Gold – Silver Prices: గత కొద్దిరోజులుగా సరికొత్త గరిష్ఠాలను తాకుతూ చుక్కలు చూపించిన పసిడి, వెండి ధరలకు ఒక్కసారిగా భారీ బ్రేక్ పడింది. అమెరికా నుంచి వచ్చిన ఊహించని గణాంకాలు గ్లోబల్ మార్కెట్లను కుదిపేయడంతో దేశీయంగానూ బంగారం, వెండి ధరలు భారీగా పతనమయ్యాయి. ముఖ్యంగా వెండిపై ఏకంగా వేల రూపాయల మేర కోత పడటంతో కొనుగోలుదారులతో పాటు కమోడిటీ వ్యాపారులు ఒక్కసారిగా విస్తుపోయారు. దేశీయ మల్టీ కమోడిటీ ఎక్స్ఛేంజ్ (MCX)లో ట్రేడింగ్ మొదలైనప్పటి నుంచే అమ్మకాల వెల్లువ కనిపించింది. డిసెంబర్ ఫ్యూచర్స్‌కు సంబంధించి కిలో వెండి ధరపై ఏకంగా రూ.8,237 (3.76 శాతం) మేర భారీగా క్షీణించి రూ.2,10,508 స్థాయికి దిగొచ్చింది. దీని ప్రభావం బంగారంపై కూడా స్పష్టంగా పడింది. 10 గ్రాముల బంగారం ధర సుమారు రూ.2,084 (1.50 శాతం) తగ్గి రూ.1,46,366 వద్ద ట్రేడ్ అవుతోంది. గ్లోబల్ మార్కెట్లలోనూ ఇదే రకమైన అమ్మకాల ఒత్తిడి కనిపించడంతో ఔన్సు బంగారం $4,122.05 వద్దకు, ఔన్సు వెండి $57.035 వద్దకు పడిపోయాయి.
ఈ ఆకస్మిక పతనానికి ప్రధాన కారణం అమెరికా ద్రవ్యోల్బణ నివేదిక అని ఆర్థిక విశ్లేషకులు అభిప్రాయపడుతున్నారు. సెప్టెంబరు నెలకు సంబంధించిన వినియోగదారుల ధరల సూచిక (CPI) ఏకంగా 0.6 శాతం పెరిగినట్లు తాజాగా లెక్కలు తేలాయి. నిపుణులు అంచనా వేసిన దానికంటే ద్రవ్యోల్బణం ఎగబాకడంతో, అమెరికా సెంట్రల్ బ్యాంక్ ఫెడరల్ రిజర్వ్ మున్ముందు వడ్డీ రేట్లను మరింత పెంచవచ్చనే భయాలు ఇన్వెస్టర్లలో మొదలయ్యాయి. వడ్డీ రేట్లు పెరిగే అవకాశాలు స్పష్టంగా కనిపిస్తుండటంతో గ్లోబల్ మార్కెట్లలో డాలర్ విలువ విపరీతంగా బలపడింది. సాధారణంగా అంతర్జాతీయంగా బంగారం, వెండి ట్రేడింగ్ మొత్తం డాలర్లలోనే జరుగుతుంది కాబట్టి, డాలర్ పుంజుకుంటే ఇతర కరెన్సీలు కలిగిన దేశాలకు ఈ లోహాలు మరింత ప్రియంగా మారి డిమాండ్ తగ్గిపోతుంది. దీనికితోడు వడ్డీ రేట్లు ఎక్కువగా ఉంటే బాండ్లపై లాభదాయకమైన రాబడులు వస్తాయి. దీంతో సురక్షిత సాధనాలుగా భావించే పసిడి, వెండిలోని పెట్టుబడులను వెనక్కి తీసుకుని బాండ్ల వైపు మళ్లించేందుకు మదుపర్లు మొగ్గు చూపారు. ఈ పరిణామాలన్నీ కలగలిసి కమోడిటీ మార్కెట్‌లో భారీ అమ్మకాల సునామీకి దారితీశాయి.