కాకినాడ జిల్లా వేటపాలెం శివార్లలోని ‘సూర్యశ్రీ ఫైర్ వర్క్స్’ కేంద్రంలో శనివారం మధ్యాహ్నం సంభవించిన భీకర విస్ఫోటం పెను విషాదాన్ని మిగిల్చింది. పచ్చని పొలాల మధ్య బాణసంచా తయారీలో నిమగ్నమైన కార్మికులపై మృత్యువు ఒక్కసారిగా విరుచుకుపడింది. ఈ ప్రమాదంలో 21 మంది ప్రాణాలు కోల్పోగా, పలువురి పరిస్థితి ఇప్పటికీ విషమంగానే ఉంది. ఈ ఘోర ప్రమాదం కేవలం ఒక యాదృచ్ఛిక ఘటన కాదని, పూర్తిగా మానవ తప్పిదం , భద్రతా నియమాల ఉల్లంఘన వల్ల జరిగిన ఘోరమని అధికారిక వర్గాలు ప్రాథమికంగా నిర్ధారించాయి.
మధ్యాహ్నం సుమారు రెండు గంటల సమయంలో, భోజన సమయం కావడంతో కొంతమంది కార్మికులు బయటకు వెళ్లిన తరుణంలో ఈ ప్రమాదం చోటుచేసుకుంది. యూనిట్లో ఒక్కసారిగా మంటలు చెలరేగడంతో భారీ స్థాయిలో నిల్వ ఉన్న బాణసంచా బాంబుల్లా పేలిపోయాయి. ఈ విస్ఫోటం ఎంత తీవ్రంగా ఉందంటే, దాని శబ్దం సుమారు ఐదు కిలోమీటర్ల మేర వినిపించడమే కాకుండా, సమీప గ్రామాల్లోని ఇళ్లపై కూడా ప్రభావం చూపింది. మృతదేహాలు తునాతునకలై 50 మీటర్ల దూరం వరకు గాలిలో ఎగిరి పొలాల్లో పడిపోయాయంటే పేలుడు తీవ్రత ఎంత భీకరంగా ఉందో అర్థం చేసుకోవచ్చు. దాదాపు 14 గంటల తర్వాత కూడా సంఘటనా స్థలంలో ఇంకా పొగలు వస్తూనే ఉన్నాయంటే నిల్వ ఉన్న మందుగుండు సామగ్రి ఎంత భారీగా ఉందో స్పష్టమవుతోంది.
NBK 111 Update: బాలయ్య సరికొత్త మేకోవర్.. ఈసారి డబిడదిబిడే!
ఫారెన్సిక్ నిపుణుల పరిశీలన ప్రకారం, ఈ విస్ఫోటానికి రెండు ప్రధాన కారణాలు ఉండవచ్చని తెలుస్తోంది. బాణసంచా తయారీలో కీలకమైన సల్ఫర్ను గొట్టాల్లో నింపి దట్టించే సమయంలో ఏదైనా చిన్నపాటి ఒరిపిడి జరిగి ఉండవచ్చు లేదా గాలిలో తేమ శాతం , రసాయనాల కలయికలో తేడా రావడం వల్ల ప్రమాదం సంభవించి ఉండవచ్చు. మరో ప్రధాన వెర్షన్ ప్రకారం, బాంబులకు ఉండే వత్తులను కట్ చేసే కటింగ్ మిషన్ వద్ద కార్మికులు నిర్లక్ష్యంగా వ్యవహరించడం వల్ల వచ్చిన ఒక చిన్న నిప్పురవ్వ (Spark), పక్కనే ఉన్న భారీ నిల్వలకు అంటుకుని ఉండవచ్చని భావిస్తున్నారు. ఈ రెండు సందర్భాల్లోనూ మానవ తప్పిదమే ప్రధాన పాత్ర పోషించిందని అధికారులు స్పష్టం చేస్తున్నారు.
నిజానికి ఈ పరిశ్రమకు 2027 వరకు అనుమతులు ఉన్నప్పటికీ, క్షేత్రస్థాయిలో భద్రతా ప్రమాణాలను యజమాన్యం పూర్తిగా విస్మరించింది. నిబంధనల ప్రకారం ఒక షెడ్డులో కేవలం ఎనిమిది మంది మాత్రమే ఉండాల్సి ఉండగా, జాతరల కోసం వచ్చిన భారీ ఆర్డర్లను పూర్తి చేసే తొందరలో ఏకంగా 20 మందికి పైగా కార్మికులను ఒకే చోట కూర్చోబెట్టి పనులు చేయించారు. దీనివల్ల ప్రమాదం జరిగినప్పుడు తప్పించుకునే అవకాశం లేకుండా పోయింది. అలాగే, శిక్షణ లేని (Unskilled) కార్మికులతో ప్రమాదకరమైన రసాయనాలను హ్యాండిల్ చేయించడం, ఫైర్ సేఫ్టీ పరికరాలు అందుబాటులో లేకపోవడం వంటి అంశాలు ప్రాణనష్టాన్ని పెంచాయి.
ఈ ఘటనపై తీవ్రంగా స్పందించిన ప్రభుత్వం ఇప్పటికే నలుగురు అధికారులపై కఠిన చర్యలు తీసుకుంది. యజమాని కూడా ఈ ప్రమాదంలో మరణించగా, ఆయన కుమారులను పోలీసులు అదుపులోకి తీసుకున్నారు. ప్రస్తుతం పశ్చిమ బెంగాల్ లేదా ఇతర ప్రాంతాల నుంచి వచ్చిన కార్మికుల వివరాలను కూడా అధికారులు సేకరిస్తున్నారు. ఈ విషాదం బాణసంచా తయారీ రంగంలో ఉన్న లొసుగులను మరోసారి ఎత్తిచూపింది. అధికారుల తనిఖీలు కేవలం కాగితాలకే పరిమితం కాకుండా, ప్రత్యక్షంగా భద్రతా ప్రమాణాలను పర్యవేక్షించినప్పుడే ఇలాంటి ‘మానవ నిర్మిత’ విపత్తులను అరికట్టడం సాధ్యమవుతుంది.
With Love : ఓటీటీ డేట్ ఫిక్స్ చేసుకున్న “విత్ లవ్”..
