EPFO Rules: పదవీ విరమణ తర్వాత PF డబ్బు వెంటనే తీసుకోవాలా? EPFO ఏం చెబుతోంది?
- Follow Us :
-
-
Add as a preferred
source on google
EPFO Rules: ఉద్యోగి తాను రిటైర్ అయిన తర్వాత తనకు ఆర్థిక భరోసా కోసం ఉద్యోగుల భవిష్య నిధి (EPF) ఎంతగానో ఉపయోగపడుతుంది.. అయితే, EPFO ఎప్పటికప్పుడు కొన్ని మార్పులు చేస్తూనే ఉంటుంది.. ఉద్యోగుల భవిష్య నిధి (EPF) ఖాతాదారులకు ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO) కీలక విషయాన్ని వెల్లడించింది. పదవీ విరమణ తర్వాత తమ PF డబ్బును ఎప్పుడు విత్‌డ్రా చేసుకోవాలి? ఖాతాలోనే ఉంచితే ఎంతకాలం పాటు వడ్డీ లభిస్తుంది? అనే సందేహాలు చాలామందిలో ఉంటాయి. ఈ నేపథ్యంలో రిటైర్మెంట్ తర్వాత PF ఖాతాపై వడ్డీ జమ అయ్యే కాలపరిమితిపై EPFO వివరాలు వెల్లడించింది.
58 ఏళ్ల తర్వాత కూడా మూడేళ్లపాటు వడ్డీ
సాధారణంగా 58 ఏళ్ల వయస్సులో పదవీ విరమణ చేసే ఉద్యోగులు తమ PF మొత్తాన్ని వెంటనే విత్‌డ్రా చేసుకోవాల్సిన అవసరం లేదు. EPFO వెల్లడించిన సమాచారం ప్రకారం, వర్తించే నిబంధనల మేరకు పదవీ విరమణ తర్వాత మరో మూడేళ్లపాటు ఖాతాలోని అర్హతగల మొత్తంపై వడ్డీ లభిస్తుంది. అంటే 58 ఏళ్లకు రిటైర్ అయిన ఉద్యోగికి 61 ఏళ్ల వయస్సు వరకు వడ్డీ పొందే అవకాశం ఉంటుంది.
మూడేళ్ల తర్వాత PF ఖాతా ఏమవుతుంది?
పదవీ విరమణ తర్వాత వర్తించే మూడేళ్ల కాలపరిమితి ముగిసినప్పుడు, నిబంధనల ప్రకారం PF ఖాతా నిష్క్రియంగా (Inoperative Account) మారవచ్చు. ఖాతా నిష్క్రియంగా మారిన తర్వాత దానిపై మరింత వడ్డీ జమ కాదు. అయితే, ఖాతా నిష్క్రియంగా మారడం అంటే అందులోని డబ్బు పోవడం లేదా ఖాతా పూర్తిగా మూసుకుపోవడం కాదు. అర్హతగల సభ్యులు వర్తించే నిబంధనల ప్రకారం తమ మొత్తాన్ని క్లెయిమ్ చేసుకోవచ్చు.
PF డబ్బును ఎప్పుడు విత్‌డ్రా చేసుకోవాలి?
PF మొత్తాన్ని ఎప్పుడు విత్‌డ్రా చేసుకోవాలనే నిర్ణయం ఉద్యోగి ఆర్థిక అవసరాలు, పెన్షన్, ఇతర పొదుపులపై ఆధారపడి ఉంటుంది. రిటైర్మెంట్ తర్వాత రోజువారీ ఖర్చులకు డబ్బు అవసరమైతే అందుకు అనుగుణంగా ప్రణాళిక రూపొందించుకోవచ్చు. అయితే, వడ్డీ లభించే కాలపరిమితిని దృష్టిలో ఉంచుకుని ముందుగానే నిర్ణయం తీసుకోవడం మంచిది.
ఖాతా వివరాలను తనిఖీ చేసుకోవాలి
ఉద్యోగులు తమ EPF బ్యాలెన్స్, ఖాతా స్థితి, వడ్డీ వివరాలను ఎప్పటికప్పుడు తనిఖీ చేసుకోవాలి. డబ్బును విత్‌డ్రా చేసే ముందు EPFO అధికారిక పోర్టల్‌లో లేదా సంబంధిత కార్యాలయంలో వర్తించే తాజా నిబంధనలను నిర్ధారించుకోవాలి. ఎన్నో సంవత్సరాల పాటు కష్టపడి కూడబెట్టుకున్న PF పొదుపులు పదవీ విరమణ తర్వాత ఆర్థిక భద్రతకు కీలకం కాబట్టి, వాటిపై వడ్డీ ఎప్పటివరకు లభిస్తుందో తెలుసుకుని తగిన నిర్ణయం తీసుకోవడం అవసరం.