Putin: బ్రిక్స్ శిఖరాగ్ర సమావేశాల కోసం రష్యా అధ్యక్షుడు వ్లాదిమిర్ పుతిన్ ఢిల్లీకి వచ్చారు. శుక్రవారం ప్రధాని నరేంద్రమోడీతో ద్వైపాక్షిక చర్చల్లో పాల్గొన్నారు. బ్రిక్స్ బిజినెన్ సమ్మిట్ 2026లో పుతిన్ మాట్లాడుతూ, వెస్ట్రన్ దేశాలను ఎగతాళి చేశారు. ప్రపంచ ఆర్థిక వ్యవస్థలో బ్రిక్స్ ప్రాధాన్యం పెరుగుతోందని, G7 వాటా తగ్గుతోందని వ్యాఖ్యానించారు. ప్రపంచ ఆర్థిక ఉత్పత్తిలో G7 దేశాల వాటా సుమారు 18 శాతం కాగా, బ్రిక్స్ దేశాల వాటా దాదాపు 40 శాతంగా ఉందని పుతిన్ పేర్కొన్నారు. ‘‘వాళ్లను ‘గ్రూప్ ఆఫ్ సెవెన్’ అని ఎందుకు పిలుస్తారో నాకు తెలియదు’’ అంటూ జీ 7 పేరును ప్రస్తావించకుండానే పుతిన్ వ్యంగ్యాస్త్రాలు సంధించారు. ప్రపంచ ఆర్థిక వ్యవస్థలో బ్రిక్స్ తన బలాన్ని, ప్రభావాన్ని పెంచుకుంటోందని అన్నారు.
గతంలో రష్యా G8లో సభ్యదేశంగా ఉండేది. 2014లో క్రిమియాను రష్యా విలీనం చేసుకున్న తర్వాత గ్రూప్ నుంచి తొలగించారు. దీంతో ఇప్పుడు G7గా మారింది. G7 అనేది ప్రపంచంలోని అత్యంత అభివృద్ధి చెందిన ఆర్థిక వ్యవస్థలు కలిగిన ఏడు దేశాలైన కెనడా, ఫ్రాన్స్, జర్మనీ, ఇటలీ, జపాన్, యునైటెడ్ కింగ్డమ్, అమెరికా ఉన్నాయి.
ప్రపంచ ఆర్థిక వ్యవస్థల్లో బ్రిక్స్ అతిపెద్ద ఆర్థిక కూటమిగా మారిందని పుతిన్ అన్నారు. ప్రపంచ ఆర్థిక వ్యవస్థకు భారత్ అందిస్తున్న సహకారం కూడా పెరుగుతోందని అన్నారు. బ్రిక్స్ కూటమి వెలుపల ఉన్న దేశాలతోనూ సహకారం కొనసాగించేందుకుకు సిద్ధంగా ఉన్నామని పుతిన్ తెలిపారు. పశ్చిమ దేశాలు బ్రిక్స్ కూటమి ఎదుగుదలను అడ్డుకునేందుకు ప్రయత్నిస్తున్నాయని, తమ పాత ఆధిపత్యాన్ని సాధించేందుకు ప్రయత్నిస్తున్నాయని ఆరోపించారు. రష్యాపై వెస్ట్రన్ దేశాలు విధించిన ఆంక్షల్ని పుతిన్ విమర్శించారు. అన్యాయమైన ఆంక్షలు విధించినప్పటికీ రష్యా తన ఆర్థిక పనితీరును కొనసాగిస్తుందని చెప్పారు.
బ్రిక్స్లో మొత్తం 21 సభ్య దేశాలు..
గ్లోబల్ సౌత్ దేశాలకు ప్రాతినిధ్యం వహించేందుకు బ్రిక్స్ కూటమి విస్తరిస్తోంది. బ్రెజిల్, రష్యా, భారత్, చైనా, దక్షిణాఫ్రికా ప్రధాన సభ్య దేశాలుగా ఏర్పడిన ఈ కూటమిలో ప్రస్తుతం 11 పూర్తి సభ్య దేశాలు ఉన్నాయి. ఈజిప్ట్, ఇథియోపియా, ఇరాన్, సౌదీ అరేబియా, యునైటెడ్ అరబ్ ఎమిరేట్స్, ఇండోనేషియా తదితర దేశాలు పూర్తి సభ్యులుగా ఉన్నాయి. మరో 10 దేశాలు భాగస్వామ్య దేశాలుగా ఉన్నాయి.