రష్యా తూర్పు ప్రాంతంలోని అమూర్లో భారీ అగ్ని ప్రమాదం, పేలుడు సంభవించింది. రష్యా-చైనా సంయుక్తంగా నిర్మిస్తున్న అమూర్ గ్యాస్ కెమికల్ కాంప్లెక్స్లో మంగళవారం ఈ ఘటన చోటుచేసుకుంది. ఈ ప్రమాదంలో ఏడుగురు ప్రాణాలు కోల్పోయారు. మృతుల్లో ఆరుగురు చైనా పౌరులు ఉన్నట్లు అధికారులు తెలిపారు. మరో తొమ్మిది మంది ఆచూకీ తెలియాల్సి ఉంది. ప్రమాదంలో గాయపడిన 152 మందికి చికిత్స అందించగా.. వారిలో 36 మందిని ఆస్పత్రులకు తరలించినట్లు రాయిటర్స్ నివేదించింది.
ప్రమాద సమయంలో ప్లాంట్లో భారీగా మంటలు చెలరేగాయి. పేలుడు ధాటికి పారిశ్రామిక సముదాయంలోని పలు ప్రాంతాల్లో మంటలు వ్యాపించాయి. దట్టమైన నల్లటి పొగ ఆకాశంలోకి ఎగసిపడిన దృశ్యాలు ప్రస్తుతం సోషల్ మీడియాలో వైరల్గా మారాయి. త్వరలో కార్యకలాపాలు ప్రారంభించేందుకు ప్లాంట్లో ప్రీ-కమిషనింగ్ పనులు జరుగుతున్న సమయంలో ఈ ప్రమాదం చోటుచేసుకుంది.
రష్యా-చైనా సంయుక్త ప్రాజెక్ట్
అమూర్ గ్యాస్ కెమికల్ కాంప్లెక్స్ రష్యాకు చెందిన పెట్రోకెమికల్ సంస్థ సిబుర్, చైనా ప్రభుత్వ ఆధీనంలోని చమురు, గ్యాస్ దిగ్గజం సినోపెక్ సంయుక్త ప్రాజెక్ట్. రష్యాలోని అమూర్ ప్రాంతంలో స్వోబోడ్నీ పట్టణానికి సమీపంలో ఈ కాంప్లెక్స్ను నిర్మిస్తున్నారు. ప్రాజెక్టు నిర్మాణం గరిష్ఠ స్థాయిలో ఉన్న సమయంలో సుమారు 30 వేల మంది కార్మికులు ఇందులో పనిచేసినట్లు సంస్థ వెల్లడించింది. దాదాపు 10 బిలియన్ డాలర్ల వ్యయంతో ఈ ప్రాజెక్టును చేపట్టారు. ప్రపంచంలోనే అతిపెద్ద పాలిథిలిన్, పాలీప్రొపైలిన్ తయారీ కేంద్రాల్లో ఒకటిగా దీన్ని అభివృద్ధి చేస్తున్నారు. పూర్తిస్థాయిలో కార్యకలాపాలు ప్రారంభమైన తర్వాత ఏడాదికి సుమారు 23 లక్షల టన్నుల పాలిథిలిన్, 4 లక్షల టన్నుల పాలీప్రొపైలిన్ ఉత్పత్తి చేయాలని లక్ష్యంగా పెట్టుకున్నారు.
ముడి పదార్థాలు ఎక్కడి నుంచి?
అమూర్ గ్యాస్ కెమికల్ కాంప్లెక్స్కు అవసరమైన ముడి పదార్థాలు సమీపంలోని అమూర్ గ్యాస్ ప్రాసెసింగ్ ప్లాంట్ నుంచి సరఫరా కానున్నాయి. ప్రాజెక్టు వివరాల ప్రకారం.. ఏడాదికి సుమారు 20 లక్షల టన్నుల ఈథేన్, మరో 15 లక్షల టన్నుల ఎల్పీజీని అమూర్ గ్యాస్ ప్రాసెసింగ్ ప్లాంట్ నుంచి AGCCకి తరలించనున్నారు. ముడి పదార్థాలను ప్రాసెస్ చేసి పాలిథిలిన్, పాలీప్రొపైలిన్ వంటి ప్లాస్టిక్ తయారీకి ఉపయోగించే పదార్థాలను ఉత్పత్తి చేయనున్నారు.
అమూర్ గ్యాస్ కెమికల్ కాంప్లెక్స్ సుమారు 325 హెక్టార్ల విస్తీర్ణంలో నిర్మిస్తున్నారు. ప్లాంట్ పూర్తిస్థాయిలో కార్యకలాపాలు ప్రారంభిస్తే దాదాపు 1,000 కొత్త ఉద్యోగాలు అందుబాటులోకి వస్తాయని అంచనా. ప్రాజెక్టు నిర్మాణం చాలా ఏళ్లుగా కొనసాగుతోంది. అమూర్ గ్యాస్ కెమికల్ కాంప్లెక్స్ కోసం ఇంజినీర్లకు శిక్షణ 2016లోనే ప్రారంభమైంది. 2024లో ప్లాంట్ కమిషనింగ్ దశలోకి ప్రవేశించింది. త్వరలో కార్యకలాపాలు ప్రారంభించేందుకు సన్నాహాలు జరుగుతున్న సమయంలోనే ఈ భారీ ప్రమాదం చోటుచేసుకుంది.
ప్రమాదంపై దర్యాప్తు
అమూర్ గ్యాస్ కెమికల్ కాంప్లెక్స్లో జరిగిన ఘోర అగ్ని ప్రమాదంపై రష్యా ఇన్వెస్టిగేటివ్ కమిటీ దర్యాప్తు ప్రారంభించింది. పారిశ్రామిక భద్రతా నిబంధనలు ఉల్లంఘించారా? ప్రమాదానికి అసలు కారణం ఏమిటి? అనే అంశాలపై అధికారులు విచారణ చేస్తున్నారు. ప్రమాదానికి దారితీసిన పరిస్థితులపై పూర్తి వివరాలు దర్యాప్తు అనంతరం వెల్లడయ్యే అవకాశం ఉంది.
Russia’s Amur Gas Chemical Complex, slated to become one of the largest in the world, suffered a sudden explosion and fire this morning, severely damaging the facility.
The plant had been scheduled to open soon and was undergoing pre-commissioning work ups. pic.twitter.com/HqzINwQuS5
— OSINTtechnical (@Osinttechnical) August 25, 2026