Metaలో భారీ లేఆఫ్‌లు.. 16 వేల మంది ఉద్యోగులు ఇంటికే..!?

Meta Layoffs 2026: కృత్రిమ మేధస్సు (AI) ఎంట్రీతో వర్కింగ్‌ స్టైల్‌ మారిపోయింది.. చాలా రంగాల్లో ఉద్యోగాలపై ఏఐ తీవ్ర ప్రభావాన్నే చూపుతోంది.. ఇక, సోషల్ మీడియా దిగ్గజం Meta Platforms భారీ ఎత్తున ఉద్యోగాల కోతకు సిద్ధమవుతున్నట్లు అంతర్జాతీయ మీడియా నివేదికలు వెల్లడిస్తున్నాయి. కంపెనీ మొత్తం సిబ్బందిలో సుమారు 20 శాతం మందిని తొలగించే యోచనలో ఉందని సమాచారం. ఈ నిర్ణయం అమలైతే మెటా నుంచి దాదాపు 16,000 మంది ఉద్యోగులు ఇంటికి వెళ్లిపోవాల్సిన పరిస్థితి రావొచ్చు..

ప్రస్తుతం మెటా సంస్థలో దాదాపు 79,000 మంది ఉద్యోగులు పనిచేస్తున్నారు. అయితే, కృత్రిమ మేధస్సు (AI) మౌలిక సదుపాయాలపై భారీగా పెట్టుబడులు పెట్టడం, అలాగే AI సాంకేతికత వల్ల పనితీరు సామర్థ్యం పెరగడం కారణంగా కంపెనీ ఈ నిర్ణయాన్ని పరిశీలిస్తున్నట్లు తెలుస్తోంది. ఈ ప్రణాళికకు సంబంధించిన వివరాలను తెలిసిన ముగ్గురు వర్గాలు రాయిటర్స్‌కు వెల్లడించినట్లు నివేదికలు పేర్కొన్నాయి. అయితే ఉద్యోగాల కోత ఎప్పుడు ప్రారంభమవుతుందో, ఎంతమందిని తొలగిస్తారో.. ఇంకా అధికారికంగా ఖరారు కాలేదని సమాచారం. మెటా సంస్థ ఇప్పటివరకు ఈ విషయంపై అధికారికంగా స్పందించలేదు.

గతంలో కూడా భారీ లేఆఫ్‌లు
ఇది మెటా సంస్థలో మొదటిసారి జరుగుతున్న ఉద్యోగాల కోత కాదు. 2022 నవంబర్‌లో కంపెనీ దాదాపు 11,000 మంది ఉద్యోగులను తొలగించింది. ఇది ఆ సమయంలో మొత్తం ఉద్యోగుల్లో సుమారు 13 శాతం. అనంతరం 2023 ప్రారంభంలో మరో 10,000 ఉద్యోగాలను తగ్గిస్తున్నట్లు కంపెనీ ప్రకటించింది. ఆ కాలాన్ని కంపెనీ “Year of Efficiency”గా పేర్కొంది.

జనరేటివ్ AI పై జుకర్‌బర్గ్ దృష్టి
మెటా సీఈవో మార్క్‌ జుకర్‌బర్గ్‌ గత సంవత్సరం నుంచి కంపెనీని జనరేటివ్ AI రంగంలో మరింత బలంగా నిలబెట్టాలని ప్రయత్నిస్తున్నారు. ఈ నేపథ్యంలో అగ్రశ్రేణి AI పరిశోధకులను నియమించడానికి కంపెనీ భారీ వేతన ప్యాకేజీలు ప్రకటించినట్లు సమాచారం. అదే సమయంలో, 2028 నాటికి డేటా సెంటర్ల నిర్మాణానికి సుమారు 600 బిలియన్ డాలర్లు పెట్టుబడి పెట్టాలని మెటా ప్రణాళిక రూపొందించింది. AI ఆధారిత సాంకేతికతను అభివృద్ధి చేయడానికి కంపెనీ కొత్త టీమ్‌లను కూడా ఏర్పాటు చేస్తోంది. జుకర్‌బర్గ్ ఇటీవల మాట్లాడుతూ, “ఇంతకు ముందు పెద్ద టీమ్ అవసరమైన ప్రాజెక్టులను ఇప్పుడు ఒక ప్రతిభావంతుడైన వ్యక్తి మరియు AI సహాయంతో పూర్తి చేయడం సాధ్యమవుతోంది” అని పేర్కొన్నారు.

టెక్ రంగంలో పెరుగుతున్న ఉద్యోగాల కోత
ప్రస్తుతం టెక్నాలజీ రంగంలో ఇదే ధోరణి కొనసాగుతోంది. AI సాంకేతికత వేగంగా అభివృద్ధి చెందడంతో అనేక కంపెనీలు ఉద్యోగుల సంఖ్యను తగ్గిస్తున్నాయి. ఇటీవల అమెజాన్‌ కూడా దాదాపు 16,000 ఉద్యోగాలను తగ్గించనున్నట్లు ప్రకటించింది. అలాగే ఫిన్‌టెక్ కంపెనీ Block, Inc. కూడా తన సిబ్బందిలో గణనీయమైన కోతలను అమలు చేసింది. AI సాంకేతికతతో తక్కువ మంది ఉద్యోగులతోనే ఎక్కువ పనిని పూర్తి చేయగల సామర్థ్యం పెరుగుతుండటమే ఈ మార్పులకు ప్రధాన కారణంగా పరిశ్రమ నిపుణులు చెబుతున్నారు.