Monkeypox: కలవరపెడుతున్న మంకీపాక్స్.. 24 గంటల్లో స్పెయిన్లో రెండో మరణం
Monkeypox: మంకీపాక్స్ కేసులు ప్రపంచాన్ని కలవర పెడుతున్నాయి. ఇప్పటికే 78 దేశాల్లో 18 వేలకు పైగా కేసులు నమోదు అయ్యాయి. ఎక్కువగా యూరోపియన్ దేశాల్లోనే వీటి తీవ్రత అధికంగా ఉంది. బ్రిటన్, స్పెయిన్, బెల్జియం, ఫ్రాన్స్, జర్మనీ తదితర యూరోపియన్ దేశాల్లో కేసుల సంఖ్య అత్యధికంగా ఉంది. ప్రపంచ ఆరోగ్య సంస్థ ప్రకారం.. యూరోపియన్ దేశాల్లో 70 శాతం కేసులు ఉన్నాయి. అమెరికాలో 25 శాతం కేసులు ఉన్నాయి. ఇదిలా ఉంటే ఇండిాయాలో కూడా మంకీపాక్స్ అనుమానిత కేసుల సంఖ్య పెరుగుతోంది. ఇప్పటికే దేశంలో నలుగురికి మంకీపాక్స్ సోకింది.
స్పెయిన్లో మంకీపాక్స్ కారణంగా తొలి మరణం సంభవించిన 24 గంటల్లోనే మరొకరు ప్రాణాలు కోల్పోయారు. యూరప్లోనే ఇది రెండవ మరణంగా నమోదైంది. ప్రస్తుతం ప్రపంచంలో మంకీపాక్స్తో తీవ్ర ఇబ్బందులు పడుతున్న దేశాల్లో స్పెయిన్ ఒకటి. ఆ దేశంలో ఇప్పటి వరకు 4298 మంది వ్యాధి బారిన పడ్డారు. ప్రస్తుతం ఉన్న సమాచారం ప్రకారం స్పెయిన్లో 3750 మంది మంకీపాక్స్ బాధితుల్లో 120 మంది చికిత్స పొందుతుండగా.. ఒకరు మరణించారు. ఆఫ్రికా ఖండం వెలువల సంభవించిన మూడో మరణంగా దీన్ని చెప్పవచ్చు. అంతకుముందు బ్రెజిల్లో మంకీపాక్స్తో ఓ వ్యక్తి మరణించాడు.
Monkeypox: స్పెయిన్ లో తొలి మంకీపాక్స్ మరణం.. యూరప్ లోనే మొదటి మరణం
ప్రపంచ ఆరోగ్య సంస్థ మంకీపాక్స్ వ్యాప్తిని గ్లోబల్ హెల్త్ ఎమర్జెన్సీగా ప్రకటించింది. డబ్ల్యూహెచ్వో చీఫ్ టెడ్రోస్ అధనామ్ ప్రకారం, చాలా ఇన్ఫెక్షన్లు ఐరోపాలో ఉన్నాయి. ఇక్కడ మే ప్రారంభం నుండి 70 శాతం కొత్త కేసులు కనుగొనబడ్డాయి. యూరప్లో బెల్జియం, స్పెయిన్లో జరిగిన రెండు రేవ్ పార్టీలే వివిధ దేశాల్లో మంకీపాక్స్ వ్యాపించడానికి కారణం అని అంతా భావిస్తున్నారు. ఆ పార్టీ తరువాత నుంచే యూరోపియన్ దేశాల్లో కేసులు వేగంగా వ్యాపిస్తున్నాయి. ఇదిలా ఉంటే యూరప్ దేశాలతో పాటు ప్రస్తుతం మిడిల్ ఈస్ట్ దేశాల్లో కూడా మంకీపాక్స్ కేసులు నమోదు అవుతున్నాయి. ఇటీవల గల్ఫ్ దేశాల నుంచి ఇండియాకు వచ్చిన ముగ్గురిలో మంకీపాక్స్ వైరస్ వెలుగులోకి వచ్చింది.