అఫ్కోర్స్.. ఆల్రెడీ పెళ్లయి, పిల్లలున్న వాళ్లు మళ్ళీ పెళ్లి చేసుకున్న సందర్భాల్ని మనం ఎన్నో చూశాం. కానీ, ఈ పెళ్లి మాత్రం అలా కాదు. ఇందులో మీకు ఊహించని ట్విస్టులు ఉంటాయి. ఒకే వేదికపై ఇద్దరు తల్లుల్ని ఓ వ్యక్తి పెళ్లి చేసుకున్నాడు. ఇంతకీ ఆ పిల్లల తండ్రి ఎవరనుకుంటున్నారు? ఆ వరుడే! ఇద్దరు యువతుల్ని ప్రేమించిన అతగాడు.. వారితో పిల్లల్ని కన్న తర్వాత ఒకే వేదికపై పెళ్లి చేసుకున్నాడు. ఈ అరుదైన సంఘటన ఛత్తీస్గఢ్, బస్తర్ జిల్లాలో జరిగింది.
కేశ్కాల్ ప్రాంతంలోని ఉమ్లా గ్రామానికి చెందిన రంజన్ సింగ్ సలామ్కి తొలుత ఆండేగా గ్రామానికి చెందిన దుర్గేశ్వరీ మార్కమ్ అనే యువతితో నిశ్చితార్థం అయింది. అప్పట్నుంచి ఆమె రంజన్ సింగ్ ఇంట్లోనే ఉంటూ వచ్చింది. కొన్ని నెలల తర్వాత ఆమె ఓ ఆడపిల్లకు జన్మనిచ్చింది. కట్ చేస్తే.. దుర్గేశ్వరీ తన ఇంట్లో ఉండగానే అంవరీ గ్రామానికి చెందిన సన్నో బాయి అనే మరో యువతిని రంజన్ సింగ్ చాటుగా ప్రేమవ్యవహారం కొనసాగించాడు. ఈ క్రమంలోనే ఆమె కూడా గర్భం దాల్చింది. ఈ విషయం గ్రామస్థులకు తెలియడంతో, పెద్ద దుమారమే రేగింది. గ్రామంలో పంచాయతీ సైతం నిర్వహించారు. చివరికి.. ఆ ఇద్దరిని రంజన్ సింగ్ పెళ్లి చేసుకోవడమే సరైన పరిష్కారమని గ్రామ పెద్దలు నిర్ణయించారు.
ఆ ఇద్దరు యువతుల్ని రంజన్ సింగ్ను వివాహమాడాల్సిందిగా ఒప్పించారు. తొలుత వాళ్లు ఒప్పుకోకపోయినా, అనంతరం అంగీకరించారు. పెద్దలు కూడా సరేనని చెప్పడంతో.. ఒకే వేదికపై ఈనెల 8న ఆ ఇద్దరిని రంజన్ సింగ్ వివాహం చేసుకున్నాడు. ఇలాంటి పెళ్లి తొలిసారి జరగడంతో.. ఈ వివాహ తంతును చూసేందుకు ఉమ్లా గ్రామస్థులతో పాటు చుట్టుపక్కల గ్రామాలవారు సైతం తరలివచ్చారు.