AP Local Body Elections: స్థానిక ఎన్నికలకు అధికారులు రెడీ.. ఎస్‌ఈసీ అనిల్ చంద్ర పునేఠా కీలక ప్రకటన

AP Local Body Elections: ఆంధ్రప్రదేశ్‌లో స్థానిక ఎన్నికలపై కీలక ప్రకటన చేశారు ఎస్‌ఈసీ అనిల్ చంద్ర పునేఠా.. స్థానిక సంస్థల ఎన్నికల నిర్వహణకు అధికారులు అన్ని విధాలుగా సిద్ధంగా ఉన్నారని తెలిపారు. జిల్లా స్థాయిలో కలెక్టర్లు, ఎస్పీలు, ఇతర జిల్లా అధికారులు, పంచాయతీరాజ్, మున్సిపల్ శాఖ అధికారులతో వీడియో కాన్ఫరెన్స్ నిర్వహించి ఎన్నికల ఏర్పాట్లపై సమీక్షించినట్లు చెప్పారు. గత రెండు నెలలుగా స్థానిక ఎన్నికలకు సంబంధించి అన్ని విధాలుగా ఏర్పాట్లు చేస్తున్నామని పునేఠా వెల్లడించారు. ఎన్నికల నిర్వహణకు అధికారులు పూర్తిగా సిద్ధంగా ఉన్నారని తెలిపారు. సుప్రీంకోర్టు తీర్పు వెలువడిన అనంతరం ఎన్నికలు నిర్వహించేందుకు ఎస్‌ఈసీ సిద్ధంగా ఉందని స్పష్టం చేశారు.

స్థానిక సంస్థల ఎన్నికలను దశల వారీగా నిర్వహిస్తామని పునేఠా తెలిపారు. 2026 ఫిబ్రవరి 5వ తేదీ వరకు ఉన్న ఫొటో ఓటర్ల జాబితాను ప్రాతిపదికగా తీసుకుంటామని చెప్పారు. ఎన్నికల నిర్వహణకు అవసరమైన బ్యాలెట్ బాక్సులు, బ్యాలెట్ పేపర్లు సిద్ధంగా ఉన్నాయని వెల్లడించారు. బ్యాలెట్ పేపర్ల ముద్రణ కోసం ప్రింటింగ్ ప్రెస్‌ను కూడా ఖరారు చేయనున్నట్లు ఎస్‌ఈసీ తెలిపారు. ఇక, సుప్రీంకోర్టు తీర్పు అనంతరం ఎన్నికల ప్రక్రియను వేగంగా ముందుకు తీసుకెళ్లేందుకు ఇప్పటికే అవసరమైన ఏర్పాట్లు పూర్తి చేశామని అనిల్ చంద్ర పునేఠా పేర్కొన్నారు.