Gold and Silver Prices Fall: భారీగా పతనమైన బంగారం, వెండి ధరలు..

Gold and Silver Prices Fall: పసిడి ప్రియులకు గుడ్ న్యూస్‌ చెబుతూ మరోసారి భారీగా పతనం అయ్యాయి బంగారం ధరలు.. ఇదే సమయంలో వెండి ధర కూడా భారీగా దిగివచ్చింది.. అంతర్జాతీయ రాజకీయ పరిస్థితులు, ఆర్థిక అనిశ్చితులకు తోడు ముడి చమురు ధరలు, విదేశీ కరెన్సీ మారకం విలువల్లో మార్పులు, దేశీయ డిమాండ్‌.. సరఫరా మొదలైన అంశాలతో బంగారం, వెండి ధరలపై తీవ్ర ప్రభావాన్నే చూపాయి..

ఇక, ఈ రోజు హైదరాబాద్‌ బులియన్‌ మార్కెట్‌లో 24 క్యారెట్ల 10 గ్రాముల ధర రూ.2510 రూపాలు తగ్గడంతో 1,50,170 రూపాయలకు దిగివచ్చింది.. ఇదే సమయంలో 22 క్యారెట్ల 10 గ్రాముల బంగారం ధర రూ.2,300 తగ్గి రూ.1,37,650కి పరిమితమైంది.. ఇక, 18 క్యారెట్ల 10 గ్రాముల బంగారం ధర రూ.1,880 తగ్గడంతో రూ.1,12,630కు దిగివచ్చింది.. మరోవైపు వెండి ధరలు కూడా భారీగా దిగివచ్చాయి.. గ్రాముపై 5 రూపాయలు అంటే.. కిలోపై రూ.5,000లు తగ్గడంతో.. కిలో వెండి ధర రూ.2,45,000కి దిగివచ్చింది.. ఇక, ప్లాటినం 10 గ్రాములకు రూ.1,250 తగ్గడంతో.. ర.53,350క తగ్గింది..

అంతర్జాతీయ మార్కెట్లలో బంగారం ధరలు సోమవారం భారీగా పడిపోయాయి. స్పాట్ గోల్డ్ ధర 2.1 శాతం తగ్గి ఔన్సుకు 4,198.10 డాలర్లకు చేరుకుంది. సెప్టెంబర్ 1 తర్వాత బంగారం ధరకు ఇదే అతిపెద్ద ఒక్కరోజు పతనంగా నిలిచింది. అమెరికా గోల్డ్ ఫ్యూచర్స్ కూడా 2.1 శాతం తగ్గి 4,231 డాలర్లకు చేరుకున్నాయి. బంగారం ధరల పతనానికి ప్రధానంగా ముడిచమురు ధరల పెరుగుదల, ద్రవ్యోల్బణంపై ఆందోళనలు కారణంగా నిలిచాయి. అమెరికా అధ్యక్షుడు డొనాల్డ్ ట్రంప్ ఇరాన్ ప్రతిపాదనను తిరస్కరించడంతో చమురు ధరలు పెరిగాయి. బ్రెంట్ క్రూడ్ దాదాపు 2 శాతం పెరిగి బ్యారెల్‌కు 106.50 డాలర్లకు చేరుకుంది. పెరుగుతున్న చమురు ధరలు ద్రవ్యోల్బణ ఒత్తిళ్లను పెంచుతాయనే ఆందోళనలు నెలకొన్నాయి. దీంతో అమెరికా ఫెడరల్ రిజర్వ్ వడ్డీ రేట్లను మరింత కాలం అధిక స్థాయిలో కొనసాగించే అవకాశాలపై అంచనాలు బలపడ్డాయి. అధిక వడ్డీ రేట్ల వాతావరణంలో వడ్డీ ఆదాయం ఇవ్వని బంగారం కంటే వడ్డీ వచ్చే పెట్టుబడులు ఆకర్షణీయంగా మారుతాయి. ఈ కారణంగానే బంగారంపై ఒత్తిడి పెరిగిందని మార్కెట్ విశ్లేషకులు చెబుతున్నారు.

బంగారం ధరల పతనంతో పాటు భారత స్టాక్ మార్కెట్లు కూడా సోమవారం నష్టాలతో ప్రారంభమయ్యాయి. ఉదయం 9:20 గంటల సమయంలో సెన్సెక్స్ 659.65 పాయింట్లు నష్టపోయి 73,236.09 వద్ద, నిఫ్టీ 217.50 పాయింట్లు పడిపోయి 22,923 వద్ద ట్రేడయ్యాయి. 16 ప్రధాన రంగాల్లో 14 రంగాలు నష్టాల్లో కొనసాగగా, స్మాల్‌క్యాప్, మిడ్‌క్యాప్ సూచీలు కూడా దాదాపు 0.2 శాతం చొప్పున తగ్గాయి. ఇతర విలువైన లోహాల ధరలు కూడా తగ్గాయి. స్పాట్ సిల్వర్ 2.6 శాతం పడిపోయి 62.64 డాలర్లకు, ప్లాటినం 2.1 శాతం తగ్గి 1,741.45 డాలర్లకు, పల్లాడియం 2.1 శాతం తగ్గి 1,239.95 డాలర్లకు చేరుకున్నాయి. చమురు ధరలు, ద్రవ్యోల్బణం, అమెరికా ఫెడ్ వడ్డీ రేట్లపై అంచనాలు ప్రస్తుతం అంతర్జాతీయ మార్కెట్లను ప్రభావితం చేస్తున్న ప్రధాన అంశాలుగా ఉన్నాయి.