Netanyahu vs Gadi Eisenkot: సిగ్గుచేటు.. రామ్, జాయింట్ లిస్ట్ పార్టీలపై నెతన్యాహు ఆగ్రహం..

Netanyahu vs Gadi Eisenkot: ఇజ్రాయెల్ రాజకీయాల్లో ప్రభుత్వ ఏర్పాటుపై ఉత్కంఠ కొనసాగుతోంది. అరబ్ మెజారిటీ పార్టీలైన రామ్ (Ra’am), జాయింట్ లిస్ట్ (Joint List) మద్దతుతో ప్రభుత్వం ఏర్పాటు చేసేందుకు ప్రతిపక్ష నేత గాడి ఐసెన్‌కోట్ ప్రయత్నిస్తుండటంపై ప్రధానమంత్రి బెంజమిన్ నెతన్యాహు తీవ్ర అభ్యంతరం వ్యక్తం చేశారు. ఈ రెండు పార్టీల మద్దతుతో ఏర్పడే ప్రభుత్వాన్ని ప్రమాదకరమైన ప్రభుత్వంగా అభివర్ణించారు. సోషల్ మీడియా వేదిక ఎక్స్‌లో స్పందించిన నెతన్యాహు.. రామ్, జాయింట్ లిస్ట్ పార్టీలను ఉగ్రవాదానికి మద్దతు ఇచ్చేవిగా పేర్కొంటూ, వాటి మద్దతుతో ప్రభుత్వం ఏర్పాటు చేయడం సరికాదని వ్యాఖ్యానించారు.

“సిగ్గుచేటు! ఉగ్రవాదానికి మద్దతు ఇచ్చేవారైన రామ్, జాయింట్ లిస్ట్ పార్టీలతో కలిసి ప్రమాదకరమైన ప్రభుత్వాన్ని ఏర్పాటు చేయకూడదు” అని పోస్టు చేశారు. అక్టోబర్ 27న జరిగిన ఇజ్రాయెల్ ఎన్నికల్లో ఏ పార్టీకి స్పష్టమైన మెజారిటీ రాకపోవడంతో ప్రభుత్వ ఏర్పాటుపై రాజకీయ చర్చలు కొనసాగుతున్నాయి.

గాడి ఐసెన్‌కోట్‌కు ప్రభుత్వ ఏర్పాటుకు అవకాశం

ఇటీవల జరిగిన ఎన్నికల్లో నెతన్యాహు నేతృత్వంలోని లికుడ్ కూటమికి 53 స్థానాలు లభించాయి. మరోవైపు గాడి ఐసెన్‌కోట్ నేతృత్వంలోని యషార్ కూటమి 48 స్థానాలు సాధించింది. అయితే, ఎన్నికల తర్వాత ప్రభుత్వ ఏర్పాటుకు మద్దతు తెలిపిన ఎంపీల సంఖ్య ఆధారంగా ఐసెన్‌కోట్‌కు అవకాశం లభించింది. ఇజ్రాయెల్ అధ్యక్షుడు ఐజాక్ హెర్జోగ్ నవంబర్ 8న ఐసెన్‌కోట్‌కు ప్రభుత్వ ఏర్పాటుకు అధికారికంగా ఆహ్వానం అందించారు. ఆయనకు 67 మంది పార్లమెంట్ సభ్యుల మద్దతు లభించగా, నెతన్యాహుకు 46 మంది సభ్యుల మద్దతు మాత్రమే లభించింది. ఈ మద్దతులో అరబ్ రాజకీయ పార్టీలైన రామ్, జాయింట్ లిస్ట్ కీలక పాత్ర పోషించాయి. ఈ రెండు పార్టీలకు కలిపి 19 స్థానాలు ఉన్నాయి.

