ధం వల్ల భారీ నష్టం జరిగే అవకాశం ఉందన్న ఆందోళనలను అమెరికా అధ్యక్షుడి అత్యంత సీనియర్ వాణిజ్య చర్చల ప్రతినిధి మాత్రం కొట్టిపారేశారు. ఈ వివాదం ‘‘మన కంటే కెనడాకే ఎక్కువ అత్యవసర సమస్య’’ అని వ్యాఖ్యానించారు.

50 శాతం సుంకాలతో మొదలైన వివాదం

అమెరికా-కెనడా మధ్య వాణిజ్య చర్చలు విఫలమైన వారం రోజులకుపైగా తర్వాత ఈ తాజా పరిణామాలు చోటుచేసుకున్నాయి. కెనడా నుంచి దిగుమతి అయ్యే సుమారు 20 బిలియన్ డాలర్ల విలువైన వస్తువులపై అమెరికా 50 శాతం సుంకాలు విధించింది. అమెరికాకు రెండో అతిపెద్ద వాణిజ్య భాగస్వామి అయిన కెనడా.. దీనికి ప్రతీకార చర్యలకు సిద్ధమైంది. సెప్టెంబర్ 8 నుంచి అమెరికా నుంచి దిగుమతి చేసుకునే 20 బిలియన్ డాలర్ల విలువైన వస్తువులపై ప్రతీకార సుంకాలు విధించనున్నట్లు కెనడా ప్రకటించింది.