జూలై 1 నుంచి వాణిజ్య ఎల్పీజీ (Commercial LPG) వినియోగదారులకు కేంద్ర చమురు మార్కెటింగ్ సంస్థలు శుభవార్త చెప్పాయి. దేశవ్యాప్తంగా 19 కేజీల కమర్షియల్ ఎల్పీజీ సిలిండర్ ధరలను రూ.174 నుంచి రూ.183.50 వరకు తగ్గిస్తూ కొత్త ధరలను అమల్లోకి తెచ్చాయి. ఈ తగ్గింపుతో రెస్టారెంట్లు, హోటళ్లు, భోజనశాలలు, టీ స్టాళ్లు వంటి వాణిజ్య వినియోగదారులకు ఊరట లభించనుంది. అయితే, 14.2 కేజీల గృహ వినియోగ LPG సిలిండర్ ధరల్లో ఎలాంటి మార్పు చేయలేదు. దీంతో సాధారణ గృహ వినియోగదారులకు ఈసారి ధరల తగ్గింపు లభించలేదు.
ఢిల్లీలో అత్యధిక తగ్గింపు
కొత్త ధరల ప్రకారం ఢిల్లీలో 19 కేజీల కమర్షియల్ LPG సిలిండర్పై రూ.183.50 తగ్గింపు అమలు చేశారు. అలాగే లక్నో, పాట్నా నగరాల్లో కూడా ఇదే స్థాయిలో ధరలు తగ్గించగా, కోల్కతాలో రూ.174 తగ్గింపు ప్రకటించారు.
కొత్త ధరలు ఇవే
ఇండియన్ ఆయిల్ విడుదల చేసిన తాజా ధరల ప్రకారం, ఢిల్లీలో 19 కేజీల కమర్షియల్ LPG సిలిండర్ ధర రూ.3,113.50 నుంచి రూ.2,930కు తగ్గింది. పాట్నాలో కమర్షియల్ సిలిండర్ ధర రూ.3,227గా నిర్ణయించగా, 14.2 కేజీల గృహ వినియోగ సిలిండర్ ధర మాత్రం రూ.1,031.50 వద్ద యథాతథంగా కొనసాగుతోంది.
హోటళ్లు, రెస్టారెంట్లకు ఊరట
కమర్షియల్ LPG ధరలు తగ్గడంతో హోటళ్లు, రెస్టారెంట్లు, క్యాటరింగ్ సేవలు, ఫుడ్ వ్యాపారాలకు గ్యాస్ ఖర్చు తగ్గే అవకాశం ఉంది. దీని ప్రభావం భవిష్యత్తులో కొన్ని ఆహార పదార్థాల ధరలపై కూడా కనిపించే అవకాశముందని వ్యాపార వర్గాలు భావిస్తున్నాయి.