Japan Earthquake: మధ్య జపాన్‌లో ఆదివారం తెల్లవారుజామున భారీ భూకంపం సంభవించింది. ఈ భూకంపం కారణంగా ప్రజలు భయంతో భవనాల నుంచి బయటకు పరుగులు తీశారు. స్థానిక మీడియా కథనాల ప్రకారం, ఈ ఘటనలో కనీసం 22 మంది గాయపడ్డారు. జపాన్ వాతావరణ సంస్థ (JMA) భూకంప తీవ్రతను రిక్టర్ స్కేల్‌పై 5.7గా నమోదు చేయగా, అమెరికా జియోలాజికల్ సర్వే (USGS) దీని తీవ్రతను 5.5గా పేర్కొంది.
ఈ భూకంప ప్రభావం చాలా ప్రాంతాల్లో కనిపించింది. ఐచి ప్రిఫెక్చర్, హమామత్సు నగరం, మౌంట్ ఫుజి ఉన్న యమనాషి ప్రిఫెక్చర్, అలాగే గిఫు ప్రాంతాల్లో ప్రకంపనలు నమోదయ్యాయి. జపాన్‌కు చారిత్రక ప్రాధాన్యం ఉన్న పురాతన రాజధానులైన క్యోటో, నారా నగరాల్లో కూడా భూమి కంపించింది. జపాన్ టెలివిజన్ ఛానళ్లలో ప్రసారమైన దృశ్యాల్లో దుకాణాల అద్దాలు పగిలి రోడ్లపై చెల్లాచెదురుగా పడిపోయినట్లు కనిపించింది. భవనాల నుంచి బయటకు వెళ్లేందుకు ప్రయత్నించిన సమయంలో కొందరు మెట్లపై నుంచి పడిపోవడంతో గాయపడినట్లు సమాచారం.
స్థానిక కాలమానం ప్రకారం ఉదయం 1.04 గంటలకు భూకంపం సంభవించింది. దీని కేంద్రం షిజుఒకా ప్రిఫెక్చర్‌లో సుమారు 40 కిలోమీటర్ల లోతులో ఉన్నట్లు అధికారులు తెలిపారు. అధికారిక భూకంప అంచనాల ప్రకారం, అత్యంత తీవ్రమైన ప్రకంపనలు ఐచి ప్రాంతంలో నమోదయ్యాయి. అయితే, భూకంప కేంద్రానికి దూరంగా ఉన్న జపాన్ రాజధాని టోక్యోలో ఈ ప్రకంపనలు పెద్దగా లేవు.
భద్రతా చర్యగా ప్రభావిత ప్రాంతాల్లో షింకాన్సెన్ బుల్లెట్ రైళ్లను తక్కువ వేగంతో నడిపారు. భూకంపాల కారణంగా రైల్వే ట్రాక్‌లు దెబ్బతినే అవకాశం ఉండటంతో అధికారులు ముందుజాగ్రత్త చర్యలు తీసుకున్నారు. ప్రపంచంలో అత్యంత భూకంపాలకు గురయ్యే ప్రాంతాల్లో జపాన్ ఒకటి. భౌగోళికంగా అత్యంత క్రియాశీల భూకంప మండలంలో ఉండటంతో అక్కడ తరచూ భూకంపాలు సంభవిస్తుంటాయి.