Liquor Ban: ఏంటి! ఇన్ని రోజులు “బ్రాండెడ్ విషం” తాగారా? ఓల్డ్ మాంక్, రాయల్ ఛాలెంజ్‌ సహా ఈ బ్రాండ్ల గుట్టు రట్టు..

Liquor Ban: ప్రియమైన మద్యం బాబులకు ఇన్నాళ్లూ గొంతులో పోసుకున్నది అసలైన మందు కాదు, ప్రాణాలను పణంగా పెట్టే కృత్రిమ రసాయనాల విషం అని తెలిసింది. కష్టపడి సంపాదించిన సొమ్మును వెచ్చించి, ఎంతో ఇష్టంగా తాగే ప్రముఖ బ్రాండ్ల విస్కీలు, రమ్‌లలో సహజమైన రుచి, సువాసన కాకుండా ల్యాబ్‌లలో తయారు చేసిన ప్రమాదకరమైన కృత్రిమ ఫ్లేవర్లను కలిపి విక్రయిస్తున్నట్లు ఎఫ్‌ఎస్‌ఎస్‌ఏఐ తనిఖీల్లో వెల్లడవడం పెను సంచలనంగా మారింది. ఏళ్ల తరబడి పద్ధతిగా నిల్వ ఉంచి, సహజ సిద్ధమైన ప్రక్రియలో తయారు చేయాల్సిన మద్యాన్ని, ఆ సమయాన్ని సేవ్‌ చేసుకుని భారీగా లాభాలు దండుకోవడానికి మద్యం దిగ్గజాలు తీవ్రమైన కల్తీకి పాల్పడ్డాయి. చెరకు పిప్పి, మార్ట్ వంటి సహజ పదార్థాల సుదీర్ఘ తయారీ ప్రక్రియను దాటవేసి, విస్కీలో మళ్లీ ‘విస్కీ ఫ్లేవర్’, రమ్‌లో ‘రమ్ ఫ్లేవర్’ పేరుతో కృత్రిమ రసాయనాలతో.. రాయల్ ఛాలెంజ్, ఆంటిక్విటీ బ్లూ, మెక్‌డోవెల్స్ నంబర్ 1, బ్యాగ్‌పైపర్, చివరకు ఎంతో ప్రాచుర్యం పొందిన ఓల్డ్ మాంక్ వంటి బ్రాండ్లలో కూడా కల్తీ మందునే బాటిళ్లలో నింపి సరఫరా చేశాయంటే పరిస్థితి ఎంత దారుణంగా ఉందో అర్థం చేసుకోవచ్చు. ఏటా రూ. 3.3 లక్షల కోట్లకు పైగా వ్యాపారం నడిచే భారత మద్యం మార్కెట్లో ప్రజల ఆరోగ్యాన్ని పక్కనపెట్టి, కేవలం వ్యాపార స్వార్థంతో కంపెనీలు సాగించిన ఈ నాసిరకం కల్తీ దందా వల్ల కోట్లాది మంది మందుబాబులు రోజూ విషాన్నే అమృతంగా భావించి తాగేశారు. లేబుళ్లపై నేచర్ ఐడెంటికల్ ఫ్లేవర్స్ అని ముద్రించి, పరిశ్రమలో ఇదొక ప్రామాణిక పద్ధతి అని బడా కంపెనీలు సమర్థించుకోవడానికి చూస్తున్నప్పటికీ, ఇన్నాళ్లూ బ్రాండెడ్ మందు పేరుతో సేవించినదంతా కల్తీ రసాయనాల కాక్‌టైల్ అనే నిజం మద్యం ప్రియుల పొట్టలో భయాన్ని నింపుతోంది.

అసలు ఏం జరిగింది?

