Hantavirus: హంటావైరస్ అనేది ప్రధానంగా ఎలుకల ద్వారా మనుషులకు సోకే వైరస్. ఎలుకల మూత్రం, మలం, లాలాజలం ద్వారా ఈ వైరస్ వ్యాపిస్తుంది. అవి ఆరిపోయి గాలిలో కలిసినప్పుడు వాటిని పీల్చడం వల్ల మనుషులకు సంక్రమిస్తుంది. ఈ వైరస్ రెండు రకాల తీవ్రమైన అనారోగ్యాలను కలిగిస్తుంది. ఒకటి ఊపిరితిత్తులను ప్రభావితం చేసే హంటావైరస్ పల్మనరీ సిండ్రోమ్ (HPS), మరొకటి మూత్రపిండాలను ప్రభావితం చేసే హెమరేజిక్ ఫీవర్ విత్ రీనల్ సిండ్రోమ్ (HFRS). అయితే, కోవిడ్-19తో పోలిస్తే హంటావైరస్ వ్యాప్తి చాలా భిన్నంగా ఉంటుంది. కరోనా వైరస్ ఒకరి నుంచి మరొకరికి వేగంగా వ్యాపించగా, హంటావైరస్ సాధారణంగా వ్యక్తి నుంచి వ్యక్తికి వ్యాపించదు. కేవలం “ఆండెస్ స్ట్రెయిన్” అనే ప్రత్యేక రకం మాత్రమే చాలా దగ్గర సంబంధాల ద్వారా సంక్రమించే అవకాశం ఉందని నిపుణులు చెబుతున్నారు. అందువల్ల ఇది కరోనా తరహాలో ప్రపంచవ్యాప్తంగా వేగంగా వ్యాపించే ప్రమాదం చాలా తక్కువగా భావిస్తున్నారు.
ప్రస్తుతం ప్రపంచంలో ఎక్కడా హంటావైరస్కు ఆమోదించబడిన వ్యాక్సిన్ అందుబాటులో లేదు. ప్రతి సంవత్సరం ప్రపంచవ్యాప్తంగా 60 వేల నుంచి లక్ష మంది వరకు ఈ వైరస్ బారిన పడుతున్నప్పటికీ, వ్యాక్సిన్ అభివృద్ధి ఇంకా ప్రారంభ దశలోనే ఉంది. అమెరికాకు చెందిన Moderna సంస్థ mRNA సాంకేతికత ఆధారంగా హంటావైరస్ వ్యాక్సిన్ అభివృద్ధిపై పనిచేస్తోంది. దక్షిణ కొరియాలోని కొరియా యూనివర్సిటీ వ్యాక్సిన్ ఇన్నోవేషన్ సెంటర్తో కలిసి ఈ పరిశోధనలు కొనసాగుతున్నాయి. ఎలుకలపై చేసిన ప్రయోగాల్లో ఈ వ్యాక్సిన్ ఆశాజనక ఫలితాలు చూపించినప్పటికీ, ఇది ఇంకా ప్రీ-క్లినికల్ దశలోనే ఉంది. మానవులపై పరీక్షలు ఇంకా ప్రారంభం కాలేదు. ముఖ్యంగా ఈ వ్యాక్సిన్ HFRS స్ట్రెయిన్పై పనిచేస్తుండగా, ప్రస్తుతం ఆందోళనకు కారణమైన ఆండెస్ స్ట్రెయిన్పై ఇంకా స్పష్టత లేదు.
హంటావైరస్ లక్షణాలు మొదట్లో సాధారణ ఫ్లూ లక్షణాల్లా కనిపిస్తాయి. జ్వరం, అలసట, తలనొప్పి, కండరాల నొప్పులు ప్రారంభ లక్షణాలు. నాలుగు నుంచి పది రోజుల తర్వాత శ్వాస తీసుకోవడంలో ఇబ్బంది, ఊపిరితిత్తుల్లో ద్రవం చేరడం వంటి తీవ్రమైన సమస్యలు తలెత్తుతాయి. ముఖ్యంగా HPS మరణాల రేటు సుమారు 40 శాతం వరకు ఉండటం ఆందోళన కలిగిస్తోంది. అయితే, ఇటీవల ఎంవి హోండియస్ క్రూయిజ్ షిప్లో మొత్తం 11 హంటావైరస్ కేసులు నమోదయ్యాయి. ఒక డచ్ దంపతులు, ఒక జర్మన్ పర్యాటకుడు సహా ముగ్గురు మరణించారు. అనంతరం ప్రయాణికులను వారి దేశాలకు పంపించి క్వారంటైన్లో ఉంచారు. అర్జెంటీనాలో ఈ వైరస్ ఇప్పటికే ఉండటంతో, అక్కడే కొంతమందికి ముందుగా సంక్రమించి ఉండొచ్చని నిపుణులు అనుమానిస్తున్నారు.
హంటావైరస్ మహమ్మారిగా మారే అవకాశాలు చాలా తక్కువగా ఉన్నాయని WHO, ECDC సహా పలు అంతర్జాతీయ సంస్థలు స్పష్టం చేస్తున్నాయి. అయితే అప్రమత్తత మాత్రం తప్పనిసరి అంటున్నారు ఆరోగ్య నిపుణులు. ఎలుకల నుంచి దూరంగా ఉండటం, పరిశుభ్రత పాటించడం, లక్షణాలు కనిపిస్తే వెంటనే వైద్యులను సంప్రదించడం ద్వారా ప్రమాదాన్ని తగ్గించవచ్చని సూచిస్తున్నారు. కోవిడ్-19 మహమ్మారి తర్వాత ప్రపంచం నేర్చుకున్న పెద్ద పాఠం ఏమిటంటే, ముందుగానే వ్యాక్సిన్ పరిశోధనలపై పెట్టుబడులు పెట్టాల్సిన అవసరం. అదే దిశగా ఇప్పుడు హంటావైరస్పై కూడా ప్రపంచవ్యాప్తంగా పరిశోధనలు వేగవంతమవుతున్నాయి.