Kotam Reddy Sridhar Reddy: చిన్నారికి అండగా నిలిచిన వైసీపీ ఎమ్మెల్యే

నెల్లూరు రూరల్‌ వైసీపీ ఎమ్మెల్యే కోటంరెడ్డి శ్రీధర్‌రెడ్డి తన మంచి మనసు చాటుకున్నారు. దీంతో ఆయనపై సర్వత్రా ప్రశంసలు కురుస్తున్నాయి. గుండె సమస్యతో ఆపదలో ఉన్న ఓ చిన్నారికి ఎమ్మెల్యే కోటంరెడ్డి అండగా నిలిచారు. ఉప్పుటూరు గ్రామంలో ఎమ్మెల్యే కోటంరెడ్డి ఇటీవల గడప గడపకు ప్రభుత్వం కార్యక్రమం నిర్వహిస్తుండగా.. గిరిజన కుటుంబానికి చెందిన చిన్నారి స్నేహకు గుండె సమస్య ఉన్నట్లు ఆయన దృష్టికి వచ్చింది. దీంతో వెంటనే స్పందించి కారు ఏర్పాటు చేసి తన ప్రతినిధిని పంపించి తిరుపతిలోని ఓ ఆస్పత్రికి చిన్నారిని తరలించారు. అంతేకాకుండా ఎమ్మెల్యే కోటంరెడ్డి వైద్యులతో స్వయంగా మాట్లాడి ఆరోగ్యశ్రీ కింద చిన్నారికి ఆపరేషన్ పూర్తయ్యేలా చేశారు.

Read Also: YCP Vs TDP: CNOS ముఖ్యమంత్రుల పనితీరు ర్యాంకులపై మాటల యుద్ధం

ఈ ఆపరేషన్ విజయవంతమై చిన్నారి కోలుకోవడంతో ఎమ్మెల్యే కోటంరెడ్డి శ్రీధర్‌రెడ్డి సంతోషం వ్యక్తం చేశారు. ఈ నేపథ్యంలో సర్జరీ అనంతరం కోలుకున్న చిన్నారి తల్లిదండ్రులతో కలిసి మంగళవారం నాడు నెల్లూరు రూరల్ ఎమ్మెల్యే కార్యాలయానికి చేరుకుంది. తన అండగా నిలిచిన ఎమ్మెల్యే కోటంరెడ్డి శ్రీధర్ రెడ్డికి స్నేహ తల్లిదండ్రులు కృతజ్ఞతలు తెలిపారు. తమ ఇంటి పెద్దన్నలా ఆదుకున్న ఎమ్మెల్యేకు చిన్నారి కొత్త బట్టలు పెట్టి కృతజ్ఞతలు తెలియజేశారు. చిన్నారి స్నేహతో ఎమ్మెల్యే కోటంరెడ్డి ఆప్యాయంగా ముచ్చటించి ఆరోగ్యంపై జాగ్రత్తలు తీసుకోవాలని సూచించారు. చిన్నారి స్నేహ కుటుంబానికి తన మద్దతు ఎప్పుడూ ఉంటుందని భరోసా ఇచ్చారు.