Kadambari Jethwani : సీఐడీ ఛార్జ్‌షీట్‌పై కాదంబరి జెత్వానీ ఫైర్.!

విజయవాడలో నమోదైన కేసులకు సంబంధించి సీఐడీ దాఖలు చేసిన ఛార్జ్‌షీట్‌లోని అంశాలపై ముంబై సినీ నటి కాదంబరి జెత్వానీ తీవ్ర అభ్యంతరం వ్యక్తం చేశారు. తనను, తన కుటుంబ సభ్యులను అన్యాయంగా ఇబ్బందులకు గురిచేశారని ఆవేదన వ్యక్తం చేస్తూ ఆమె ఒక వీడియో ప్రకటనను విడుదల చేశారు. 2024లో ఆంధ్రప్రదేశ్‌లో తమపై ఉద్దేశపూర్వకంగా, కుట్రపూరితంగా తప్పుడు కేసులు బనాయించారని ఆరోపించారు. దర్యాప్తు సమయంలో తన వాంగ్మూలాన్ని, వాదనలను పూర్తిగా పక్కనపెట్టి వాస్తవాలను వక్రీకరించారని, కొన్ని మీడియా సంస్థలు కూడా అసత్య కథనాలను ప్రచారం చేస్తున్నాయని మండిపడ్డారు. దాదాపు రెండున్నర సంవత్సరాల సుదీర్ఘ అన్యాయ పోరాటం తర్వాత తమ కుటుంబం నిర్దోషిగా తేలినప్పటికీ, కేవలం 20 పేజీల సీఐడీ ఛార్జ్‌షీట్‌లో తనపై నిరాధారమైన ఆరోపణలు మోపడం తీవ్రంగా ఖండించాల్సిన విషయమని పేర్కొన్నారు.

ఆర్థిక లావాదేవీలపై స్పష్టత

కుక్కల విద్యాసాగర్ తన ఖాతాలో జమ చేసిన రూ. 4.5 లక్షలు, కాల్ రికార్డులను సీఐడీ నేర ఆధారాలుగా చూపించడంపై జెత్వానీ స్పందించారు. ఆ డబ్బు తాను చేసిన పనికి లభించిన పారితోషికం అని, విద్యాసాగర్ దానిని స్వచ్ఛందంగానే చెల్లించారని స్పష్టం చేశారు. ఇంకా రావాల్సిన బకాయిల కోసం మాత్రమే అతనిని సంప్రదించాల్సి వచ్చిందని, ఇవి ఏమాత్రం నేరపూరిత లావాదేవీలు కావు అని వివరించారు. ఈ స్వల్ప లావాదేవీని రూ. 1.32 కోట్లుగా చిత్రించడం, ఛార్జ్‌షీట్‌లో “తప్పుడు అత్యాచార కేసు బెదిరింపులు”, “బ్లాక్‌మెయిల్”, “ర్యాకెట్” వంటి తీవ్రమైన పదాలను ఉపయోగించడం ఒక అవివాహిత యువతిపై చేసిన దారుణమైన అన్యాయమని వాపోయారు.

వేధింపులు , సీఐడీ తీరుపై విమర్శలు

విద్యాసాగర్ నేరపూరిత నేపథ్యం తెలిసిన వెంటనే తాను అతని వివాహ ప్రతిపాదనను తిరస్కరించానని నటి తెలిపారు. దాంతో కక్ష పెంచుకున్న విద్యాసాగర్ తనకు నగ్న సెల్ఫీలు పంపి మానసికంగా వేధించాడని, చివరికి ఆ ఫోటోనే సీఐడీ “అభ్యంతరకర ఫోటో”గా చూపించడం విచారకరమని అన్నారు. ఫిర్యాదుదారుడితో తన పరిచయం , ఆర్థిక లావాదేవీలు పదేళ్ల క్రితమే ముగిసిపోయాయని తెలిపారు. ఇదే వ్యవహారంలో గతంలో గౌరవ న్యాయస్థానంలో జరిగిన విచారణ ఆధారంగా విద్యాసాగర్‌తో పాటు ముగ్గురు సస్పెండైన సీనియర్ ఐపీఎస్ అధికారులపై చర్యలు తీసుకున్న విషయాన్ని గుర్తుచేశారు. సాక్షుల వాంగ్మూలాలను వక్రీకరించి తనపై కేసు నిలబెట్టే ప్రయత్నం చేస్తున్నారని, ఇప్పటికైనా నిష్పాక్షికమైన దర్యాప్తు జరిగి నిజం గెలవాలని ఆమె ఆకాంక్షించారు.

ఛార్జ్‌షీట్‌లో ఆరోపణలను ఖండించిన నటి#
రూ.4.5 లక్షల లావాదేవీలపై వివరణ#
సీఐడీ దర్యాప్తుపై తీవ్ర అభ్యంతరాలు#
నిష్పాక్షిక విచారణ కోరిన కాదంబరి