Reliance AGM 2026: జియో IPO నుంచి AI, 2 లక్షల ఉద్యోగాల వరకు.. ముఖేష్ అంబానీ 10 కీలక ప్రకటనలు

భారత కార్పొరేట్ రంగంలో అత్యంత ప్రతిష్టాత్మక కార్యక్రమాల్లో ఒకటైన Reliance Industries వార్షిక సర్వసభ్య సమావేశం (AGM) 2026లో భవిష్యత్ సాంకేతికత, డిజిటల్ మౌలిక సదుపాయాలు, గ్రీన్ ఎనర్జీ, టెలికాం, తయారీ రంగాలకు సంబంధించిన పలు కీలక ప్రకటనలు వెల్లడించింది. రిలయన్స్ ఛైర్మన్ Mukesh Ambani, ఆయన కుటుంబ సభ్యులు ఇషా, ఆకాష్, అనంత్ అంబానీలు సంస్థ భవిష్యత్ వ్యూహాలను ప్రకటించారు. ముఖ్యంగా జియో IPO, స్వదేశీ AI, శాటిలైట్ ఇంటర్నెట్ సేవలు, 2 లక్షల కొత్త ఉద్యోగాల సృష్టి వంటి అంశాలు పెట్టుబడిదారులు, వినియోగదారుల దృష్టిని ఆకర్షించాయి.

1. జియో మెగా IPOకు గ్రీన్ సిగ్నల్

అత్యంత కీలక ప్రకటనగా, Jio Platforms IPO ప్రక్రియకు బోర్డు ఆమోదం తెలిపింది. డ్రాఫ్ట్ రెడ్ హెర్రింగ్ ప్రాస్పెక్టస్ (DRHP)ను సెబీకి దాఖలు చేయనున్నట్లు ముఖేష్ అంబానీ వెల్లడించారు. ఈ IPOలో 27 కోట్ల కొత్త షేర్లను జారీ చేయనున్నారు.

2. జియోకు కొత్త తరం నాయకత్వం

జియో తదుపరి వృద్ధి దశకు ఇషా అంబానీ, ఆకాష్ అంబానీ, అనంత్ అంబానీలు సంయుక్తంగా నాయకత్వం వహిస్తారని సంస్థ ప్రకటించింది.

3. శాటిలైట్ ద్వారా ఇంటర్నెట్ సేవలు

ఆకాష్ అంబానీ ప్రకారం, జియో భారతదేశం కోసం సొంత లో ఎర్త్ ఆర్బిట్ (LEO) శాటిలైట్ నెట్‌వర్క్‌ను అభివృద్ధి చేయనుంది. దీని ద్వారా మారుమూల ప్రాంతాలకు కూడా హైస్పీడ్ ఇంటర్నెట్ సేవలు అందించాలనే లక్ష్యంతో సంస్థ ముందుకు సాగుతోంది.

4. జామ్‌నగర్‌లో స్వదేశీ AI మౌలిక సదుపాయాలు

రిలయన్స్ ఇంటెలిజెన్స్ ఆధ్వర్యంలో జామ్‌నగర్‌లో భారతదేశానికి చెందిన “సార్వభౌమ AI వెన్నెముక” నిర్మాణం చేపడుతోంది. AI సేవలను సరసమైన ధరలకు అందుబాటులోకి తీసుకురావడమే దీని ప్రధాన లక్ష్యం.

5. 22 భారతీయ భాషల్లో AI సేవలు

జియో భారత్ IQ, AI బిజినెస్, జియో హెల్త్ IQ వంటి AI ప్లాట్‌ఫారమ్‌లు 22 భారతీయ భాషల్లో అందుబాటులోకి రానున్నాయి. భారతీయ భాషల్లో AI సేవలు అందించడం ద్వారా డిజిటల్ విప్లవానికి ఊతమివ్వాలని రిలయన్స్ లక్ష్యంగా పెట్టుకుంది.

6. MyJio యాప్‌లో AI అసిస్టెంట్

ప్రస్తుతం ఉన్న MyJio యాప్‌ను పూర్తిగా మార్చి వ్యక్తిగత AI అసిస్టెంట్ గా రూపొందించనున్నారు. ఇది వినియోగదారుల వ్యక్తిగత అవసరాలకు అనుగుణంగా సేవలు అందించే AI ఏజెంట్‌గా పనిచేస్తుంది.

7. జియో టెలిఫ్రేమ్, JAMS ఆవిష్కరణ

గృహ వినియోగదారుల కోసం “జియో టెలిఫ్రేమ్” అనే AI ఆధారిత సిస్టమ్‌ను పరిచయం చేశారు. అలాగే మీడియా, కంటెంట్ క్రియేటర్ల కోసం “JioStar GenAI Media Studio (JAMS)”ను ప్రారంభించారు. అదనంగా, జియోహాట్‌స్టార్‌లో “కంటెంట్ కామర్స్” ఫీచర్‌ను కూడా తీసుకురానున్నారు.

8. తయారీ, రిటైల్ రంగాల్లో భారీ పెట్టుబడులు

పండ్లు, కూరగాయలు, పానీయాలు, వస్త్రాలు, స్మార్ట్ టీవీలు, వేరబుల్స్ వంటి అనేక ఉత్పత్తుల తయారీ కోసం భారీ మాన్యుఫ్యాక్చరింగ్ ఎకోసిస్టమ్‌ను నిర్మిస్తున్నట్లు రిలయన్స్ ప్రకటించింది.

9. 2 లక్షల కొత్త ఉద్యోగాలు

గ్రీన్ ఎనర్జీ రంగంలో రిలయన్స్ చేపడుతున్న ప్రాజెక్టుల ద్వారా 2 లక్షలకు పైగా ఉద్యోగాలు సృష్టించనున్నట్లు అనంత్ అంబానీ తెలిపారు. గుజరాత్‌లోని కచ్‌లో అభివృద్ధి చేస్తున్న భారీ పునరుత్పాదక ఇంధన కేంద్రం దేశ విద్యుత్ అవసరాల్లో కీలక పాత్ర పోషించనుంది.

10. విద్య, ఆరోగ్య రంగాల్లో భారీ ప్రాజెక్టులు

రిలయన్స్ ఫౌండేషన్ ఛైర్‌పర్సన్ Nita Ambani మహారాష్ట్రలో 410 ఎకరాల విస్తీర్ణంలో కొత్త ప్రైవేట్ యూనివర్సిటీని ఏర్పాటు చేయనున్నట్లు వెల్లడించారు. అలాగే ముంబైలో 1,500 పడకల సామర్థ్యంతో అత్యాధునిక వైద్య నగరాన్ని అభివృద్ధి చేయనున్నట్లు తెలిపారు.