Social Media: చిన్న పిల్లలపై సామాజిక మాధ్యమాల ప్రభావాన్ని అరికట్టేందుకు ఆస్ట్రేలియా సర్కార్ కీలక నిర్ణయం తీసుకుంది. 16 ఏళ్ల లోపు పిల్లలు సోషల్ మీడియాను వినియోగించకుండా ఓ చట్టం తీసుకు వచ్చింది. ఇందుకు సంబంధించిన బిల్లుకు ఆస్ట్రేలియా ప్రతినిధుల సభ ఈరోజు (బుధవారం) ఆమోదం తెలిపింది. ఇక, దీనికి సెనెట్‌ గ్రీన్ సిగ్నల్ ఇస్తే చాలు అది చట్టరూపం దాల్చుతుంది. కాగా, ఇవాళ ఈ బిల్లును సభలో ప్రవేశ పెట్టగా 102 ఓట్లతో ఆమోదం లభించింది. మెజార్టీ పార్టీలు దీనికి అనుకూలంగా ఓటు వేశాయి. సభలో 13 మంది మాత్రం ఈ బిల్లును వ్యతిరేకించారు. ఒకవేళ ఈ వారంలోనే ఇది చట్ట రూపం దాల్చితే.. సోషల్ మీడియా దీనిపై ఆదేశాలు జారీ చేయనుంది.
Read Also: Doctors Died In Road Accident: ఎక్స్‌ప్రెస్‌వేపై ప్రమాదం.. ఐదుగురు వైద్యులు మృతి
కాగా, ఇటీవల ఈ చట్టం గురించి ఆస్ట్రేలియా ప్రధాని ఆంటోనీ ఆల్బనీస్‌.. కాన్ బెర్రాలోని ఓ మీటింగ్ మాట్లాడుతూ.. 16 ఏళ్ల వయస్సులోపు పిల్లలు సోషల్ మీడియా వల్ల తీవ్ర సమస్యలను ఎదుర్కొంటున్నారని తెలిపారు. దీంతో కొత్త చట్టం అమలు చేసే బాధ్యత సామాజిక మాధ్యమాలదేనని ఆయన స్పష్టం చేశారు. తల్లిదండ్రుల నుంచి వస్తున్న ఫిర్యాదుల ఆధారంగా ఈ నిర్ణయం తీసుకున్నట్టు ఆసీస్ ప్రధాన మంత్రి తెలిపారు. సోషల్ మీడియా దుష్ప్రభావాల నుంచి పిల్లల్ని కాపాడేందుకు అమెరికా సహా చాలా దేశాలు చట్టం తీసుకొచ్చేందుకు ట్రై చేస్తున్నాయని చెప్పుకొచ్చారు.