AP JUDA: స్టైపెండ్ పెంపుపై జూడాల అసంతృప్తి.. ప్రభుత్వానికి కోర్టు ధిక్కరణ నోటీసులు

AP JUDA: జూనియర్ డాక్టర్ల స్టైపెండ్ పెంపు అంశం ఆంధ్రప్రదేశ్‌లో మరోసారి వివాదంగా మారింది.. ప్రభుత్వం తాజాగా జారీ చేసిన జీవో ఎంఎస్ నం.141లో ప్రకటించిన స్టైపెండ్ సవరణను ఏపీ జూనియర్ డాక్టర్స్ అసోసియేషన్ (APJUDA) వ్యతిరేకించింది. తమతో తుది శాతం, షరతులపై పరస్పర అంగీకారం కుదరకముందే ప్రభుత్వం ఏకపక్షంగా నిర్ణయం తీసుకుని ఉత్తర్వులు జారీ చేసిందని APJUDA పేర్కొంది. ప్రభుత్వ ఉత్తర్వుల ప్రకారం, 2026 జనవరి 1 నుంచి ప్రభుత్వ వైద్య, దంత వైద్య కళాశాలల్లోని ఇంటర్న్‌లకు ప్రస్తుత స్టైపెండ్‌పై 10 శాతం, PGలు, సూపర్ స్పెషాలిటీ PGలు, MDS, DNB విద్యార్థులకు 5 శాతం పెంపు వర్తిస్తుంది. అనంతరం 2027 జనవరి 1 నుంచి అన్ని సంబంధిత వర్గాల స్టైపెండ్ రేట్లను ఏటా 3.5 శాతం చొప్పున పెంచాలని ప్రభుత్వం నిర్ణయించింది.

అయితే ఈ సవరణను APJUDA అంగీకరించడం లేదని స్పష్టం చేసింది. ముఖ్యంగా సీనియర్ రెసిడెంట్లు కూడా APJUDAలో అంతర్భాగమని, వారి సమస్యలను గతంలోనే ప్రభుత్వానికి చేసిన ప్రతినిధిత్వాల్లో స్పష్టంగా ప్రస్తావించామని తెలిపింది. తాజా స్టైపెండ్ సవరణలో సీనియర్ రెసిడెంట్లను చేర్చలేదని అసోసియేషన్ అభ్యంతరం వ్యక్తం చేసింది. ప్రభుత్వం ప్రస్తుత ఉత్తర్వులను పునఃపరిశీలించి, APJUDAతో మరోసారి చర్చలు జరపాలని జూడాలు కోరుతున్నారు. పరస్పర అంగీకారంతో న్యాయసమ్మతమైన స్టైపెండ్ సవరణను నిర్ణయించాలని డిమాండ్ చేశారు. ఏకపక్షంగా నిర్ణయం తీసుకోవడం వల్ల తమ సమస్యలు పరిష్కారం కావని స్పష్టం చేశారు.

హైకోర్టు ఆదేశాల అమలుపై కోర్టు ధిక్కరణ నోటీసులు
ఇదిలా ఉండగా, తమ స్టైపెండ్‌కు సంబంధించిన అంశంలో ప్రభుత్వం హైకోర్టు ఆదేశాలను అమలు చేయలేదంటూ APJUDA ప్రభుత్వానికి లీగల్ నోటీసులు జారీ చేసింది. హైకోర్టు ఇచ్చిన ఆదేశాలను పాటించకపోతే కోర్టు ధిక్కరణ చర్యలను ఎదుర్కోవాల్సి ఉంటుందని నోటీసులో పేర్కొంది. PIL No.193/2026లో హైకోర్టు ఇచ్చిన ఆదేశాలను అమలు చేయకపోతే తిరిగి హైకోర్టును ఆశ్రయిస్తామని APJUDA హెచ్చరించింది. ప్రభుత్వం వెంటనే స్పందించాలని, ఈ నోటీసును తుది నోటీసుగా పరిగణించాలని అసోసియేషన్ పేర్కొన్నట్లు తెలిపింది.

జీవో 141లో ప్రభుత్వం ఏం చెప్పింది?
ప్రభుత్వం జారీ చేసిన జీవో ప్రకారం 2026 జనవరి 1 నుంచి ఇంటర్న్‌లకు 10 శాతం, PGలు, సూపర్ స్పెషాలిటీ PGలు, MDS, DNB విద్యార్థులకు 5 శాతం స్టైపెండ్ పెంపు అమలు చేయనున్నారు. 2027 జనవరి 1 నుంచి ఈ వర్గాలన్నింటికీ ఏటా 3.5 శాతం చొప్పున పెంపు కొనసాగించాలని ప్రభుత్వం ఆదేశించింది. ఈ ప్రతిపాదన వల్ల ప్రస్తుతం స్టైపెండ్‌ల కోసం చేస్తున్న ఖర్చుకు అదనంగా ప్రభుత్వంపై సంవత్సరానికి సుమారు రూ.34.08 కోట్ల అదనపు ఆర్థిక భారం పడుతుందని ఉత్తర్వుల్లో పేర్కొన్నట్లు సమాచారం. 2027 నుంచి ఏటా 3.5 శాతం పెంపు కొనసాగుతుందని ప్రభుత్వం పేర్కొంది. అయితే ప్రభుత్వం ప్రకటించిన ఈ సవరణపై APJUDA అసమ్మతి వ్యక్తం చేయడంతో జూడాల స్టైపెండ్ అంశం మరోసారి వివాదంగా మారింది. ప్రభుత్వం తమతో చర్చించి, సీనియర్ రెసిడెంట్లను కూడా పరిగణనలోకి తీసుకుని తుది నిర్ణయం తీసుకోవాలని డిమాండ్ చేస్తోంది ఏపీ జూనియర్ డాక్టర్స్ అసోసియేషన్ (APJUDA)..