Fact Check: ఈ మధ్య సోషల్ మీడియాలో ఈ20 (E20) పెట్రోల్కు సంబంధించిన ఓ వీడియో విపరీతంగా వైరల్ అవుతోంది. ఇథనాల్ కలిపిన ఈ పెట్రోల్ వాడటం వల్ల వాహనాల ఫ్యూయల్ క్యాప్ (పెట్రోల్ ట్యాంక్ మూత) చుట్టూ చీమలు చేరుతున్నాయనేది ఆ వీడియో సారాంశం. చూస్తుండగానే ఈ వార్త వేల మందికి చేరడంతో వాహనదారుల్లో లేనిపోని అనుమానాలు, ఆందోళనలు మొదలయ్యాయి. అసలు ఈ20 పెట్రోల్లో చీమలను ఆకర్షించే గుణం నిజంగానే ఉందా? లేక ఇదొక పుకారా? అనే విషయంపై తాజాగా భారత్ పెట్రోలియం కార్పొరేషన్ లిమిటెడ్ (BPCL) శాస్త్రీయ ఆధారాలతో క్లారిటీ ఇచ్చింది. ఈ ప్రచారంలో ఎలాంటి నిజం లేదని కొట్టిపారేసింది.
అసలు వివాదం ఏంటి?
ఇటీవల ‘E100’ ఇంధనానికి చట్టపరమైన అనుమతులు లభించిన తర్వాత, సోషల్ మీడియాలో ఇథనాల్ బ్లెండింగ్పై రకరకాల పోస్ట్లు రావడం మొదలయ్యాయి. ఈ క్రమంలోనే ఒక వీడియో వైరల్గా మారింది. ఇథనాల్ను చెరకు నుంచి తయారు చేస్తారు కాబట్టి, ఆ తీపి వాసనకు కార్ల ఫ్యూయల్ క్యాప్స్ వద్ద చీమలు గుంపులుగా చేరుతున్నాయని కొందరు బలంగా నమ్మారు. ఈ ప్రచారంపై స్పందించిన బీపీసీఎల్ (BPCL).. సోషల్ మీడియాలో వస్తున్న వార్తలకు ఎలాంటి శాస్త్రీయ ఆధారం లేదని స్పష్టం చేసింది. పెట్రోల్లో కలిపే ‘ఫ్యూయల్-గ్రేడ్ ఇథనాల్’ను ఒక ప్రత్యేకమైన ప్రక్రియ ద్వారా తయారు చేస్తారని కంపెనీ వివరించింది. ఫెర్మెంటేషన్ (పులియబెట్టడం), డిస్టిలేషన్ సాంకేతికత ద్వారా దీనిని తయారు చేయడం వల్ల చివరిగా వచ్చే ఇంధనంలో ఎలాంటి షుగర్ అవశేషాలు మిగలవు. అంతేకాకుండా, ఈ ఫ్యూయల్ ఇథనాల్లో ‘డిన్యాచురెంట్స్’ అనే రసాయనాలను కలుపుతారు. ఇవి కీటకాలు, పురుగులను దరిచేరనివ్వకుండా దూరంగా ఉంచుతాయి. కాబట్టి చీమలను ఆకర్షించే గుణాలేవీ ఇందులో ఉండవు. పెట్రోల్లో ఇథనాల్ కలిపినప్పటికీ, దాని నుంచి వచ్చే సాధారణ హైడ్రోకార్బన్ వాసనే ఎక్కువగా ఉంటుంది. చీమలను ఆకర్షించేంత ప్రత్యేకమైన వాసన ఇథనాల్కు ఉండదని బీపీసీఎల్ పేర్కొంది.అంతేకాదు.. సాధారణ పెట్రోల్తో పోలిస్తే ఇథనాల్ కలిపిన పెట్రోల్లో ఫ్యూయల్ వేపర్ (ఇంధన ఆవిరి) చాలా తక్కువగా వస్తుందని కంపెనీ తెలిపింది. కాబట్టి ఇంధనం లీకై లేదా ఆవిరై చీమలు వచ్చే అవకాశమే లేదు. ఈ20 పెట్రోల్కు, చీమలు రావడానికి ఎలాంటి సంబంధం లేదని తేల్చిచెప్పిన బీపీసీఎల్.. సోషల్ మీడియాలో వచ్చే ఇలాంటి నిరాధారమైన పుకార్లను నమ్మవద్దని వాహనదారులకు విజ్ఞప్తి చేసింది.
BPCL has examined the claims circulating on social media regarding ants congregating around vehicle fuel filler caps and their alleged association with E20 petrol.
Fuel-grade ethanol used for petrol blending is produced through fermentation and distillation processes that… pic.twitter.com/1qED7xBBhe
— Bharat Petroleum (@BPCLimited) June 17, 2026