ఏపీపీఎస్సీ గ్రూప్-1 జవాబు పత్రాల మూల్యాంకనంపై ఏపీ హైకోర్టులో తుది విచారణ కొనసాగుతోంది. ఉద్యోగాలకు ఎంపిక కాని అభ్యర్థుల తరఫు న్యాయవాదులు, ఎంపిక ప్రక్రియలో ప్రతి దశలోనూ అక్రమాలు జరిగాయని కోర్టు దృష్టికి తీసుకెళ్లారు. ముఖ్యంగా ఉద్యోగాలకు ఎంపికైన 160 మంది అభ్యర్థుల ఓయమ్మార్ స్లిప్పుల్లో దిద్దుబాట్లు, ఓవర్రైటింగ్ ఉన్నాయని వారు వాదించారు. రాజ్యాంగబద్ధ సంస్థ అయిన ఏపీపీఎస్సీ తన విధి నిర్వహణలో అన్ని రకాలుగా విఫలమైందని ఎంపిక కాని అభ్యర్థుల తరఫు న్యాయవాదులు ఆరోపించారు. మూల్యాంకన ప్రక్రియలో చోటుచేసుకున్న అంశాలను పరిశీలించాల్సిన అవసరం ఉందని కోర్టు దృష్టికి తీసుకెళ్లారు.
మరోవైపు ఉద్యోగాలకు ఎంపికైన అభ్యర్థుల తరఫున సీనియర్ న్యాయవాదులు తమ వాదనలు వినిపించారు. హైల్యాండ్లో జరిగిన మూల్యాంకనం నిబంధనలకు అనుగుణంగా జరగలేదనే కారణంతోనే విజయవాడలో మరోసారి మూల్యాంకనం చేయాలని ఏపీపీఎస్సీ చైర్మన్ నిర్ణయం తీసుకున్నారని పేర్కొన్నారు. ఎగ్జామినర్లు చేసిన పొరపాట్లకు అభ్యర్థులను బాధ్యులను చేయడానికి వీల్లేదని ఎంపికైన అభ్యర్థుల తరఫు న్యాయవాదులు వాదించారు. అలాగే అభ్యర్థుల ఎంపికలో అక్రమాలు జరిగినట్లు సిట్ ఎక్కడా నిర్ధారించలేదని కోర్టుకు వివరించారు. ఈ వ్యవహారంపై ఇరువర్గాల వాదనలు కొనసాగుతున్న నేపథ్యంలో ఏపీ హైకోర్టులో విచారణ నేడు కూడా కొనసాగనుంది.