Live-in relationship: ప్రియురాలు బ్రేకప్ చెప్పిందని ఒక వ్యక్తి దారుణంగా ప్రవర్తించిన ఘటన పశ్చిమ బెంగాల్ రాజధాని కోల్‌కతాలో జరిగింది. లివ్-ఇన్-రిలేషన్‌షిప్ తెంచుకుందనే కోపంతో ఓ వ్యక్తి, యువతి పెంపుడు కుక్కల్ని దారుణంగా చంపేశాడు. ఆ కుక్కల్ని చంపుతున్న సమయంలో తన మాజీ ప్రియురాలికి వీడియో కాల్ చేసి ఆ దృశ్యాలను చూపించాడు. దక్షిణ కోల్‌కతాలోని బ్రిక్రమ్‌గఢ్ ప్రాంతంలో ఈ ఘటన జరిగింది.
పోలీసులు తెలిపిన వివరాల ప్రకారం.. సంజీబ్ భట్టాచార్య అనే వ్యక్తి పరిణోవా అనే మహిళ కొంత కాలం లివ్ ఇన్ రిలేషన్‌లో ఉన్నారు. అయితే, ఇటీవల పరిణోవా సంజీబ్‌తో తన బంధాన్ని తెంచుకోవాలని నిర్ణయించుకుని, ఇంటి నుంచి వెళ్లిపోయింది. ఈ నేపథ్యంలో శనివారం సంజీబ్ పరిణోవాకు వీడియో కాల్ చేశాడు. ఆమె పెంపుడు కుక్కని ఉరితీసి చంపేశాడు. ఈ దృశ్యాలతో ఆందోళన చెందిన పరిణోవా, స్థానికంగా తెలిసిన వ్యక్తికి ఫోన్ చేసి, ఫ్లాట్‌కు వెళ్లి చూడాలని కోరింది. అతను అక్కడికి వెళ్లేలోపే రెండు కుక్కలు చనిపోయి కనిపించాయి. ఫ్లాట్ మొత్తం రక్తంతో నిండిపోయి ఉంది.
ఈ ఘటనపై పోలీస్ కేసు నమోదైంది. సంజీబ్‌ను పోలీసులు అరెస్ట్ చేశారు. ఈ ఘటనపై బెంగాల్ జంతు హక్కుల కార్యకర్తలు తీవ్ర ఆందోళన వ్యక్తం చేశారు. నటి, యానిమల్ రైట్స్ యాక్టివిస్ట్ దెబ్లినా దత్తా ఘటనా స్థలానికి వెళ్లారు. ఈ విషయాన్ని మంత్రి అగ్నిమిత్రపాల్ దృష్టికి తీసుకెళ్లి, సంజీబ్‌పై తక్షణ చర్యలు తీసుకోవాలని కోరారు. బీజేపీ ఎమ్మెల్యే పాపియా అధికారి కూడా ఈ ఘటనపై స్పందించారు. నిందితుడి మానసిక స్థితి సరిగా లేదని, అతడిని సమాజంలో స్వేచ్ఛగా తిరుగనివ్వొద్దని వ్యాఖ్యానించారు.
తనను తీవ్ర శారీరక వేధింపులకు గురిచేయడంతో, ప్రాణభయంతో ఫ్లాట్‌ను వదిలివెళ్లాల్సి వచ్చిందని పరిణోవా చెప్పింది. ఆమె స్వస్థలం హిమాచల్ ప్రదేశ్. గత ఆరేడు నెలలుగా ప్రతీరోజూ నన్ను సంజీబ్ కొట్టేవాడని, ఇంటి నుంచి వెళ్లిపోవడం తప్పా తనకు వేరే మార్గం లేదని, అన్ని విధాలుగా తనను వేధించాడని, చివరకు నన్ను చంపేసేవాడే అని ఆమె మీడియాతో చెప్పింది. తన సోదరుడిని కూడా కేసుల్లో ఇరికించే ప్రయత్నం చేశాడని, కొన్ని నెలల క్రితం సంజీబ్ విషం తాగి ఆత్మహత్యకు పాల్పడ్డాడనని, ఈ ఘటన తర్వాత తన సోదరుడిపై కేసు నమోదైందని ఆమె తెలిపారు.