Mad Sandhu: సోషల్ మీడియా ఇన్‌ఫ్లుయెన్సర్, మేకప్ ఆర్టిస్ట్ మ్యాడ్ సంధు శనివారం దారుణహత్యకు గురయ్యారు. అమృత్‌సర్‌లో జరిగిన కాల్పుల్లో ఆయన తీవ్రంగా గాయపడ్డారు. నడిరోడ్డుపై కాల్పుల గాయాలతో పడి ఉన్న సంధును ఆస్పత్రికి తరలించే క్రమంలోనే మరణించాడు. ఈ ఘటనకు సంబంధించిన వీడియో సోషల్ మీడియాలో వైరల్‌గా మారింది. ఈ ఘటన గురించి సమాచారం తెలుసుకున్న పోలీసులు సంఘటనా స్థలానికి చేరుకుని దర్యాప్తు ప్రారంభించారు.
కాల్పులకు గల కారణాలు, ఘటనకు దారి తీసిన పరిస్థితుల గురించి ఇప్పటి వరకు క్లారిటీ లేదు. ఎవరు కాల్చి చంపారనే దానిపై పోలీసులు ఆరా తీస్తున్నారు. సీసీటీవీ ఫుటేజ్, ఇతర వివరాలను పరిశీలిస్తున్నారు. మ్యాడ్ సంధు మేకప్, సినిమా రంగం, జెండర్ అంశాలపై పాడ్‌కాస్ట్‌లలో తరచూ మాట్లాడేవారు. సోషల్ మీడియాలో ఆయనకు తరచూ హోమోఫోబిక్ ట్రోలింగ్(స్వలింగ సంపర్కుల పట్ల ద్వేషం) ఎదురయ్యేది.