దేశంలో ఏటా సుమారు 40 బిలియన్ డాలర్ల (రూ. 3.3 లక్షల కోట్లకు పైగా) మద్యం వ్యాపారం జరుగుతుండగా, భారతదేశం ప్రపంచంలోనే అత్యంత భారీ మద్యం మార్కెట్లలో ఒకటిగా వెలుగొందుతోంది. ఇందులో డయాజియోకు చెందిన యునైటెడ్ స్పిరిట్స్ లిమిటెడ్ (USL) అత్యధిక మార్కెట్ వాటాతో అగ్రస్థానంలో కొనసాగుతూ పెర్నాడ్ రికార్డ్ వంటి అంతర్జాతీయ దిగ్గజాలతో పోటీపడుతోంది. విదేశాల నుంచి దిగుమతి చేసుకునే మద్యం ధరలతో పోలిస్తే సాధారణ ప్రజలకు అందుబాటులో ఉండే ధరకు విస్కీ, రమ్‌లను అందించడం వల్ల ఈ స్థానిక బ్రాండ్లకు మార్కెట్లో మంచి డిమాండ్ ఉంది.

ఆల్కహాలిక్ పానీయాలలో కొన్ని రకాల సహజమైన ఫ్లేవర్లను ఉపయోగించడానికి ఎఫ్‌ఎస్‌ఎస్‌ఏఐ నిబంధనలు అనుమతిస్తాయి. అయితే, యుఎస్ఎల్, ఇన్ బ్రూ కంపెనీలకు చెందిన కొన్ని తయారీ కేంద్రాల్లో ఏకంగా మద్యం ఫ్లేవర్లనే అదనంగా కలుపుతున్నట్లు పరీక్షల్లో తేలింది. ఉదాహరణకు, రమ్‌లో మళ్లీ ప్రత్యేకంగా కృత్రిమ ‘రమ్ ఫ్లేవర్’ను, విస్కీలో ‘విస్కీ ఫ్లేవర్’ను చేర్చుతున్నారు. అంతర్జాతీయంగా ఆమోదయోగ్యమైన ఏ మద్యం తయారీ విధానంలోనూ రమ్‌కు రమ్ ఫ్లేవర్ లేదా విస్కీకి విస్కీ ఫ్లేవర్ జోడించే ఆచారం లేదని ఎఫ్‌ఎస్‌ఎస్‌ఏఐ సంచలన ప్రకటన విడుదల చేసింది. చెరకు పిప్పి (మోలాసెస్), మార్ట్ లేదా ద్రాక్ష వంటి సహజమైన పదార్థాలను ఉపయోగించి, సరైన పద్ధతిలో మద్యాన్ని నిల్వ ఉంచే సుదీర్ఘమైన తయారీ ప్రక్రియను దాటవేసేందుకే కంపెనీలు ఈ రకమైన కుతంత్రాలకు పాల్పడుతున్నాయని తీవ్రంగా మండిపడింది.

ఈ ఉల్లంఘనల కారణంగా డయాజియో రష్యన్ అనుబంధ సంస్థ తయారు చేసే పాపులర్ ఉత్పత్తుల అమ్మకాలపై ఎఫ్‌ఎస్‌ఎస్‌ఏఐ నిషేధం విధించింది. మధ్యప్రదేశ్‌లో తయారయ్యే ఆంటిక్విటీ బ్లూ విస్కీ, రాయల్ ఛాలెంజ్ విస్కీలతో పాటు పశ్చిమ మహారాష్ట్రలో ఉత్పత్తి అయ్యే మెక్‌డోవెల్స్ నంబర్ 1 రమ్ విక్రయాలను నిలిపివేసింది. అలాగే ఇన్ బ్రూ కంపెనీకి చెందిన బ్యాగ్‌పైపర్ డీలక్స్ విస్కీ, ఓల్డ్ కాస్క్ డీలక్స్ XXX రమ్, మోహన్ రాకీ స్ప్రింగ్‌వాటర్ కంపెనీ మహారాష్ట్రలో తయారు చేసే దేశంలోనే అత్యంత పురాతన, ప్రసిద్ధ రమ్ బ్రాండ్ అయిన ఓల్డ్ మాంక్‌కు చెందిన మూడు రకాల వెరైటీల విక్రయాలపై కూడా ఎఫ్‌ఎస్‌ఎస్‌ఏఐ కఠిన ఆంక్షలు విధించింది.

