Womens Day: ఆడాళ్ళూ మీకు జోహార్లు!
ఈరోజు మహిళా దినోత్సవం. నిజం చెప్పాలంటే ఏదో ఒక రోజు కాదు. ప్రతి రోజు స్త్రీమూర్తులదే. తల్లిగా, అక్కగా, చెల్లిగా, భార్యగా మమతానురాగాలు పంచే స్త్రీమూర్తికి ప్రతిరోజూ మహిళా దినోత్సవమే. మాతృదేవోభవ,పితృదేవోభవ,ఆచార్యదేవోభవ,అతిధిదేవోభవ అని “స్త్రీ”ని ఉపనిషత్తులో అందరికంటే అగ్రపూజ అందవలసిన మాతృమూర్తిగా అభివర్ణించారు.స్త్రీ అను పదములో ‘స’కార, ‘త’కార, ‘ర’కారములున్నాయి. ‘ స’ కారము సత్వగుణానికి,’త’ కారము తమోగుణానికి, ‘ర’ కారము రజోగుణానికి ప్రతీకలుగా మన పెద్దలు చెబుతారు. ప్రకృతికి ప్రతీకగా స్త్రీని చెబుతారు.
నేడు స్త్రీలు పురుషులతో సమానంగా… రాజకీయం, విద్యారంగం, శాస్త్రసాంకేతిక రంగం… ఒక్కో సందర్భంలో అంతకుమించి అన్నిరంగాల్లో రాణిస్తున్నారు. ఋగ్వేదం అనేది పురుషునికి మరియి ఈ సభ్యసమాజానికి సూర్యకాంతి(ఉషస్సు) వంటిది అని స్త్రీలు తమ విద్యాశోభతో గృహాన్ని అనుకూలంగా తీర్చి దిద్దే శక్తి కేవలం స్త్రీకే సాధ్యపడుతుంది. స్త్రీ భావితరాలకు శిక్షణ,రక్షణగా నిలుస్తుందని తెలియజేసింది. వేదాల తర్వాత అంతంటి మహోన్నతమైనది మనుస్మృతి కూడా మహిళలకు మహోన్నత స్థానం ఇచ్చింది.
వేదకాలం నుండి స్త్రీని అత్యధికంగా గౌరవిస్తూనే స్త్రీ రక్షణ కొరకు అనుక్షణం ఆరాటపడుతూనే ఉంది.యవత్ సమాజంలో నేటికి కొనసాగుతూనే ఉంది. మహాత్మాగాంధీ కూడా ఈ మాటే అన్నాడు స్త్రీకి రక్షణ ఉంటే లోకానికే రక్షణ కలుగుతుందని చెప్పాడు.స్త్రీ తాను మరణయాతనను పొంది మరోజన్మనెత్తి జాతి మొత్తాన్ని కని పాలిచ్చి పెంచి,సకల సేవలనందిస్తూ,సృష్టిని సుస్థిరం చేస్తున్న మహోన్నత మూర్తి స్త్రీ. స్త్రీ సహకారం లేనిదే పురుషుడికి మనుగడే లేదు,జీవితమే లేదు అన్న సత్యాన్ని గ్రహించి అంతటి మహోన్నతమైన స్త్రీ మూర్తిని గౌరవిద్దాం. మహిళలు, విద్యార్ధినులు, చిరుప్రాయంలో వున్నవారిని కూడా కామాంధులు వదలడం లేదు. ఎన్ని చట్టాలు వచ్చినా వారికి తగిన విధంగా శిక్షలు పడడం లేదు. యత్రనార్యన్తు పూజ్యంతే-రమంతే తత్ర దేవతా: ఎక్కడైతే స్త్రీలను గౌరవిస్తారో అక్కడ దేవతలు కొలువుదీరి ఉంటారు. స్త్రీ మూర్తులందరికీ NTV మహిళా దినోత్సవ శుభాకాంక్షలు తెలుపుతోంది.