8th Pay Commission: గుడ్ న్యూస్.. ఒక్క నిర్ణయంతో రూ.69 వేలకు చేరనున్న కనీస బేసిక్.. ఉద్యోగులు, పెన్షనర్లకు జాక్‌పాట్!

8th Pay Commission: కేంద్ర ప్రభుత్వ ఉద్యోగులు, రిటైర్డ్ పెన్షనర్ల దశ తిరిగే సమయం ఆసన్నమైనట్లే కనిపిస్తోంది. ప్రస్తుతం ముమ్మరంగా సాగుతున్న 8వ వేతన సంఘం కసరత్తుల్లో ఉద్యోగ వర్గాల నుంచి వస్తున్న ప్రధాన ప్రతిపాదన కేంద్రం ఆమోదం పొందితే.. వారి అకౌంట్లో పడే వేతనాలు రికార్డు స్థాయిలో పెరగనున్నాయి. ఏకంగా ఉద్యోగుల కనీస బేసిక్‌లో సుమారు రూ.51,000 వరకు ఒకేసారి పెరుగుదల కనిపించే సరికొత్త సమీకరణం తెరపైకి వచ్చింది. జస్టిస్ రంజనా ప్రకాష్ దేశాయ్ సారథ్యంలోని 8వ పే కమిషన్ బృందం వివిధ వర్గాల నుంచి అభిప్రాయాలు, ప్రతిపాదనల సేకరణను వేగవంతం చేసింది. చెన్నై, పుదుచ్చేరిలలో వివిధ భాగస్వాములతో ఇప్పటికే కీలక చర్చలు పూర్తికాగా, సెప్టెంబర్ 16 నుంచి 18 వరకు చండీగఢ్ వేదికగా మరో కీలక విడత సంప్రదింపులు జరగనున్నాయి. ఈ చర్చలన్నింటిలోనూ ఉద్యోగ సంఘాలు ముక్తకంఠంతో ఒకే ప్రధాన అంశాన్ని తెరపైకి తెస్తున్నాయి.. అదే ‘ఫిట్‌మెంట్ ఫ్యాక్టర్’ పెంపు.

తెరపైకి 3.83 ఫిట్‌మెంట్ డిమాండ్..

ప్రస్తుతం అమల్లో ఉన్న 7వ వేతన సంఘం ప్రకారం ఫిట్‌మెంట్ ఫ్యాక్టర్ 2.57గా ఉంది. దీనివల్లే గతంలో కనీస వేతనం రూ.7,000 నుంచి రూ.18,000కు చేరింది. అయితే పెరిగిన ద్రవ్యోల్బణం, నిత్యావసరాల ధరలను దృష్టిలో ఉంచుకుని, ఈసారి ఫిట్‌మెంట్ ఫ్యాక్టర్‌ను ఏకంగా 3.833 కు పెంచాలని ఆల్ ఇండియా పెన్షనర్స్ అసోసియేషన్, నేషనల్ కౌన్సిల్ ఆఫ్ జాయింట్ కన్సల్టేటివ్ మెకానిజం (NC-JCM), ఆల్ ఇండియా డిఫెన్స్ ఎంప్లాయీస్ ఫెడరేషన్ (AIDEF), ఆల్ ఇండియా ఎన్‌పీఎస్ ఎంప్లాయీస్ ఫెడరేషన్ గట్టిగా పట్టుబడుతున్నాయి.

ఒక్క లెక్కతో మారనున్న జీతాల రూపురేఖలు

నిజానికి ఉద్యోగుల కొత్త బేసిక్ పేను నిర్ణయించడంలో ఫిట్‌మెంట్ ఫ్యాక్టరే కీలకం. ప్రస్తుత కనీస మూల వేతనం రూ.18,000గా ఉంది. యూనియన్లు ప్రతిపాదిస్తున్న 3.83 ఫ్యాక్టర్ ప్రకారం లెక్కిస్తే ($18000 \times 3.83$), లెవెల్-1 ఉద్యోగి కనీస బేసిక్ పే నేరుగా రూ.68,940 కు చేరుకుంటుంది. అంటే ఎటువంటి అలవెన్సులు కలపకుండానే కేవలం ప్రాథమిక వేతనంలోనే దాదాపు రూ.50,940 నికర పెరుగుదల కనిపిస్తుంది.

వివిధ స్థాయిల్లో పెరగనున్న ప్రాథమిక వేతనాలు (అంచనా):
*లెవెల్ 2: ప్రస్తుత వేతనం రూ.19,900 నుంచి సుమారు రూ.76,217 కు

*లెవెల్ 3: ప్రస్తుత వేతనం రూ.21,700 నుంచి సుమారు రూ.83,111 కు

*లెవెల్ 4: ప్రస్తుత వేతనం రూ.25,500 నుంచి సుమారు రూ.97,665 కు

*లెవెల్ 5: ప్రస్తుత వేతనం రూ.29,200 నుంచి సుమారు రూ.1,11,836 కు

*లెవెల్ 6: ప్రస్తుత వేతనం రూ.35,400 నుంచి సుమారు రూ.1,35,582 కు పెరిగే అవకాశాలు ఉన్నాయి.

69 లక్షల మంది పెన్షనర్లకు ఊరట
ఈ మార్పు కేవలం 50 లక్షల మందికి పైగా ఉన్న సర్వీస్ ఉద్యోగులకే కాకుండా, దేశవ్యాప్తంగా ఉన్న దాదాపు 69 లక్షల మంది పెన్షనర్లకూ వర్తిస్తుంది. ఉదాహరణకు ప్రస్తుతం నెలకు రూ.25,000 పింఛను అందుకుంటున్న రిటైర్డ్ ఉద్యోగికి ఈ ఫిట్‌మెంట్ ఫార్ములా అమలైతే, ఆ మొత్తం ఏకంగా నెలకు రూ.95,750 వరకు చేరే అవకాశం ఉంటుంది. ఫిట్‌మెంట్ ఫ్యాక్టర్‌తో పాటు డీఏ, హెచ్‌ఆర్‌ఏ, ఇతర భత్యాలపై కూడా స్పష్టమైన ప్రతిపాదనలు సిద్ధమవుతున్నాయి. కమిటీ తన తుది నివేదికను 2027 మే లేదా జూన్ నాటికి ప్రభుత్వానికి సమర్పించవచ్చని భావిస్తున్నారు. యూనియన్ల పట్టుదలకు కేంద్ర ప్రభుత్వం గ్రీన్ సిగ్నల్ ఇస్తుందా లేదా అనేది ఉద్యోగ వర్గాల్లో తీవ్ర ఉత్కంఠ రేపుతోంది. ఒకవేళ ఈ డిమాండ్‌కు కేంద్రం మొగ్గు చూపితే, దేశంలోనే అతిపెద్ద వేతన విప్లవానికి నాంది పలికినట్లవుతుంది.