Donald Trump: ట్రంప్ కుమార్తెను చంపేందుకు కుట్ర!.. ఖాసిం సులేమానీ మరణానికి ఐఆర్‌జిసి ప్రతీకార ప్లాన్

అమెరికా మాజీ అధ్యక్షుడు డొనాల్డ్ ట్రంప్ కుమార్తె ఇవాంకా ట్రంప్ పై హత్యాయత్నానికి సంబంధించిన సంచలన వివరాలు వెలుగులోకి వచ్చాయి. ఇరాన్‌కు చెందిన ఇస్లామిక్ రివల్యూషనరీ గార్డ్ కార్ప్స్ (IRGC)తో సంబంధాలు ఉన్నట్టు భావిస్తున్న ఒక ఉగ్రవాది, ఇవాంకా ట్రంప్‌ను హత్య చేయడానికి కుట్ర పన్నినట్లు అమెరికా భద్రతా సంస్థలు వెల్లడించాయి.

అమెరికా మీడియా కథనాల ప్రకారం, అరెస్టు చేయబడిన వ్యక్తి ఇరాక్‌కు చెందిన 32 ఏళ్ల మహమ్మద్ బాకర్ సాద్ దావూద్ అల్-సాదీగా గుర్తించారు. అతడు ఇరాన్ అగ్ర సైనిక కమాండర్ Qasem Soleimani మరణానికి ప్రతీకారం తీర్చుకోవాలని భావించినట్లు సమాచారం. 2020లో అమెరికా డ్రోన్ దాడిలో ఖాసిం సులేమానీ హతమయ్యాడు. ఆ ఆపరేషన్‌కు అప్పటి అధ్యక్షుడు డొనాల్డ్ ట్రంప్ ఆదేశాలు ఇచ్చారు. అప్పటి నుంచి ట్రంప్ కుటుంబాన్ని లక్ష్యంగా చేసుకోవాలని అల్-సాదీ నిర్ణయించుకున్నట్లు దర్యాప్తులో వెల్లడైంది.

భద్రతా సంస్థలు తెలిపిన వివరాల ప్రకారం, నిందితుడు ఇవాంకా ట్రంప్ ఫ్లోరిడాలోని విలాసవంతమైన నివాసానికి సంబంధించిన బ్లూప్రింట్లు, భద్రతా వివరాలు సేకరించాడు. కొంతకాలంగా ఆమె ఇంటి చుట్టుపక్కల రెక్కీ నిర్వహించినట్లు కూడా అధికారులు గుర్తించారు. ఈ కేసుపై మాజీ ఇరాకీ మిలిటరీ అధికారి ఆంటిఫాద్ కన్బార్ స్పందిస్తూ, “ఖాసిం సులేమానీ మరణం తర్వాత అల్-సాదీ తీవ్ర ఆగ్రహంతో ఉండేవాడు. ట్రంప్ కుటుంబంపై ప్రతీకారం తీర్చుకోవాలని బహిరంగంగానే మాట్లాడేవాడు” అని వెల్లడించారు.

అమెరికా భద్రతా సంస్థలు ప్రస్తుతం ఈ కుట్ర వెనుక ఉన్న అంతర్జాతీయ సంబంధాలపై దర్యాప్తు కొనసాగిస్తున్నాయి. మరోవైపు ట్రంప్ కుటుంబ భద్రతను మరింత కట్టుదిట్టం చేసినట్లు సమాచారం.