ఈ వ్యవహారంపై స్పందించిన యునైటెడ్ స్పిరిట్స్, తమ ఉత్పత్తుల లేబుళ్లపై ఇచ్చిన సమాచారం భారతదేశంలోని ప్రస్తుత చట్టపరమైన, నియంత్రణ నిబంధనలకు అనుగుణంగానే ఉందని తెలిపింది. ఇది పరిశ్రమలో చాలా కాలంగా కొనసాగుతున్న ప్రామాణిక పద్ధతి అని, చట్టపరమైన సలహా తీసుకున్న తర్వాతే ఉత్పత్తులను విడుదల చేశామని స్టాక్ ఎక్స్ఛేంజ్ ఫైలింగ్‌లో పేర్కొంది. ఎఫ్‌ఎస్‌ఎస్‌ఏఐ ఇచ్చిన నిషేధ ఉత్తర్వులను సవాలు చేస్తూ ఆగస్టు 1న బాంబే హైకోర్టులో రిట్ పిటిషన్ దాఖలు చేసినట్లు వెల్లడించింది. అలాగే కాన్ఫెడరేషన్ ఆఫ్ ఇండియన్ ఆల్కహాలిక్ బెవరేజ్ కంపెనీస్, ఇంటర్నేషనల్ స్పిరిట్స్ అండ్ వైన్స్ అసోసియేషన్ ఆఫ్ ఇండియా వంటి పారిశ్రామిక సంఘాలతో కలిసి ఈ సమస్య పరిష్కారానికి కృషి చేస్తున్నట్లు తెలిపింది. కాగా, ఇన్ బ్రూ, మోహన్ రాకీ స్ప్రింగ్‌వాటర్ కంపెనీలు మాత్రం ఇప్పటివరకు ఈ అంశంపై ఎలాంటి స్పందన తెలియజేయలేదు.

భారతదేశంలో డయాజియోకు అత్యంత ప్రజాదరణ పొందిన ఉత్పత్తులలో రాయల్ ఛాలెంజ్ విస్కీ ఒకటి. స్కాచ్, ఇండియన్ మాల్ట్స్, గ్రెయిన్ స్పిరిట్స్ కలయికతో అత్యంత నాణ్యతతో దీన్ని తయారు చేస్తున్నామని కంపెనీ తన వెబ్‌సైట్‌లో ప్రచారం చేసుకుంటుంది. ప్రతి ఏటా భారత్‌లో ఏకంగా 45 లక్షల (9 లీటర్ల పరిమాణం గల) రాయల్ ఛాలెంజ్ కేసుల విక్రయం జరుగుతుందని డయాజియో పేర్కొంది. మనదేశంలో ప్రతి రాష్ట్రంలో మద్యం ధరలు వేర్వేరుగా ఉంటాయి, ఉదాహరణకు ఉత్తరప్రదేశ్‌లో 375 మిమి రాయల్ ఛాలెంజ్ విస్కీ బాటిల్ ధర కేవలం రూ.360 మాత్రమే. రాయిటర్స్ సంస్థ సేకరించిన సమాచారం ప్రకారం ఈ విస్కీ సీసా లేబుల్‌పై నీరు, గ్రెయిన్ న్యూట్రల్ స్పిరిట్, అనుమతించబడిన సహజ రంగుతో కూడిన స్కాచ్‌తో పాటు “నేచర్ ఐడెంటికల్ (విస్కీ) ఫ్లేవరింగ్ సబ్‌స్టాన్సెస్” ఉన్నట్లు స్పష్టంగా ముద్రించి ఉండడం గమనార్హం.