Smit Machchhar: ప్లైదుబాయ్ విమానాన్ని ప్రమాదం నుంచి రక్షించి, 180 మంది ప్రయాణికుల్ని కాపాడిన భారత పైలట్ స్మిత్ మచ్చర్‌పై ప్రపంచవ్యాప్తంగా ప్రశంసలు కురుస్తున్నాయి. ఇటీవల, దుబాయ్ నుంచి ఇజ్రాయిల్‌లోని టెల్ అవీవ్ వెళ్తున్న ఫ్లైదుబాయ్ FZ1073 విమానంలో కో-పైలట్, పైలట్ స్మిత్‌పై దాడి చేసి విమానాన్ని కూల్చాలనుకున్నాడు. అయితే, దాడిని తట్టుకుని, కాక్‌పిట్ డోర్ తెరవడంతో ప్రయాణికులు కో-పైలట్‌ను బంధించే అవకాశం లభించింది. చివరకు సౌదీ అరేబియాలోని ఒక చిన్న ఎయిర్‌పోర్టులో విమానం సురక్షితంగా ల్యాండైంది.
ఇదిలా ఉంటే, అమెరికా చట్టసభ కాంగ్రెస్‌లో స్మిత్ మచ్చర్‌కు ప్రత్యేక గుర్తింపు లభించింది. విమానంలోని ప్రయాణికుల్ని కాపాడేందుకు స్మిత్ చేసని ప్రయత్నాలను ప్రశంసిస్తూ అమెరికా ప్రతినిధుల సభలో తీర్మానం ప్రవేశపెట్టారు. రిపబ్లికన్, డెమోక్రటిక్ పార్టీలకు చెందిన సభ్యులు ఈ తీర్మానానికి మద్దతు ప్రకటించారు. న్యూజెర్సీకి చెందిన డెమొక్రటిక్ ప్రతినిధి జోష్ గోట్‌హైమర్ దీనిని ప్రవేశపెట్టగా, మైక్ మెక్‌కాల్, డాన్ బేకన్ సహ-ప్రతిపాదకులుగా ఉన్నారు. తీర్మానం స్మిత్ మచ్చర్‌తో పాటు ఫ్లైట్‌లోని ఆఫ్-డ్యూటీ పైలట్లు, క్యాబిన్ సిబ్బంది, ప్రయాణికుల ధైర్యాన్ని కూడా ప్రశంసించింది.
ఇప్పటికే స్మిత్ సాహసాన్ని అమెరికా అధ్యక్షుడు డొనాల్డ్ ట్రంప్, ఇజ్రాయిల్ ప్రధాని బెంజమిన్ నెతన్యాహూ కొనియాడారు. ప్రధాని నరేంద్రమోడీ స్మిత్‌తో వీడియో కాల్‌లో మాట్లాడారు. యూఏఈ క్రౌన్ ప్రిన్స్ స్మిత్‌ను ఆస్పత్రిలో పరామర్శించారు. ఈ ఘటనపై యూఏఈ, సౌదీ అరేబియాలు దర్యాప్తు జరుపుతున్నాయి. అమెరికా, ఇజ్రాయిల్‌లు సమాచారం ఇవ్వాలని కోరాయి. కోపైలట్‌ను ఒమన్‌కు చెందిన హమ్మామీగా గుర్తించారు. గాయపడిన స్మిత్ మచ్చర్ దుబాయ్‌లో చికిత్స పొందుతున్నారు. ఆయన క్రమంగా కోలుకుంటున్నట్లు భారత రాయబార కార్యాలయం తెలిపింది.