ప్రభుత్వ ఏర్పాటుకు 28 రోజుల గడువు

ఇజ్రాయెల్ పత్రిక హారెట్జ్ కథనం ప్రకారం, ఐసెన్‌కోట్‌కు కొత్త ప్రభుత్వాన్ని ఏర్పాటు చేసేందుకు తొలుత 28 రోజుల సమయం ఇచ్చారు. ఈ సమయంలో వివిధ రాజకీయ పార్టీలతో చర్చలు జరిపి, పార్లమెంట్‌లో మెజారిటీ మద్దతును నిరూపించాల్సి ఉంటుంది. డిసెంబర్ 6లోపు ప్రభుత్వాన్ని ఏర్పాటు చేసి విశ్వాస పరీక్షకు సిద్ధం చేయలేకపోతే, చర్చలు పురోగతిలో ఉన్నాయని భావించిన సందర్భంలో అధ్యక్షుడు మరో 14 రోజుల గడువు ఇవ్వవచ్చని నివేదిక పేర్కొంది. అలా జరిగితే తుది గడువు డిసెంబర్ 20 వరకు పొడిగించే అవకాశం ఉంటుంది.

ఐసెన్‌కోట్‌కు 67 మంది ఎంపీల మద్దతు ఎలా లభించింది?

ఐసెన్‌కోట్‌కు మద్దతు తెలిపిన 67 మంది ఎంపీల వివరాలు ఇలా ఉన్నాయి.

యషార్ కూటమి, టుగెదర్, ది డెమోక్రాట్స్, ఇజ్రాయెల్ బీటెను పార్టీలతో కూడిన ప్రతిపక్ష కూటమి – 48 స్థానాలు
రామ్ (Ra’am)- 8 స్థానాలు
జాయింట్ లిస్ట్ (Joint List) – 11 స్థానాలు
ఇలా మొత్తం 67 మంది ఎంపీల మద్దతు ఐసెన్‌కోట్‌కు లభించింది.

మరోవైపు, నెతన్యాహు కూటమికి ఎన్నికల్లో 53 స్థానాలు వచ్చినప్పటికీ, ప్రభుత్వ ఏర్పాటుకు మద్దతు తెలిపిన ఎంపీల సంఖ్య 46కే పరిమితమైంది. యునైటెడ్ తోరా జుడాయిజం (UTJ) పార్టీకి చెందిన ఏడుగురు సభ్యులు నెతన్యాహుకు మద్దతు ప్రకటించకపోవడంతో ఈ పరిస్థితి ఏర్పడింది.

అరబ్ పార్టీల మద్దతుపై రాజకీయ వివాదం

ప్రభుత్వ ఏర్పాటులో రామ్, జాయింట్ లిస్ట్ పార్టీల మద్దతు కీలకంగా మారడంతో ఇజ్రాయెల్ రాజకీయాల్లో కొత్త వివాదం మొదలైంది. ఈ పార్టీల మద్దతుతో ప్రభుత్వం ఏర్పాటు చేయడాన్ని నెతన్యాహు తీవ్రంగా వ్యతిరేకిస్తున్నారు. మరోవైపు ఐసెన్‌కోట్ తనకు లభించిన పార్లమెంటరీ మద్దతును ప్రభుత్వ ఏర్పాటుకు అవసరమైన స్థిరమైన కూటమిగా మార్చేందుకు ప్రయత్నిస్తున్నారు. ఇజ్రాయెల్ పార్లమెంట్ అయిన క్నెసెట్ లో మొత్తం 120 స్థానాలు ఉన్నాయి. ప్రభుత్వం ఏర్పాటుకు కనీసం 61 మంది సభ్యుల మద్దతు అవసరం. ప్రస్తుతం ప్రధాన ప్రశ్న ఐసెన్‌కోట్‌కు లభించిన 67 మంది ఎంపీల మద్దతు ప్రభుత్వ ఏర్పాటుకు, విశ్వాస పరీక్షలో విజయానికి సరిపోతుందా అన్నదే. రాబోయే రోజుల్లో వివిధ పార్టీల మధ్య జరిగే చర్చలు ఇజ్రాయెల్ తదుపరి ప్రభుత్వ స్వరూపాన్ని నిర్ణయించనున్నాయి.