Telangana Rain Alert: తెలంగాణలో వాన మోత.. ఈ జిల్లాలకు పిడుగుల ముప్పు

తెలంగాణలోని పలు ప్రాంతాల్లో వాతావరణంలో అకస్మాత్తుగా మార్పులు చోటుచేసుకుంటున్నాయి. రాబోయే సమయంలో రాష్ట్రంలోని పలు జిల్లాల్లో ఉరుములు, మెరుపులతో కూడిన వర్షాలు కురిసే అవకాశం ఉందని హైదరాబాద్ వాతావరణ కేంద్రం వెల్లడించింది. ముఖ్యంగా ఉత్తర , తూర్పు తెలంగాణ జిల్లాలైన ఆదిలాబాద్, కొమరం భీమ్ ఆసిఫాబాద్, మంచిర్యాల, జయశంకర్ భూపాలపల్లి, ములుగు, భద్రాద్రి కొత్తగూడెం , ఖమ్మం జిల్లాల్లోని పలు ప్రాంతాల్లో పిడుగులతో కూడిన వర్షాలు పడే అవకాశం ఉంద ని తెలిపింది. ఈ నేపథ్యంలో సదరు జిల్లాల ప్రజలు, ముఖ్యంగా రైతులు అప్రమత్తంగా ఉండాలని అధికారులు సూచించారు.

గంటకు 30 నుంచి 40 కిలోమీటర్ల వేగంతో ఈదురు గాలులు

వర్ష సూచన ఉన్న జిల్లాల్లో గాలుల తీవ్రత కూడా ఎక్కువగా ఉంటుందని వాతావరణ శాఖ హెచ్చరించింది. వర్షం కురిసే సమయంలో గంటకు 30 నుండి 40 కిలోమీటర్ల వేగంతో ఈదురు గాలులు వీచే అవకాశం ఉందని తెలిపింది. వేగవంతమైన గాలుల వల్ల బలహీనమైన నిర్మాణాలు, చెట్ల కొమ్మలు , విద్యుత్ వైర్లు తెగిపడే ప్రమాదం ఉన్నందున వర్షం పడే సమయంలో ప్రజలు బహిరంగ ప్రదేశాల్లో ఉండకూడదని, సురక్షితమైన ప్రదేశాల్లో ఆశ్రయం పొందాలని అధికారులు స్పష్టం చేశారు.

మిగిలిన ప్రాంతాల్లో తేలికపాటి జల్లులు

వర్ష ప్రభావం ఉన్న జిల్లాలు మినహా, తెలంగాణలోని మిగిలిన జిల్లాల్లో వాతావరణం సాధారణంగా పొడిగా ఉంటుందని వాతావరణ నివేదిక పేర్కొంది. అయితే, కొన్ని ప్రాంతాల్లో స్థానికంగా మబ్బులు క్రముకుని వచ్చి తేలికపాటి జల్లులు పడే అవకాశం ఉందని అధికారులు తెలిపారు. పగటిపూట సాధారణ ఉష్ణోగ్రతలు నమోదు కానున్నప్పటికీ, ఆకాశం పాక్షికంగా మేఘావృతమై కొన్ని చోట్ల చిరుజల్లులు పడే అవకాశం ఉందన్నారు.