Cyclone Arnab : ఉత్తర కోస్తాకు ముంచుకొస్తున్న ‘అర్ణబ్’ తుఫాన్ ముప్పు..

బంగాళాఖాతంలో ఏర్పడిన వాయుగుండం తీవ్ర రూపం దాలుస్తుండటంతో ఆంధ్రప్రదేశ్‌లోని ఉత్తర కోస్తా జిల్లాలకు తీవ్ర తుఫాన్ ముప్పు పొంచి ఉంది. తూర్పు మధ్య బంగాళాఖాతంలో కొనసాగుతున్న తీవ్ర అల్పపీడనం బలపడి వాయుగుండంగా మారనుందని భారత వాతావరణ శాఖ (IMD) హెచ్చరించింది. పశ్చిమ వాయువ్య దిశగా కదులుతున్న ఈ వాయుగుండం అక్టోబర్ 26 ఉదయం నాటికి తుఫాన్‌గా బలపడే అవకాశం ఉంది. ఈ తుఫాన్‌కు ‘అర్ణబ్’ (Arnab)గా నామకరణం చేసే ఛాన్స్ ఉందని వాతావరణ శాఖ తెలిపింది. ఇది మరింత బలపడి అక్టోబర్ 28 మధ్యాహ్న సమయానికి మచిలీపట్నం – విశాఖ మధ్య తీరం దాటే అవకాశం ఉందని విశాఖ తుఫాన్ హెచ్చరికల కేంద్రం అంచనా వేసింది.

భారీ గాలులు, వర్షాల తీవ్రత.. మత్స్యకారులకు హెచ్చరికలు

తుఫాన్ ప్రభావంతో అక్టోబర్ 26 నుంచి రాష్ట్రంలో ఈదురుగాలుల తీవ్రత, వర్షాలు భారీగా పెరగనున్నాయి. సముద్రం తీవ్రంగా అలజడిగా మారనుండటంతో గంటకు 120 కిలోమీటర్ల వేగంతో బలమైన గాలులు వీచే ప్రమాదం ఉందని హెచ్చరించారు. ఈ నేపథ్యంలో సముద్రంలో వేటకు వెళ్లిన మత్స్యకారులు తక్షణమే సురక్షిత ప్రాంతాలకు, తీరానికి తిరిగి రావాలని అధికారులు స్పష్టమైన ఆదేశాలు జారీ చేశారు. అక్టోబర్ 27, 28 తేదీల్లో తీరం వెంబడి పరిస్థితి మరింత ఆందోళనకరంగా మారే అవకాశం ఉంది.

జిల్లాల వారీగా రెడ్, ఆరెంజ్, ఎల్లో అలర్ట్‌లు జారీ

తుఫాన్ ముప్పు పొంచి ఉన్న నేపథ్యంలో రాష్ట్ర విపత్తు నిర్వహణ శాఖ వివిధ జిల్లాలకు హెచ్చరికలు జారీ చేసింది. అక్టోబర్ 27న కృష్ణా , ఎన్టీఆర్ జిల్లాలకు ‘రెడ్ అలెర్ట్’ ప్రకటించారు. తుఫాన్ తీరం దాటే సమయంలో విశాఖపట్నం నుంచి బాపట్ల జిల్లాల వరకు అత్యంత తీవ్ర ప్రభావం ఉండే అవకాశం ఉన్నందున ఆయా జిల్లాలకు రెడ్ అలర్ట్ కొనసాగనుంది. అలాగే అల్లూరి సీతారామరాజు (మన్యం), విజయనగరం, శ్రీకాకుళం జిల్లాలకు ‘ఆరెంజ్ బులెటిన్’ హెచ్చరికలు జారీ చేయగా, పల్నాడు, నెల్లూరు, ప్రకాశం జిల్లాలకు ‘ఎల్లో వార్నింగ్’ జారీ చేశారు. ప్రజలందరూ అప్రమత్తంగా ఉండాలని, తగిన ముందస్తు జాగ్రత్తలు తీసుకోవాలని యంత్రాంగం విజ్ఞప్తి చేసింది.