Nara Lokesh: మదనపల్లెకు ఎంతో ఘనమైన చరిత్ర ఉందని మంత్రి నారా లోకేష్ అన్నారు. గాంధీ జయంతి రోజున మదనపల్లెలో మాట్లాడటం సంతోషంగా ఉందని తెలిపారు. అన్నమయ్య జిల్లా మదనపల్లెలో రాయలసీమ హార్టికల్చర్ హబ్, ఇండియన్ స్కూల్ ఆఫ్ అగ్రికల్చర్ కార్యక్రమాల సందర్భంగా ఆయన మాట్లాడుతూ.. రాయలసీమలో ప్రాజెక్టులను ప్రారంభించింది తెలుగుదేశం పార్టీనేనని, వాటిని పూర్తి చేసింది కూడా టీడీపీ ప్రభుత్వమేనని పేర్కొన్నారు. కరువు ప్రాంతాల్లోనూ అభివృద్ధి సాధిస్తూ పరిశ్రమలు, ఉపాధి అవకాశాలకు మార్గం సుగమం చేశామని అన్నారు. తాను పాదయాత్ర చేస్తున్న సమయంలో రాళ్లు, కోడిగుడ్లు వేసి ఇబ్బందులు పెట్టారని లోకేష్ గుర్తుచేసుకున్నారు.. అయితే, వైసీపీ నేతలు ఎన్నో ఇబ్బందులు పెట్టినా రాయలసీమ ప్రజలు తనను అక్కున చేర్చుకున్నారని చెప్పారు. పాదయాత్రలో భాగంగా రాయలసీమలో పర్యటించినప్పుడు రైతుల సమస్యలను స్వయంగా చూశానని, వారి కష్టాలను విన్నానని తెలిపారు. రైతుల సమస్యలు, వారి ఇబ్బందులపై సీఎం చంద్రబాబుకు పూర్తి అవగాహన ఉందని పేర్కొన్నారు.
ఒకప్పుడు కరువు ప్రాంతంగా ఉన్న రాయలసీమను ప్రస్తుతం బంగారు నేలగా మార్చే దిశగా అభివృద్ధి జరుగుతోందని లోకేష్ అన్నారు. డ్రిప్ ఇరిగేషన్‌కు శ్రీకారం చుట్టిన వ్యక్తి చంద్రబాబేనని, ఇది వ్యవసాయ రంగంలో సంచలనాత్మక నిర్ణయమని పేర్కొన్నారు. రాయలసీమలో సాగునీటి ప్రాజెక్టులు, ఆధునిక వ్యవసాయ విధానాలతో రైతులకు మరింత ప్రయోజనం కల్పించాల్సిన అవసరం ఉందన్నారు. రాయలసీమ పౌరుషం ఏంటో అందరికీ తెలుసని, ఇప్పుడు రాయలసీమ రైతుల సత్తా ఏంటో ప్రపంచం చూస్తుందని లోకేష్ అన్నారు. రాయలసీమను హార్టికల్చర్ హబ్‌గా తీర్చిదిద్దే బాధ్యత తమదేనని స్పష్టం చేశారు. ఈ ప్రాంత రైతులు పండించిన పంటలకు దేశీయ మార్కెట్‌తో పాటు అంతర్జాతీయ మార్కెట్లను కూడా అందుబాటులోకి తీసుకురావాలని, రాయలసీమలో పండే పంటలు ఇతర దేశాలకు సైతం ఎగుమతి అయ్యేలా చర్యలు తీసుకోవాలని తెలిపారు.
రైతు సంక్షేమం, ఉద్యాన పంటల అభివృద్ధి, ఆధునిక సాంకేతికత, మార్కెటింగ్ సదుపాయాలను సమన్వయం చేసి రాయలసీమను ప్రపంచ స్థాయి ఉద్యానవన కేంద్రంగా తీర్చిదిద్దాలనే లక్ష్యంతో ప్రభుత్వం ముందుకు సాగుతోందని లోకేష్ పేర్కొన్నారు. మదనపల్లె వేదికగా ప్రారంభమైన హార్టికల్చర్ హబ్ ద్వారా ఈ ప్రాంత రైతులకు కొత్త అవకాశాలు ఏర్పడతాయని ఆయన అన్నారు. రూ.లక్ష కోట్ల ప్రణాళికతో హార్టికల్చర్ హబ్‌ను అభివృద్ధి చేయనున్నట్లు పేర్కొన్నారు మంత్రి నారా లోకేష్..
