Balloon Stuck in Throat: బెలూన్ ఊదుతుండగా విషాదం.. గొంతులో ఇరుక్కుని ఆరేళ్ల బాలుడు మృతి

Balloon Stuck in Throat: చిన్న పిల్లలు తరచూ బెలూన్‌ కావాలని మారం చేస్తుంటారు.. జాతర, ఇతర ప్లేసుల్లో వాళ్లకు గాలి బుడగలు ఇప్పిస్తుంటారు.. ఇక, ఇంట్లో జరిగే బర్త్‌ డే పార్టీలు.. చిన్న ఫంక్షన్‌లలో కూడా బెలూన్లు వాడుతుంటారు.. అంతేకాదు.. కొన్నిసార్లు.. సమీప షాపుల్లో తీసుకొని ఆడుకుంటారు.. కానీ, అవి కొన్నిసార్లు ప్రాణాల మీదకు తెస్తుంటాయి.. తాజాగా, తమిళనాడులోని పచ్చూరులో విషాద ఘటన చోటుచేసుకుంది. బెలూన్ ఊదుతుండగా అది గొంతులో ఇరుక్కోవడంతో ఆరేళ్ల బాలుడు మృతి చెందాడు. ఆడుకుంటూ ప్రమాదానికి గురైన చిన్నారి మృతితో కుటుంబంలో తీవ్ర విషాదం నెలకొంది.

వస్త్ర వ్యాపారి సత్యకుమార్ దంపతులకు ఇద్దరు మగ కవల పిల్లలు ఉన్నారు. సోమవారం సాయంత్రం ఇంటి వద్ద ఆరేళ్ల సోమనాథ్ బెలూన్‌తో ఆడుకుంటూ దానిని ఊదుతున్నాడు. ఈ క్రమంలో ప్రమాదవశాత్తు బెలూన్ ఒక్కసారిగా బాలుడి గొంతులో ఇరుక్కుంది. దీంతో ఊపిరి ఆడక అపస్మారక స్థితిలోకి వెళ్లాడు. వెంటనే కుటుంబ సభ్యులు బాలుడిని ఆసుపత్రికి తరలించారు. అయితే అప్పటికే చిన్నారి మృతి చెందినట్లు వైద్యులు నిర్ధారించారు. బాలుడి గొంతులో ఇరుక్కున్న బెలూన్‌ను వైద్యులు బయటకు తీశారు. ఆడుతూ పాడుతూ బెలూన్‌తో సరదాగా గడిపిన చిన్నారి అనూహ్యంగా మృత్యువాత పడటంతో కుటుంబ సభ్యులు కన్నీరుమున్నీరుగా విలపిస్తున్నారు. ఈ ఘటనతో పచ్చూరులో విషాద ఛాయలు అలుముకున్నాయి.