Jogi Ramesh: నెల్లూరు టిడ్కో ఇళ్ల వద్ద టీడీపీ అధినేత చంద్రబాబు సెల్ఫీలపై రాష్ట్ర గృహనిర్మాణ శాఖ మంత్రి జోగి రమేష్‌ కౌంటర్ ఇచ్చారు.. టిడ్కో ఇళ్లను నేనే కట్టేసానని చెప్పుకోవడానికి సిగ్గులేదా చంద్రబాబు? అంటూ ఫైర్‌ అయ్యారు.. చంద్రబాబుది మేనిఫెస్టో పార్టీకాదు.. సెల్ఫీల పార్టీ.. చార్మినార్, తాజ్‌మహల్ కూడా తానే కట్టేశానని ఓ సెల్ఫీ తీసుకునేట్టున్నారు అంటూ ఎద్దేవా చేశారు.. తండ్రీ, కొడుకులు సెల్ఫీ బాబులు, కామెడీ రాజాలు అని కామెంట్‌ చేశారు.. చంద్రబాబే టిడ్కోఇళ్లన్నీ కట్టేస్తే.. మరి ఈ ప్రభుత్వం వచ్చాక రూ.8734 కోట్లు టిడ్కో ఇళ్ల కోసం ఎందుకు పెట్టినట్టు? అందులో రూ. 5840 కోట్లతో నిర్మాణ పనులు ఎందుకు చేసినట్టు? మౌలిక సదుపాయాలు కోసం రూ.725 కోట్లు ఎందుకు ఖర్చు పెట్టినట్టు? మీరు వదిలి వెళ్లిపోయిన రూ.3 వేల కోట్లు బకాయిలు ఎవరు తీర్చినట్టు? అని ప్రశ్నల వర్షం కురిపించారు.
Read Also: Top Headlines @ 9 PM: టాప్‌ న్యూస్
చంద్రబాబు ప్రభుత్వం హయాంలో 300 అడుగుల టిడ్కో ఇల్లు కోసం నెలకు రూ.3 వేలు చొప్పున 20 ఏళ్లపాటు కట్టాలి.. మొత్తంగా 7.2 లక్షలు ఆ పేదవాడు భరించాలి అనేది వాస్తవం కాదా? అని నిలదీశారు మంత్రి జోగి రమేష్‌.. మా ప్రభుత్వం పేదల పై భారం లేకుండా ఇల్లును ఉచితంగా ఇస్తున్నాం.. ప్రజల పై రూ.3,805.4 కోట్ల భారం పడకుండా చూశాం.. 365 చదరపు అడుగుల, 430 చ.అ. ఫ్లాట్ల లబ్ధిదారులకు ముందస్తు చెల్లింపుల్లో 50 శాతం సబ్సిడీ ఇస్తున్నాం.. దీని ద్వారా రూ.482.31 కోట్లు సబ్సిడీని మా ప్రభుత్వం ఇచ్చింది.. లబ్ధిదారులకు ఒక్క రూపాయికే రిజిస్ట్రేషన్ ద్వారా ప్రభుత్వం రూ.1200 కోట్ల వ్యయాన్ని భరించిందని వెల్లడించారు.. ఇక, చంద్రబాబు రాజకీయ జీవితాన్ని సమాధి కట్టే పేదల ఇళ్లు ఇవి అని వార్నింగ్‌ ఇచ్చారు మంత్రి జోగి రమేష్‌.
